ޔޫރޮޕާ ލީގުގައި ތުރުކީގެ ބެސިކްޓާސް އާއި ދެކޮޅަށް އިޒްރޭލުގެ މެކަބީ ތެލް އަވީވް ކުޅުމަށް ހަމަޖެހިފައިވާ މެޗު ޔުއެފާއިން ހަންގޭރީ އަށް ބަދަލުކޮށް ސަޕޯޓަރުން ނުވައްދާ މި މެޗު ކުޅުމަށް ނިންމައިފި އެވެ.
މި ނޮވެމްބަރ މަހުގެ 28 ވަނަ ދުވަހު ތުރުކީގައި ކުޅުމަށް ހަމަޖެހިފައިވާ މި މެޗު އެ ގައުމުގައި ކުޅުމަށް ތުރުކީގެ ސަރުކާރުން ވަނީ ދެކޮޅު ހަދާފަ އެވެ. އިޒްރޭލާއި ފަލަސްތީނާގައި ދެމެދު މިހާރު ހިނގަމުންދާ ލާއިންސާނީ ކަންތައްތަކާއި ދެކޮޅަށް ތުރުކީން ވަނީ ފާޅުގައި ފާޑު ކިޔާ އެކަން ކުށްވެރިކޮށްފަ އެވެ.
ތުރުކީގެ ސަރުކާރުން ވަނީ އެ ގައުމުގައި މި މެޗު ކުޅެފިނަމަ މެޗު ކުޅޭ ފަރާތްތަކާއި އަދި ކުޅި ބަލަން ވަންނަ ފަރާތްތަކަށް ސަލާމަތީ ގޮތުން ނުރައްކާ އޮތް ކަމަށް ބުނެފަ އެވެ.
ޔޫރޮޕާ ލީގުގައި މެކަބީ ތެލްއަވީވް އާއި ދެކޮޅަށް ނެދަލޭންޑްސްގެ އަޔަކްސް މިދިޔަ ހަފްތާގައި ކުޅުނު މެޗުގައިވެސް ސަޕޯޓަރުންގެ މެދުގައި ހިނގާދިޔަ ހަމަނުޖެހުންތަކުގައި ފަސް މީހަކަށް ވަނީ އަނިޔާ ވެފައެވެ. މި މެޗުން އަޔަކްސް ވަނީ 5-0 ގެ ނަތީޖާއަކުން މޮޅުވެފަ އެވެ.
ތުރުކީގެ ބެސިކްޓާސް އިން ބުނެފައިވާ ގޮތުގައި މި މެޗު ތުރުކީގައި ކުޅުމަށް ސަލާމަތީ ގޮތުން ނުރައްކާ އޮތް ކަމަށް ތުރުކީގެ ސަރުކާރުން ބުނުމާއި ގުޅިގެން މެޗު ކުޅޭނެ ގައުމެއް ބެލުމަށް ކުރި މަސައްކަތުން މިކަމަށް އެއްބަސްވި ހަމައެކަނި ގައުމަކީ ހަންގޭރީ އެވެ.