މަސްތުވާތަކެތި ބޭނުންކުރާ 47 މީހުން ފަރުވާ ނިޒާމުގެ ތެރެއަށް ވައްދައިފި
-
އޮޕަރޭޝަން ކުރިއަށްގެންދަނީ މުއްދަތެއް ނެތް ގޮތަށް
-
އޮޕަރޭޝަން ފެށީ މިދިޔަ މަހުގެ 22 ވަނަ ދުވަހު
ނެޝަނަލް ޑްރަގް އެޖެންސީ، އެންޑީއޭއާއި ދިވެހި ފުލުހުންގެ ޚިދުމަތް ގުޅިގެން ކުރިއަށްގެންދާ ޚާއްސަ އޮޕަރޭޝަނަކާއެކު މަސްތުވާތަކެތި ބޭނުންކުރާ 47 މީހުން ފަރުވާ ނިޒާމުގެ ތެރެއަށް ވައްދާފައިވާކަމަށް އެންޑީއޭއިން ވިދާޅުވެއްޖެއެވެ.
މަސްތުވާތަކެތި ބޭނުންކުރާ މީހުން ފަރުވާގެ ނިޒާމަށް ވެއްދުމަށް ޚާއްސަ އޮޕަރޭޝަނެއް ފެށީ މިދިޔަ މަހުގެ 22 ވަނަ ދުވަހުއެވެ.
އެންޑީއޭއިން ވިދާޅުވީ މިއޮޕަރޭޝަން ނިންމާލުމަށް ވަކި ތާރީޚެއް ކަނޑައަޅާފައިނުވާ ކަމަށެވެ. އަދި މި އޮޕަރޭޝަންގެ ދަށުން މަގުމަތީގައި ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި ވައްކަމާއި ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާ މަގުމަތިވެފައިވާ މީހުން ފަރުވާ ނިޒާމަށް ގެނެސް، އެ މީހުންނަށް ބޭނުންވާ ފަރުވާ ދެވޭނެކަމަށް އެންޑީއޭއިން ވިދާޅުވިއެވެ.
އެންޑީއޭއިން ވިދާޅުވީ އަމާޒަކީ ފަރުވާއަށް ގެނެވޭ މީހުންނަށް ފަރުވާ ދިނުމަށްފަހު އަނބުރާ މުޖުތަމަޢަށް ނެރުން ކަމަށެވެ. އަދި އެމީހުން މުޖުތަމަޢަށް ނެރުމަށްފަހުވެސް އެ މީހުންނަށް ބޭނުންވާ އާފްޓަރކެއަރދެވޭނަކަން އެއެޖެންސީން ފާހަގަކުރައްވައެވެ.
ރާއްޖޭގައި ޑްރަގް އޮފެންޑަރ ރިމާންޑް ސެންޓަރު ނުވަތަ މަސްތުވާތަކެތި ބޭނުންކުރާ މީހުންނަށް ފަރުވާދޭ ސެންޓަރުތައް ހުންނަނީ ކ. ހިންމަފުއްޓާއި ހުޅުމާލޭގައެވެ. ސަރުކާރުން އެންމެ ބޮޑު އިސްކަމެއްދެއްވައިގެން ހައްލުކުރަން ބޭނުންވާ އިޖުތިމާޢީ މައްސަލަތަކުގެ ތެރޭގައި މަސްތުވާތަކެތީ ވަބާއިން ދިވެހިން ސަލާމަތްކުރުން ހިމެނެއެވެ.