މި މަހުގެ މިހާތަނަށް 30 ބިދޭސީން އިމިގްރޭޝަންގެ ބެލުމުގެ ދަށަށް

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ދެނެގަތުމަށް ހިންގާ ޚާއްސަ އޮޕަރޭޝަންގެ ދަށުން މި މަހުގެ މިހާތަނަށް 30 ބިދޭސީން އިމިޤްރޭޝަންގެ ބެލުމުގެ ދަށަށް ގެންގޮސްފިއެވެ.

ޤާނޫނާއި ޤަވައިދާ ޚިލާފަށް ރާއްޖޭގައި ދިރިއުޅެމުންދާ ބިދޭސީ ފަރާތްތައް ހޯދާ އެ ފަރާތްތައް ޤަވައިދުގެ ތެރެއަށް ވެއްދުމަށް ގިނަ މަސައްކަތްތަކެއް މޯލްޑިވްސް އިމިޤްރޭޝަނުން ދަނީ ކުރަމުންނެއެވެ. އެގޮތުން ތަފާތުއެކި ރެއިޑްތަކާއި ޕްރޮގްރާމްތައް ކަމާއި ގުޅުން ހުރި އިދާރާތަކާއި ގުޅިގެން ދަނީ ހިންގަމުންނެވެ.

އިމިޤްރޭޝަނުން ކުރިއަށްގެންދާ ރެއިޑްތަކު ތެރެއިން ހުޅުމާލޭގައި އޮކްޓޫބަރު 31 އަދި ނޮވެންބަރު 1 ވަނަ ދުވަހުގައި ވެސް ވަނީ އިންސްޕެކްޝަނެއް ހިންގާފައިއެވެ. އެގޮތުން ބެލި ސަރަހައްދުތަކުގައި ސައްހަ ވިސާއެއް ނެތި ހަރަކާތްތެރިވަމުންދިޔަ 7 ބިދޭސީ ފިރިހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައިއެވެ.

ނޮވެމްބަރު 4 ގައި ކުރިއަށް ގެންދިޔަ ރެއިޑު އޮޕަރޭޝެއްގައި މާލޭގައި ހުންނަ ރެސްޓޯރަންޓެއް ބަލާ ފާސްކޮށް ސައްހަ ވިސާއެއް ނެތި، ގަވާއިދާ ޚިލާފަށް އެތަނުގައި މަސައްކަތް ކުރަމުންދިއަ 5 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ.

މީގެ އިތުރުން މި މަހުގެ 6 ވަނަ ދުވަހު ކުރިއަށް ގެންދިޔަ ރެއިޑު އޮޕަރޭޝަންގައި މާލޭގައި ބިދޭސީން ދިރިއުޅެމުންދިޔަ 2 ތަނެއް ބަލައި ފާސްކޮށް، ސައްހަ ވިސާއެއް ނެތި ގަވާއިދާ ޚިލާފަށް އުޅެމުންދިޔަ 13 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެނެސްފައިއެވެ.

ގަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް މިމަހުގެ 9 ވަނަ ދުވަހު ކުރިއަށް ގެންދިއަ ރެއިޑު އޮޕަރޭޝަންގައި ހުޅުމާލޭގައި ސެލޫން ހިންގަމުންދާ 6 ތަނެއް ބަލައި ފާސްކޮށް، ސައްހަ ވިސާއެއް ނެތި ގަވާއިދާ ޚިލާފަށް އުޅެމުންދިޔަ 5 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ. އިމިގްރޭޝަނުން ވިދާޅުވީ، އެކި ދުވަސްމަތިން ހިންގުނު ރެއިޑްތަކުން ޖުމްލަ 30 ބިދޭސީއަކު މި މަހުގެ މިހާތަނަށް އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.

ބިދޭސީ މަސައްކަތްތެރިންގެ މައްސަލަ ޙައްލުކުރުމަށް ސަރުކާރުން ކުރަމުންދާ މަސައްކަތުގެ ތެރެއިން ޤަވާޢިދާ ޚިލާފަށް އުޅެމުންދާ 5000 ބިދޭސީން އަނބުރާ ފޮނުވާލުމަށް މިއަހަރު ވަނީ އަމާޒު ކަނޑައަޅާފައެވެ. މިގޮތުން، މިހާތަނަށް 4000 އަށްވުރެ ގިނަ ބިދޭސީން އެމީހުންގެ އަމިއްލަ ޤައުމުތަކަށް ފޮނުވާލެވިފައިވާކަމަށް މޯލްޑިވްސް އިމިގްރޭޝަނުން މަޢުލޫމާތުދެއްވައެވެ.

މީގެ ތެރޭގައި ޤަވާޢިދާ ޚިލާފުވުމުގެ ސަބަބުން އިމިގްރޭޝަންގެ ބެލުމުގެ ދަށަށް ގެނެވުނު ފަރާތްތަކާއި، އަމިއްލަ އިޚްތިޔާރުގައި ޤައުމުން ފުރުމަށް އެދުނު ފަރާތްތަކުގެ އިތުރުން އިމިގްރޭޝަނުން ނޯޓިސް ދިނުމަށްފަހު ފުރުވާލެވުނު ފަރާތްތައް ހިމެނެއެވެ.