އަންނަ އަހަރު ފެންނާނީ ވަރަށް ހަރަކާތްތެރި އިޤްތިޞާދެއް: އިޤްތިޞާދީ ވަޒީރު

އަންނަ އަހަރު ރާއްޖޭގައި ވަރަށް ހަރަކާތްތެރި އިޤްތިޞާދެއް އޮންނާނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ހުޅުމާލެއަށް އިންގިލާބީ ބަދަލުތަކެއް ގެނުވާނެ ބިޔަ ޕްރޮޖެކްޓްތަކެއް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

"ޓްރާސްފޯމިންގ ޓުމޯރޯ"ގެ ނަމުގައި ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިޤްތިސާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ކުރިމަތިވި ހާލަތަކީ ވަރަށް ދަތި އުނދަގޫ ނުރައްކާތެރި ހާލަތެއް ކަމަށެވެ. އެފަދައިން ހާލަތު މާނަކުރައްވަނީ ފައިސާގެ ގޮތުން ނުތަނަވަސްކަން ކުރިމަތިވެފައި އޮތް މިންވަރާއި އިޤްތިސާދު އޮތް ދަތި ހާލަތުގެ ސަބަބުން ކަމަށް ވަޒީރު ވިދާޅުވިއެވެ.

ހިނގަމުންދާ އަހަރުގެ ބަޖެޓުގައި ގިނަ މަޝްރޫއުތަކަށް ފައިސާ ޚަރަދުކުރާ މިންވަރަށް ހިމެނިފައި ނުވި ނަމަވެސް މި ދަތި ހާލަތުގައިވެސް، ވަރަށް ހިކުމަތްތެރިކަމާއެކު ރައީސުލްޖުމްހޫރިއްޔާގެ ލަފާފުޅުގެ މަތިން ކަންކަން ކުރިއަށް ގެންދެވިއްޖެކަމަށް ވަޒީރު ވިދާޅުވިއެވެ.

ވަޒީރު ސައީދު ވަނީ 2025 ވަނަ އަހަރަށް ލަފާކުރާ ބަޖެޓުގައި އެންމެ ގިނަ އަދަދަކަށް ބޯހިޔާވަހިކަމުގެ މަޝްރޫއުތައް ހިންގުމަށް ފައިސާ އެކުލަވާލާފައިވާކަން ފާހަގަކުރައްވާފައެވެ. ވަޒީރުގެ ވާހަކަފުޅުގައި އަންނަ އަހަރު ގާތްގަނޑަކަށް 7 އިންސައްތައާ ގާތް ކުރާ އަދަދަކަށް ރާއްޖޭގެ އިޤްތިސާދު ކުރިއަރައިގެންދާނެ ކަމަށް ލަފާކުރެއްވޭ ކަމަށެވެ.

"އަންނަ އަހަރު އުމްރާނީ ބޮޑެތި މަސައްކަތްތަކާއި ޕްރައިވެޓް ޕަބްލިކް ޕާޓްނަރޝިޕްގެ ތެރެއިން އަންނަ ބޯހިޔާވަހިކަމުގެ މަޝްރޫއުތަކާއި އަދި ބޭރުގެ އިންވެސްޓްމަންޓްތަކާއި ފައިނޭންޝަލް ސެންޓަރު ޤާއިމުކުރުމުގެ އިތުރަށް އެގްރިކަލްޗަރ އިކޮނޮމިކް ޒޯން ޤާއިމުކުރުމާއި އުތުރުގައި ބަނދަރު ހަދަން ފެށުމާއި އުމްރަނީ ބިޔަ މަޝްރޫއުތަކެއް ފެށިގެންދާއިރު ހަރަކާތްތެރި އިޤްތިސާދެއް ރާއްޖޭގައި އޮންނާނެކަމާމެދު ޝައްކު ނުކުރަން" ވަޒީރު ވިދާޅުވިއެވެ.

ވަޒީރު ވަނީ ރާއްޖޭގެ އިޤްތިސާދީ ހާލަތަށް އަލިއަޅުވާލައްވާފައެވެ. އެގޮތުން މި ސަރުކާރުން ވެރިކަމާއި ހަވާލުވިއިރު ސޮވެރިން ޑޮވަލޮޕްމަންޓް ފަންޑުގައި ހުރީ 2 މިލިއަން ޑޮލަރު ކަމަށް ވަޒީރު ވިދާޅުވިއެވެ.

ނަމަވެސް އެ ފަންޑު 70 މިލިއަން ޑޮލަރަށް މިހާރު އިތުރުކޮށްފައިވާކަން ވަޒީރު ފާހަގަކުރެއްވިއެވެ. އަދި ސޮވެރިން ޑިވަލޮޕްމަންޓް ފަންޑަށް އައު ޤާނޫނެއް ހަދަމުންދާކަމަށްވެސް ވިދާޅުވިއެވެ.

ވަޒީރު ވިދާޅުވީ މިހާރު 6.5 ބިލިއަން ޑޮލަރުގައި އޮތް ޖީޑީޕީ 2028 ވަނަ އަހަރު އަންނައިރު 10 ބިލިއަން ޑޮލަރަށް އިތުރު ކުރެވޭނެކަމަށެވެ. އަދި އަންނަ އަހަރަކީ އިޤްތިސާދީ ގޮތުން އުންމީދީ އަހަރެއް ކަމަށް އިޤްތިސާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވިއެވެ.