މޫސުމީ ބަދަލުތަކުން ކުރާ އަސަރުތައް ކުޑަކުރުމަށް މަޝްވަރާކުރައްވައިފި
-
މަޝްވަރާތައް ކުރެއްވީ ކޮޕް-29 ގެ ހަވާސާ ބައްދަލުވުމުގައި
-
މުއްސަނދި ޤައުމުތަކުން މިހާރަށް ވުރެ ބޮޑު ޔަޤީންކަމެއް ހޯދަން މަޝްވަރާކުރެއްވި
މޫސުމީ ބަދަލުތަކުން ކުރާ އަސަރުތައް ކުޑަކުރުމަށް ދިވެހި ރާއްޖެއާއި ބޫޓާނާ ގުޅިގެން މަސައްކަތް ކުރުމަށް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ބޫޓާންގެ ބޮޑުވަޒީރާއެކު މަޝްވަރާކުރައްވައިފިއެވެ.
29 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް، ކޮޕް-29 ބައްދަލުވުމުގައި ހަވާސާގެ ތެރެއިން ބޭއްވި މި ބައްދަލުވުމުގައި ރައީސުލްޖުމްހޫރިއްޔާ ވަނީ ބޫޓާންގެ ބޮޑުވަޒީރު ޝެރިންގ ތޮބްގޭއާއި ބައްދަލުކުރައްވާފައެވެ. މި ބައްދަލުވުމުގައި، ދެ ޤައުމުގެ ވެރިން ވަނީ ކޮޕް-29 އަށް ދެ ބޭފުޅުންގެ ތަޞައްވުރު ހިއްސާކުރައްވާފައެވެ. އެގޮތުން މޫސުމީ ބަދަލުތަކާއި ގުޅޭގޮތުން ގުޅިގެން މަސައްކަތް ކުރުމަށް މަޝްވަރާކުރެއްވިއެވެ.
މި ބައްދަލުވުމުގައި ރައީސުލްޖުމްހޫރިއްޔާ ވަނީ ދެ ޤައުމަކީ ޤުދުރަތީ ގޮތުން ތަފާތު ދެ ޤައުމުކަމުގައިވިއަސް، ދެ ޤައުމު ދެމެދު އޮތީ ބަދަހި ގުޅުމެއް ކަމަށް ވިދާޅުވެފައެވެ. އަދި ދެ ޤައުމަށްވެސް މޫސުމަށް އަންނަ ބަދަލުތަކުގެ ސަބަބުން، ދުނިޔެ ހޫނުވެ ގަނޑުފެން ވިރި، ކަނޑުގެ ލޮނުގަނޑު އުފުލުމުގެ ސަބަބުން ގޮންޖެހުންތައް ކުރިމަތިވަމުންދާކަން އެމަނިކުފާނު ފާހަގަކުރެއްވިއެވެ. މިއާއެކު، މޫސުމީ ބަދަލުތަކުން ކުރާ އަސަރު ކުޑަކުރުމަށް ގުޅިގެން މަސައްކަތްކޮށް އަޑު އުފުލުމަށް ވަނީ އެއްބަސްވެވަޑައިގެންފައެވެ.
މި ބައްދަލުވުމުގައި، ބޫޓާންގެ ބޮޑުވަޒީރު ޝެރިންގ ތޮބްގޭ ވަނީ ރައީސުލްޖުމްހޫރިއްޔާ މޫސުމީ ބަދަލުތަކަށް ދެއްވާ ސަމާލުކަމަށް ތަޢުރީފްކުރައްވާފައެވެ. އަދި ބޫޓާނުން މިހާތަނަށް ކޮށްފައިވާ ބައެއް ކަންކަމަށް ބޮޑުވަޒީރު ވަނީ އަލިއަޅުއްވާފައެވެ. އަދި މިފަދަ މައްސަލަތައް ހައްލުކުރުމުގައި މޫސުމީ ބަދަލުތަކަށް ނާޒުކު ޤައުމުތަކުން ގުޅިގެން މަސައްކަތްކޮށް މުއްސަނދި ޤައުމުތަކުން މިހާރަށްވުރެ ވަރުގަދަ ޔަޤީންކަމެއް ހޯދަންޖެހޭކަން ފާހަގަކުރެއްވިއެވެ.
މި ބައްދަލުވުން ނިންމަވާލައްވާފައިވަނީ، ދެ ޤައުމުން މިދާއިރާ ތެރެއިން ކުރަމުންދާ މަސައްކަތްތަކުގެ މައުލޫމާތު ދެ ޤައުމު ދެމެދު ހިއްސާ ކުރުމަށާއި، މިމަސައްކަތް ވަރުގަދަކޮށް ވިލުންވެރިކަން އިތުރުކުމަށް މަސައްކަތް ކުރުމަށް އެއްބަސްވަމުންނެވެ. އަދި ކުރިމަގުގައި ގުޅިގެން މަސައްކަތް ކުރުމަށް އިންވެސްޓްމެންޓް ފުރުސަތުތައް ފަހިކޮށް ގުޅުން ހަރުދަނާ ކުރުމަށްވެސް ދެބޭފުޅުން ވަނީ މަޝްވަރާކުރައްވާފައެވެ.