ކުޅިވަރު

"މީއީ ގައުމީ ޓީމަށް ކުޅުންތެރިން ދިޔުމަށް އޮތް މަގެއް"


90 ޕްލަސް ގޯލްޑް ކަޕް ފުޓްބޯޅަ މުބާރާތަކީ ގައުމީ ޓީމަށް ދިޔުމަށް ކުޅުންތެރިންނަށް ހުޅުވިގެންދާނެ މަގެއް ކަމަށް ތަޖުރިބާކާރު ކޯޗު ނިސްތާރު އަލީ ބުނެފިއެވެ.

ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަމުން މުބާރާތް އިންތިޒާމު ކުރުމުގައި އިސްކޮށް ހަރަކާތްތެރިވާ އެއް ކޯޗު، ނިސްތާރު ބުނީ ފުރަތަމަ ޑިވިޝަންގެ ކުލަބުތަކުން މުބާރާތަށް އެއްބާރުލުން ދޭނެ ކަމަށާއި މުބާރާތުގެ ސަބަބުން އެ ކުލަބުތަކުން ވަރަށް ގިނަ ކުޅުންތެރިން ހޯދަން ފަސޭހައަކަށް ވެގެންދާނެ ކަމަށެވެ.

ފުޓްބޯޅަ ނުކުޅެ ގިނަދުވަސްވުމުން ކުލަބަތަކަށް ވަރަށް ގިނަ ކުޅުންތެރިންތަކެއް ގެއްލިގެން ހިގައްޖެކަމަށާއީ މިއީ އާ ކުޅުންތެރިންނާއި އެކު މުޅި ދިވެހި ފުޓްބޯޅައަށް ލިބިގެންދާނެ ރަނގަޅު ފެށުމެއް ކަމަށް ނިސްތާރު ފާހަގަ ކުރިއެވެ.

"މިއީ ވަރަށް ރަނގަޅު ރޫޓެއް، ގައުމީ ޓީމަށް ވަގުތު ދޭންވެސް ކުލަބުތަކުގެ އެއްބާރުލުން ލިބޭ އެހެންވީމަ މިއީ އެ ކުލަބުތަކަށް ކުޅުންތެރިން ސްކައުޓް ކުރުމަށް ރަނގަޅު ފުރުސަތެއް އަޅުގަނޑު އުންމީދުކުރަން މުބާރާތުން ފާހަގަވާ ކުޅުންތެރިން ފުރަތަމަ ޑިވިޝަނުން ފެންނާނެ ކަމަށް" ނިސްތާރު ބުންޏެވެ.

ރާއްޖޭގެ ފުޓްބޯޅައިގެ ފޯރި އަލުން ވީހާވެސް ބޮޑަށް ގަދަކުރުމުގެ ގޮތުން މުޅިން އަލަށް ބާއްވާ ގޯލްޑް ކަޕް ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހެވެ. 22 ޓީމުން ބައިވެރިވެފައިވާކަމަށް، އިންތިޒާމް ކުރާ ފަރާތުން ޕީއެމްއެމް ސްޕޯޓްސްއަށް މައުލޫމާތުދީފައިވެއެވެ.