ޕާކިސްތާނުގެ އުތުރުގެ ރަށެއްގައި ދަތުރު ކުރަމުން ދިޔަ ބަހެއް ކޯރަކަށް ވެއްޓި، އެއިން ދަތުރު ކުރަމުން ދިޔަ 14 މީހުން މަރުވެ، ގިނަ އަދަދެއްގެ ބަޔަކު ގެއްލިއްޖެއެވެ. 27 ފަސިންޖަރުންނާ އެކު ގިލްގިތު ބަލްތިސްތާން ސަރަޙައްދުގައި ދަތުރު ކުރަމުން ދިޔަ ބަސް ވެއްޓިފައި ވަނީ އަންދަސް ކޯރަށެވެ. މި ހާދިސާ ހިނގާފައި ވަނީ ޑަޔިމަރް ޑިސްޓްރިކްޓުގައި އޮންނަ ތަލްޗީ ބުރިޖާ ހިސާބުންނެވެ.
ގިލްގިތު ބަލްތިސްތާނުގެ އޮފިޝަލުން ބުނީ، ބަހުގައި ދަތުރު ކުރި މީހުންގެ ތެރެއިން 14 މީހުން މަރުވެފައިވާ ކަން ކަށަވަރު ކުރެވިފައިވާ ކަމުގައެވެ. އަދި، އޭގައި ތިބި ފަސިންޖަރުންގެ ތެރެއިން 12 މީހެއްގެ ހަށިގަނޑު ކޯރުގެ ތެރެއަށް ގެއްލިފައިވާ ކަމަށާއި، އެ މީހުންގެ ހަށިތައް އަދިވެސް ނުފެންނަ ކަމުގައެވެ. މި ހާދިސާގައި ސަލާމަތްވީ އެންމެ ފަސިންޖަރެކެވެ. ނަމަވެސް، އޭނާއަށް ވެސް ވަނީ ބޮޑެތި އަނިޔާތަކެއް ލިބިފައެވެ.
އެ ސަރަޙައްދުގެ އޮފިޝަލުން ބުނީ، މި ހާދިސާ ހިނގަން މެދުވެރިވީ، ނުޤަވާޢިދުން ބާރު ދުވެލީގައި ބަސް ދުއްވުމުން ކަމަށް ބެލެވޭ ކަމުގައެވެ. އަދި، ކޯރުގެ ތެރެއަށް ބަސް ވެއްޓިފައި ވަނީ، ބަސް ދުއްވަން އިން ޑްރައިވަރަށް އުޅަނދުގެ ކޮންޓްރޯލް ގެއްލިގެން ކަމުގައެވެ. އެ ބަހުގައި ތިބި ފަސިންޖަރުންނަކީ، ކައިވެނީގެ ހަފުލާއެއްގައި ބައިވެރިވުމަށް ޗަކްވާލް ޑިސްޓްރިކްޓަށް ދަތުރު ކުރަމުން ދިޔަ ބަޔެކެވެ.
ޕާކިސްތާނަކީ އެއްގަމު އުޅަނދުފަހަރުގެ އެކްސިޑެންޓުތައް ގިނަ ޤައުމެކެވެ. އެ ފަދަ ހާދިސާތައް މެދުވެރިވާން ދިމާވާ އެންމެ ބޮޑު އެއް ސަބަބަކީ ޤަވާޢިދަށް އިޙުތިރާމު ނުކުރުމެވެ. އަދި، ބައެއް ސަަރަޙައްދުތަކުގައި މަގުތަކުގެ ފެންވަރު ދަށްވުމެވެ. އޮގަސްޓު މަހު ވެސް ޕާކިސްތާނުގައި މި ފަދަ ނުރައްކާތެރި އެކްސިޑެންޓެއް ހިނގިއެވެ. އެ ޤައުމުގެ ދެކުނުގެ ރަށެއްގައި ދެ ބަސް ޖެހިގެން ހިނގި ހާދިސާގައި 34 މީހުން މަރުވެ، ގިނަ އަދަދެއްގެ ބަޔަކަށް އަނިިޔާވިއެވެ.