މެންޗެސްޓަރ ޔުނައިޓެޑްގެ ކޯޗު ކަމާއި ވަގުތީ ގޮތުން ހަވާލުވެ ހުރި ނެދަލޭންޑްސްގެ ރޫޑް ވެންނިސްޓެލްރޫއީ އަށް އަލަށް ކޯޗުގެ ޒިންމާ އާއި ހަވާލުވި ރުބެން އަމޮރިމްގެ ކޯޗިން ސްޓާފުންގެ ތެރެއިން ފުރުސަތު ދީފައިނުވާތީ އޭނާ އެ ކްލަބާއި ދުރަށް ގޮސްފި އެވެ.
މެންޗެސްޓަރ ޔުނައިޓެޑްގެ އެސިސްޓެންޓް ކޯޗު ކަމާއި ނިސްޓެލްރޫއީ ހަވާލުވެފައިވަނީ މިދިޔަ އަހަރުގެ ޖުލައި މަހު ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އަދި އެ ޓީމުގެ ކޯޗު ކަމުގެ މަގާމުގައި ހުރި އެރިކް ޓެންހާގް މަގާމުން ވަކިކުރުމާއިއެކު ވަގުތީ ގޮތުން ކޯޗުގެ ޒިންމާއާއި ހަވާލުވި ނިސްޓެލްރޫއީގެ އިރުޝާދުގެ ދަށުން އެ ޓީމު ހަތަރު މެޗު ކުޅެފައިވާއިރު އެއްވެސް މެޗަކުން ބަލިވެފައެއް ނުވެއެވެ. އެއް މެޗުން އެއްވަރުވެފައިވާޢިރު އަނެއް ހަތަރު މެޗުން އެ ޓީމު ވަނީ މޮޅުވެފަ އެވެ.
މެންޗެސްޓަރ ޔުނައިޓެޑްގެ ކޯޗު ކަމާއި ހަވާލުވި ޕޯޗުގަލްގެ ރުބެން އަމޮރިމް ވަނީ މިދިޔަ ހޯމަ ދުވަހު އިނގިރޭސިވިލާތަށް ގޮސް އޭނާގެ މަސައްކަތް ފަށާފަ އެވެ. އަދި ކޯޗިން ސްޓާފުންގެ ގޮތުގައި ތިބި ފަރާތްތައް މަގާމުން ދުރުކޮށްފައިވާއިރު އެ ކްލަބަށް ކުރިން ކުޅުނު ޑަރެން ފްލެޗަރ އަމޮރިމްގެ ކޯޗިން ސްޓާފުންގެ ތެރޭގައި ހިމެނޭ ކަމަށް މެންޗެސްޓަރ ޔުނައިޓެޑް އިން ވަނީ ބުނެފަ އެވެ.
އުމުރުން 39 އަހަރުގެ ރުބެން އަމޮރިމްގެ އިރުޝާދުގެ ދަށުން މެންޗެސްޓަރ ޔުނައިޓެޑް ކުޅޭ ފުރަތަމަ މެޗަށް އެ ޓީމު ތައްޔާރު ކުރުމަށް އޭނާއަށް 13 ދުވަސް ލިބިގެންދާނެ އެވެ. އަމޮރިމްގެ އިރުޝާދުގެ ދަށުން ޔުނައިޓެޑް ކުޅޭ ފުރަތަމަ މެޗުގައި މިމަހުގެ 24 ވަނަ ދުވަހު ނިކުންނާނީ އިޕްސްވިޗް ޓައުން އާއި ދެކޮޅަށެވެ.
ވަގުތީ ގޮތުން ޔުނައިޓެޑްގެ ކޯޗު ކަމާއި ހަވާލު ވުމަށްފަހު ނިސްޓެލްރޫއީ ވަނީ އެތަކެއް ފަހަރު މަތިން އޭނާ އެ ކްލަބުގައި މަޑުކުރަން ބޭނުންވާ ކަމަށް ބުނެފަ އެވެ.