ބައިނަލްއަގުވާމީ އެކުވެރިކަމުގެ މެޗުގައި ބަންގްލަދޭޝް ކޮޅަށް އަލީ ފާސިރު (ސެންޓޭ) ވައްދާލި ހަމައެކަނި ލަނޑާއެކު ރާއްޖެއިން ތާރީޚީ މޮޅެއް ހޯދައިފިއެވެ.
މިއީ ވަޅުޖެހިފައި އޮތް ރާއްޖޭގެ ފުޓްބޯޅައިގެ ކުރިމަގަށް ލިބުނު ބޮޑު އުއްމީދެކެވެ. އެގޮތުން ރާއްޖޭގެ ލީގު މެޗެއް ނުކުޅޭތާ އަހަރެއްހާ ދުވަސް ވެފައިވާއިރު، ގައުމީ ފުޓުބޯޅަ ޓީމުވެސް މެޗެއް ކުޅެފައިވަނީ ގާތްގަނޑަކަށް މީގެ އަހަރެއްހާ ދުވަސް ކުރިންނެވެ. އެގޮތުން އެންމެ ފަހުންވެސް ރާއްޖެއިން ބަންގްލެދޭޝްއާ ދެކޮޅަށް ކުޅުނުއިރު، ފީފާ ވޯލްޑް ކަޕް ކޮލިފައިންގައި ރާއްޖެ އެ ފަހަރު ކެޓީ ބަންގްލަދޭޝް އަތުން 2-1 ގެ ނަތީޖާއަކުން ބަލިވުމުންނެވެ.
ބަންގްލަދޭޝްގެ ވެރިރަށް ޑާކާގެ ބަޝުންދަރާ އެރީނާގައި މިއަދު ކުޅުނު މެޗު ރާއްޖެ ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މިއީ ބަންގްލަދޭޝްގައި ކުޅެގެން އެ ޓީމު އަތުން ރާއްޖޭން މޮޅުވި ފުރަތަމަ ފަހަރެވެ. މީގެ ކުރިން ބަންގްލަދޭޝްގައި ރާއްޖެއިިން ކުޅުނު ފަސް ފަހަރުވެސް ވަނީ ބަލިވެފައެވެ. އަދި މިއީ ބަންގްލަދޭޝާ ދެކޮޅަަށް ކުުޅުނު 19 މެޗުގެ ތެރެއިން ރާއްޖެ މޮޅުވި ހަތްވަނަ މެޗެވެ.
ރާއްޖެއިން މި މެޗަށް ނެރުނީ ވަރުގަދަ ސްކޮޑެކެވެ. ތަޖުރިބާކާރު ގިނަ ކުޅުންތެރިންތަކެއް މި ސްކޮޑުގައި ހިމެނުނުއިރު، މި މެޗުގައި ބަންގްލަދޭޝް ޓީމުގެ ހަލުވި ކުޅުން ދެއްކޭތޯ މަސައްކަތްކުރިއެވެ. ނަމަވެސް ދިވެހި ކުޅުންތެރިންނަށް ލިބުނު ދަނޑިވަޅުތަކުގައި ވަނީ ތަފާތު ދައްކާފައެވެ.
މި މެޗުގައި ރާއްޖޭގެ ހަމައެކަނި ލަނޑު ފެނިގެންދިޔައީ މެޗުގެ 18 ވަނަ މިނެޓުގައެވެ. އަލީ ފާސިރު (ސެންޓޭ) މި ލަނޑު ކާމިޔާބުކުރީ އޭރިއާބޭރުން ލިބުނު ހިލޭޖެހުމަކުން، ހަމްޒާ މުޙައްމަދު (ހަމްޕު) ނަގައިދިން ބޯޅަ ގޯލުގެ ތެރެއަށް ފޮނުވާލައިގެންނެވެ.
ނަތީޖާ ހަމަހަމަކުރަން ބަންގްލަދޭޝްއިން ކުރި އެޓޭކުތަކުގެ ތެރެއިން އެންމެ ރަނގަޅު ހަމަލާއެއް މެޗުގެ 43 ވަނަ މިނެޓުގައި ފޮނުވާލީ ސޮހޭލް ރާނާއެވެ. އެކަމަކު އޭރިއާބޭރުން އޭނާ ޖެހި ބޯޅަ އަމާޒުވީ ގޯލުގެ ދަނޑިއަށެވެ.
މި މެޗުން ރާއްޖެ މޮޅުވިއިރު، ރާއްޖެ އާއި ބަންގްލަދޭޝް ބައްދަލުކުރާ އެކުވެރިކަމުގެ ދެވަނަ މެޗު ކުޅުމަށް ހަމަޖެހިފައިވަނީ އަންނަ ހޮނިހިރު ދުވަހުގެ ހަވީރެވެ.