ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ބޭއްވި ތިލައުތުރު ފުޓްސަލް މުބާރާތް 2024 ގެ ޗެމްޕިއަންކަން އިހަވަންދޫން ހޯދައިފިއެވެ.
ކެލާގައި ބޭއްވި މި މުބާރާތުގައި ހއ. އަތޮޅުގެ 10 ޓީމެއް ވަނީ ވާދަކޮށްފައެވެ. މި މުބާރާތުގެ ޗެމްޕިއަންކަން އިހަވަންދޫން ހޯދީ މިއަދު ހަވީރު ކުޅުނު ފައިނަލް މެޗުގައި 1-0 ގެ ނަތީޖާއަކުން އުތީމު ބަލިކުރުމަށްފަހުއެވެ.
ކެލާ ފުޓްސަލް ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ ވަރަށް ކުރީކޮޅު އިހަވަންދުއަށް ކާމިޔާބުކޮށްދިނީ އިބްރާހީމް ހާމިދެވެ. އޭގެ ފަހުން މި މެޗުގައި ދެ ޓީމަށްވެސް ވަނީ ލަނޑު ޖަހާނެ ރަނގަޅު ގިނަ ފުރުސަތުތަކެއް ލިބި ބޭކާރުވެފައެވެ.
މި މުބާރާތުގެ ޗެމްޕިއަންކަން އިހަވަންދޫން ހޯދިއިރު، މުބާރާތުގެ އެންމެ މޮޅު ކޯޗަކީ އެ ޓީމުގެ ކޯޗު ނޫޝާން އަބްދުލް ރައްޒާގެވެ. މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ އުތީމުގެ ކެޕްޓަން މުޙައްމަދު މަޒީނެވެ.
މަޒީނުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ އިހަވަންދޫގެ ހާމިދާއި، ކެޕްޓަން މުޙައްމަދު މަދީހުގެ އިތުރުން ބާރަށުގެ މުޙައްމަދު ޝަމާއިލް އަދި މުޙައްމަދު ޒަޔާނެވެ. މި މުބާރާތުގެ "ކިންގް އޮފް ދަ ޓޯނަމެންޓް" ގެ މަގާމު ހޯދީ އިހަވަންދޫގެ މަދީހެވެ. މީގެ އިތުރުން މި މުބާރާތުގެ ފެއާޕްލޭ ޓީމަކީވެސް އިހަވަންދުއެވެ.
މި މުބާރާތުގެ ޗެމްޕިއަން ޓީމަށް 30،000 (ތިރީސް ހާސް) ރުފިޔާގެ ފައިސާގެ އިނާމެއް ދިންއިރު، ރަނަރަޕް ޓީމަށް ވަނީ 15،000 (ފަނަރަ ހާސް) ރުފިޔާގެ ފައިސާގެ އިނާމެއް ދީފައެވެ. އަދި ފެއާޕްލޭ ޓީމަށް ވަނީ 10،000 (ދިހަ ހާސް) ރުފިޔާގެ ފައިސާގެ އިނާމެއް ދީފައެވެ.