އެމެރިކާގެ ކެލިފޯނިއާ ސްޓޭޓުގެ ސެން ފްރެންސިސްކޯ ބޭ އޭރިއާގައި މިހާރު ކުރިއަށްދާ ހަވަނަ ކެރަމް ވޯލްޑް ކަޕުގެ ޓީމު އިވެންޓުގެ ސެމީ ފައިނަލަށް ރާއްޖޭގެ ގައުމީ އަންހެން އަދި ފިރިހެން ޓީމު ދަތުރުކޮށްފިއެވެ.
އެމެރިކާގެ ކެރަމް އެސޯސިއޭޝަން (ޔޫއެސްސީއޭ)ގެ އިސްނެގުމުގެ މަތީން، އިންޓަނޭޝަނަލް ކެރަމް ފެޑެރޭޝަން (އައިސީއެފް) ގުޅިގެން މިމަހުގެ 17 ގެ ނިޔަލަށް ކުރިޔަށްދާ ި މުބާރާތުގެ ސެމީ ފައިނަލުގައި ރާއްޖެ ބައްދަލުކުރާނީ ސްރީ ލަންކާއާއެވެ.
ރާއްޖޭގެ ގައުމީ ޓީމުގެ ސްކޮޑުގައި ހިމެނެނީ ފަސް ފިރިހެން ކުޅުންތެރިންނާއި، ފަސް އަންހެން ކުޅުންތެރިންނެވެ. ގައުމީ ފިރިހެން ޓީމުގައި ހިމެނެނީ؛ އިސްމާއިލް އަޒްމީން، އިބްރާހިމް ހުޖާން އަލީގެ އިތުރުން ހަސަން ނާޒިމް އާއި މުޙައްމަދު މުންތަސިރު އަދި ޚާތިމް ޚަލީލް އެވެ. ގައުމީ އަންހެން ޓީމުގައި ހިމެނޭ ކުޅުންތެރިންނަކީ؛ އައިމިނަތު ވިދާދް، އައިޝަތު ނަހުފާ، އައިޝަތު ފައިނާޒް، ފާތިމަތު ރަޔާނާ އާއި އައިމިނަތު ޝުބާ އާދަމް އެވެ.
ގައުމީ ޓީމުން އެންމެ ފަހުން ވާދަކުރި ބައިނަލްއަގުވާމީ މުބާރާތަކީ ރާއްޖޭގައި މިދިޔަ އޭޕްރީލް މަހު ބޭއްވި ހަވަނަ އޭޝިއަން ކެރަމް ޗެމްޕިއަންޝިޕެވެ. އެ މުބާރާތުގައި ފިރިހެން ޓީމުން ރިހި މެޑެލް ހޯދިއިރު އަންހެން ޓީމުން ވަނީ ލޯ މެޑެލް ހޯދާފައެވެ. އަދި ޑަބަލްސް އިވެންޓްގައި ރާއްޖޭގެ އަޒްމީން އާއި ނާޒިމްގެ ޕެއާ ވެސް ރިހި މެޑަލް ހޯދިއެވެ.
މި އަހަރުގެ ވޯލްޑް ކަޕްގައި ވެސް އޯޕަން ސިންގަލްސް، އޯޕަން ޑަބަލްސްގެ އިތުރުން ޓީމް އިވެންޓް އަދި ސްވިސް އިވެންޓް ކުޅުމަށް ހަމަޖެހިފައިވެއެވެ. މީގެއިތުރުންޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ހަމަޖެހިފައިވެއެވެ.