އިޤުތިޞާދީ ގޮތުން އެންމެ ކުރިއަރާފައިވާ 20 ޤައުމުގެ ގުޅުން، ގްރޫޕް އޮފް ޓުވެންޓީ (ޖީ20) ސަމިޓު ބޭއްވުމުގެ އެންމެ ފަހުގެ ތައްޔާރީތައް ކުރަމުން ދިޔަ ބްރެޒިލްގެ ވެރިރަށް ބްރަޒީލިޔާގެ ސުޕްރީމް ކޯޓުގެ އިމާރާތް ކައިރީގައި ދެ ބޮމެއް ގޮއްވައިލައި، އެކަކު މަރައިލައިފިއެވެ. ބޮންތައް ގޮއްވައިލާފައި ވަނީ ސުޕްރީމް ކޯޓާއި، ޤާނޫނު ހަދާ މަޖިލިސް، ކޮންގްރެސްގެ އިމާރާތް، އަދި ރައީސް އޮފީހާއި ރިޔާސީ ގަނޑުވަރު ކައިރީގައި ހުރި މައިދާނެއްގައެވެ.
ޖީ20އަށް ތައްޔާރުވުމުގެ ގޮތުން ބްރެޒިލްގައި އަޅާފައިވާ ސަލާމަތީ ފިޔަވަޅުތަކާ މެދު މި ޙަމަލާތަކާ ގުޅިގެން ވަނީ ސުވާލު އުފެދިފައެވެ. ޖީ20ގެ ސަމިޓު އޮންނާނީ ހިއޯ ޑި ޖަނޭރޯގައެވެ. އެ ދަތުރުފުޅުގައި ބައިވެރިވެ ވަޑައިގެންނެވުމަށް ޗައިނާގެ ރައީސް ޝީ ޖިންޕިންގ ހިއޯ ޑި ޖަނޭރޯއަށް ކުރައްވާ ދަތުރުފުޅަށް ފަހު، ބްރަޒީލިޔާއަށް ރަސްމީ ދަތުރުފުޅެއް ކުރެއްވުމަށް ވެސް އޮތީ ހަމަޖެހިފައެވެ.
ބްރަޒީލިޔާގެ ފުލުހުން ބުނީ، ފުރަތަމަ ބޮން ގޮއްވައިލާފައި ވަނީ ސުޕްރީމް ކޯޓު ކައިރީގައި ހުންނަ އެއްގަމު އުޅަނދު ޕާކުކުރާ ސަރަޙައްދެއްގައި ކަމުގައެވެ. ބޮން ގޮއްވައިލި ވަގުތު، ސުޕްރީމް ކޯޓުގެ ފަނޑިޔާރުން ތިއްބެވީ މުހިންމު ބައްދަލުވުމެއްގައެވެ. އެ ހާދިސާއާ ގުޅިގެން، ހުރިހާ ފަނޑިޔާރުން ރައްކާތެރި ތަނަކަށް ބަދަލު ކޮށްފައިވާ ކަމުގައި ސުޕްރީމް ކޯޓުން ހާމަކުރިއެވެ.
ބޮމުގެ ޙަމަލާއާ ގުޅިގެން ބްރެޒިލްގެ ފުލުހުންގެ މައި އިދާރާއިން ވަނީ ތަޙުޤީޤެއް ހިންގަން ފަށާފައެވެ. އަދި، މިއީ ވަރަށް ނުރައްކާތެރި ޙަމަލާއެއްގެ ގޮތުގައި ބްރެޒިލްގެ ޕްރޮސިކިޔުޓަރ ޖެނެރަލްގެ އޮފީހުން ވަނީ ސިފަކޮށްފައެވެ. ފުލުހުންގެ އޮފިޝަލަކު ބުނީ، ބޮން ގޮއްވައިލާފައިވާ ސަރަޙައްދުން މަރުވެފައި އޮތް މީހެއްގެ ހަށިގަނޑު ފެނިފައިވާ ކަމުގައެވެ. އަދި، އެ މީހާގެ އަތުގައި އިތުރު ބޮމެއް އޮތް ކަމުގައެވެ.
ބޮމުގެ ޙަމަލާތައް އަމާޒުކޮށްފައިވާ ސަރަޙައްދަކީ 2023ވަނަ އަހަރުގެ ޖަނަވަރީ 8ވަނަ ދުވަހު ބޮޑު ހަމަނުޖެހުންތަކެއް ހިންގާފައިވާ ސަރަޙައްދެކެވެ. ބްރެޒިލްގެ ރިޔާސީ އިންތިޚާބުގައި ނާކާމިޔާބީއާ ކުރިމަތިވެ ވަޑައިގެންނެވި ޖައިރް ބޮލްސޮނާރޯއަށް ތާޢީދު ކުރާ ގިނަ އަދަދެއްގެ ބަޔަކު ވަނީ، އެ ސަރަޙައްދުގައި ހުރި ސަރުކާރާއި، ފަނޑިޔާރުގޭގެ އިތުރުން ކޮންގްރެސްގެ އިމާރާތްތަކަށް ޙަމަލާދީ، ހަމަނުޖެހުން ހިންގާފައެވެ. އެ ސަރަޙައްދުގައި ބޮމުގެ ޙަމަލާތަކެއް ދިން ވަގުތު، ރައީސް ލުއީސް އިނާސިޔޯ ލޫލާ ދަ ސިލްވާ ރިޔާސީ ގަނޑުވަރުގައި ނެތް ކަމުގައި ރިޕޯޓުތައް ބުނެއެވެ.