މިމަހު 20 ފެށުމަށް ހަމަޖެހިފަވާ 90 ޕްލަސް ގޯލްޑް ކަޕް ފުޓްބޯޅަ މުބާރާތުގައި ދިވެހި ކޯޗުން ޓީމުތަކުގައި ހިމެނުމަށް މަޖުބޫރު ކުރީ މި މުބާރާތަކީ ދިވެހި ކޯޗުން މެދުގައި އޮތް ޗެލެންޖެކަށް ހަދަން ބޭނުންވާތީ ކަމަށް މުބާރާތް އިންތިޒާމުކުރުމުގައި އެންމެ އިސްކޮށް ހަރަކާތްތެރިވާ ފަރާތްކަމަށްވާ ޕްރޯ ލައިސެންސް ކޯޗު މުޙައްމަދު ޝާޒްލީ ބުނެފިއެވެ.
ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަމުން ޝާޒް ބުނީ ބޭނުން ވަނީ މިކަހަލަ މުބާރާތަކުން ކުޅުންތެރިންގެ ހުނަރާ އެއްވަރަށް ކޯޗުންގެ ހުނަރުވެސް ތަރައްގީވުން ކަމަށެވެ.
ޓެކްނިކަލީ ލިބުނު ތަޖުރިބާގެ އަލީގައި އެގޮތަށް އެކަން ކުރަން ނިންމީ ކަމަށް ޝާޒް ބުންޏެވެ. ރާއްޖޭގައި ތިބި ޕްރޯ ލައިސެންސް ކޯޗުންނާއެކު މޮޅެތި ކޯޗުން ތިބިކަން ފާހަގަކުރަމުން އެހެން ނަމަވެސް އެ ކޯޗުން ކުރިޔަށްދެވޭނެ މަގެއް ނެތްކަމަށް ޝާޒް ބުންޏެވެ.
ރާއްޖޭގައި ކަންތައްތަށް އޮންނަ ގޮތައް ބަލާއިރު ރަނގަޅު ޓީމެއް އެކުލަވާލެވިއްޖެނަމަ ބިދޭސީ ކޯޗެއް އެ ޓީމުތަކުން ހޯދާކަން ފާހަގަކުރެވޭކަމަށް ޝާޒް ބުންޏެވެ. އޭގެއިން އެޑްވާންޓޭޖްތަކެއް ފާހަގަކުރެވޭ ކަމަށް ވެސް ޝާޒް ބުންޏެވެ.
"އަޅުގަނޑުމެންނަށް އެބައޮތް ދެއްތޯ ޕްރިމިއަރ ލީގު، އޭގަދެން އިންޓަނޭޝަނަލް މިންގަނޑުތަކާ އެއްގޮތަށްދާ ޕާފޯމް ކުރާ ލީގެއްވީމަ އޭގަ ދެން ހުރިހާ އެންމެންނަށް ވެސް ފުރުސަތު އޮންނާނެ. ދެން މި މުބާރާތް އަޅުގަނޑުމެން ބާއްވާނީ ދިވެހި ކޯޗުންގެ އަތްމަތީގައޭ، އެއީ ދެން އަޅުގަނޑުމެންގެ ވިސްނުމަކީ." ޝާޒް ބުންޏެވެ.
ފުޓްބޯޅައިގެ ފޯރި އަލުން ގެނައުމުގެ މަގުސަދުގައި ނައިންޓީ ޕްލަސްއިން ބާއްވާ ގޯލްޑް ކަޕް ހާއްސަކޮށްފައި ވަނީ ސިޓީތަކާއި ރަށްތަކަށެވެ.