ޔޫއެފާ ނޭޝަންސް ލީގުގައި މިރޭ ފްރާންސް އާއި ދެކޮޅަށް އިސްރާއީލް، ޕެރިހުގައި ކުޅޭ މެޗުގެ ސަލާމަތީ ކަންތައްތައް ވަރުގަދަ ކުރުމަށް ފްރާންސްގެ ފުޓްބޯލް ފެޑަރޭޝަނުން ނިންމައިފި އެވެ.
މިރޭ ރާއްޖެ ގަޑިން 12:45 ގައި ޕެރިހުގެ ފްރާންސް ސްޓޭޑިއަމްގައި ފެށުމަށް ހަމަޖެހިފައިވާ މި މެޗުގެ ސަލާމަތީ ކަންތައްތައް ބެލެހެއްޓުމަށް 4000 ފުލުހުން ހަމަޖައްސާފައިވާއިރު މިއަދުވެސް ޕެރިހުގެ މަގުތަކުގައި ފަލަސްތީނަށް ތާއިދު ކުރާ ފަރާތްތަކުން ވަނީ އިސްރާއީލާއި ދެކޮޅަށް މުޒާހަރާ ކޮށްފަ އެވެ.
އަދި މިދިޔަ ހަފްތާގައި ނެދަލޭންޑްސްގެ އެމްސްޓެޑަމްގައި އިޒްރޭލުގެ މެކަބީ ތެލްއަވީވް ކުޅުނު މެޗުގައި ހިނގާދިޔަ ހަމަނުޖެހުންތަކުގައި ފަސް މީހަކަށް ވަނީ އަނިޔާވެފަ އެވެ. އަދި އެކަމާއި ގުޅިގެން ދެން މެކަބީ ތްލެ އަވީވް އާއި ތުރުކީގެ ގަލަތަސަރާއީ ކުޅޭ މެޗު ސަޕޯޓަރުން ނުވައްދާ ހަންގޭރީގައި ކުޅުމަށް ޔޫއެފާ އިން ވަނީ ނިންމާފަ އެވެ.
އިސްރާއީލާއި ފަލަސްތީނާއި ދެމެދު މިހާރު ހިނގަމުންދާ ހަމަނުޖެހުންތަކާއި ގުޅިގެން ގިނަ ބައެއްގެ ފާޑުކިއުންތަކާއި ނުރުހުން ވަނީ އިޒްރޭލަށް އަމާޒުވެފަ އެވެ. އަދި ޕެރިހުގައި މުޒާހަރާ ކުރާ ފަރާތްތަކުން ވަނީ އިސްރާއީލަކީ ފުޓްބޯޅަ ދަނޑުތަކުން ފެންނަންވާ ވަރަށްވުރެ މުޑުދާރު ޓީމެއް ކަމަށްބުނެ މި މެޗު ބޮއިކޮޓް ކުރުމަށް ގޮވާލާފަ އެވެ.
ޖުމްލަ 80 ހާސް މީހުންގެ ޖާގައިގެ ސްޓޭޑިއަމްގައި ކުޅޭ މި މެޗު ބެލުމަށް ގިނަބަޔަކު ނުދާނެކަމަށް ބައެއް މީޑިޔާ ރިޕޯޓްތައް ވަނީ ބުނެފަ އެވެ. އެގޮތުން އެ ފަރާތްތަކުން އަންދާޒާ ކުރާ ގޮތުގައި މި މެޗު ބެލުމަށް ދަނޑަށް ވަންނާނީ 20 ހާސް ސަޕޯޓަރުންނެވެ.