"ރާއްޖޭގެ ވެރިކަމުގެ ނިޒާމު ބަދަލުވީ އާދަޔާ ޚިލާފުގޮތަކަށް"

ރާއްޖޭގައި ރަސްކަމުން ޖުމްހޫރިއްޔަތަކަށް ބަދަލުވެފައިވަނީ ވަރަށް އާދަޔާ ޚިލާފުގޮތަކަށްކަމަށް ދިވެހި ދައުލަތަށް ގިނަ ދުވަހު ޚިދުމަތް ކުރައްވާފައިވާ، ނިޝާން ޢިއްޒުއްދީން ޢިއްޒަތުގެ ވެރިޔާ ޢައްބާސް އިބްރާހީމް ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބަތުގައި ޕީއެސްއެމް ނިއުސްއިން ގެނެސްދިން "ދިވެހީންގެ ޖުމްހޫރިއްޔާ"ގެ ކަވަރޭޖްގައި ވާހަކަފުޅު ދައްކަވަމުން ނ.ޢ.ޢ.ވ ޢައްބާސް އިބްރާހީމްވަނީ ރާއްޖޭގެ ޖުމްހޫރިއްޔާގެ އެކި ދުވަސްވަރަށް އަލިއަޅުއްވާލައްވާފައެވެ.

"ދިވެހީންގެ ޖުމްހޫރިއްޔާ" ކަވަރޭޖްގައި ވާހަކަފުޅުދައްކަވަމުން ނިޝާން ޢިއްޒުއްދީން ޢިއްޒަތުގެ ވެރިޔާ ޢައްބާސް އިބްރާހީމް ވިދާޅުވީ ދުނިޔޭގެ އެހެން ޤައުމުތަކުގައި ވެރިކަމުގެ ނިޒާމު ބަދަލުކުރަނީ އެކަމަށް އެޤައުމެއްގެ ރައްޔިތުން ބޭނުންވެގެންކަމަށެވެ. އެހެންނަމަވެސް ރާއްޖޭގެ ވެރިކަމުގެ ނިޒާމު އެންމެ ފުރަތަމަ ރަސްކަމުން ޖުމްހޫރިއްޔާއަކަށް ބަދަލުކުރީ، ސުއްމުވުލް އަމީރު މުޙައްމަދު އަމީން ދޮށިމޭނާކިލެގެފާނު ވެރިކަމަށް ގެންނަން ރައްޔިތުން ބޭނުންވެގެންކަމަށެވެ. އަދި ރަސްކަމުގެ ނިޒާމުގައި ވެރިއަކަށް ވަޑައިގަންނަވަން މުޙައްމަދު އަމީން ބޭނުންފުޅު ނުވުމަކީ އެޖުމްހޫރިއްޔާ އުފެދެން ދިމާވި މައިގަނޑު އެއް ސަބަބުކަމަށް ޢައްބާސް ވިދާޅުވިއެވެ.

ހަމައެއާއެކު އެދުވަސްވަރަކީ އަވައްޓެރި އިންޑިއާ އިނގިރޭސިންގެ އަޅުވެތިކަމުން މިނިވަންވެގެން އައި ދުވަސްވަރުކަން ޢައްބާސް ފާހަގަކުރެއްވިއެވެ. ހަމައެއާއެކު ރާއްޖެ ޖުމްހޫރީ ނިޒާމަކަށް ބަދަލުވުމުން އިނގިރޭސިންގެ ހުރިހާ ބާރަކުންވެސް ދިވެހީން މިނިވަންވާނެކަމަށް ޤަބޫލުކުރެވުމަކީވެސް ރާއްޖެ ޖުމްހޫރީ ވެރިކަމަށް ދާން ނިންމި ސަބަބެއްކަމަށް ޢައްބާސް ވިދާޅުވިއެވެ. އެހެންނަމަވެސް މަދު ދުވަސްކޮޅެއްގެ ތެރޭގައި އެނިޒާމު ބަދަލުވެ އަލުން ރަސްކަމުގެ ނިޒާކަމަށް ދާން ޖެހުނު ސަބަބުތައްވެސް ނ.ޢ.ޢ.ވ ޢާއްބާސް އިބްރާހީމް ވިދާޅުވިއެވެ.

"ދިވެހީން އޭރު އޮތީ ޖުމްހޫރިއްޔަތަކަށް ތައްޔާރަކަށް ނޫން، ހަމައެއާއެކު ރައްޔިތުންނަށް ދަތިވާ ކަހަލަ ބައެއް ޤާނޫނުތައް ހެއްދެވުމަކީވެސް ދިމާވި ސަބަބެއް. އެގޮތުން ދުންފަތް އެތެރެކުރުން މަނާކުރުމާއި، އިސްލާމީ ޝަރީޢަތް ތަންފީޒުކުރެއްވުމަށް ވައްކަންކުރާ މީހުންގެ އަތްކެނޑުމާއި މަރުގެ އަދަބު ތަންފީޒުކުރަން ފެށުން. މީގެއިތުރުން ވެރިކަމުގެ ބާރުގައި ޢާއިލީ ވާދަވެރިކަންވެސް މީގެތެރޭގައި ހިމެނިފައި އޮތީ. އޭރުގެ ދިވެހީންނަށް ޖުމްހޫރިއްޔަތުގެ ޙަގީގީ މާނަ އިޙްސާސް ނުކުރެވޭ." ޢައްބާސް ވިދާޅުވިއެވެ.

ނ.ޢ.ޢ.ވ ޢައްބާސް އިބްރާހީމް ވިދާޅުވީ ރާއްޖޭގެ ވެރިކަމުގެ ނިޒާމު ބަދަލުވީ ބޭރުގެވެސް އަދި އެތެރޭގެވެސް އެއްވެސް ބައެއްގެ ނުފޫޒަކުން ނޫންކަން އެނގެން އޮތްކަމަށެވެ. ރާއްޖޭގެ ދެވަނަ ޖުމްހޫރިއްޔާ އުފެދިގެން އައީ އޭރު ބޮޑު ވަޒީރުކަމުގެ މަޤާމުގައި ހުންނެވި ނިޝާން ޣާޒީގެ ޢިއްޒަތުގެ ވެރިޔާ ސުއްމުވުލް އަމީރު އިބްރާހީމް ނާސިރު ރަންނަބަނޑޭ ރިކިލެގެފާނު އޭރު އޮތް މަޖިލީހަށް ހުށައެޅުއްވި ހުށައެޅުއްވުމަކާއެކުގައިކަމަށް ޢައްބާސް ވިދާޅުވިއެވެ.

ޖުމްހޫރީ ވެރިކަމުގެ ދިގު ތާރީޚުގައި ކޮންމެ ވެރިކަމެއްގައިވެސް ޤައުމަށް ރަނގަޅު އެތައް ބަދަލެއް އައިކަން ޢައްބާސް ފާހަގަކުރެއްވިއެވެ. އަދި ޖުމްހޫރިއްޔާތެއްގައި އެންމެ ބޮޑު ޒިންމާއެއް އޮތް ބަޔަކީ ރައްޔިތުންކަމަށް ވިދާޅުވިއެވެ. އެގޮތުން ވެރިކަމަށް އަންނަނީވެސް އަދި ރައްޔިތުންގެ މަޖިލީހަށް މީހުން ހޮވަނީވެސް ސީދާ ރައްޔިތުންކަން ފާހަގަކުރައްވާ ޢައްބާސް ވިދާޅުވީ، އަމިއްލަ އެދުންތައް ދޫކޮށް ޤައުމީ ވިސްނުން އިސްކުރަން ފެށުމުން އޭގެ ފައިދާ ސީދާ ލިބިގެންދާނީ ރައްޔިތުންނަށްކަމަށެވެ. އަދި ރައްޔިތުންގެ ތެރޭގައި ބައިބައިވުން އުފެދި، އަމިއްލަ އެދުން އިސްކުރުމުން ވެރިކަމަށް އަންނަ މީހަކުވެސް އެމީހެއްގެ ޒިންމާއިން އެއްކިބާވެ ތަފާތު ގޮތްގޮތަށް އުޅުމުގެ ފުރުސަތު ލިބޭނެކަން ނިޝާން ޢިއްޒުއްދީން ޢިއްޒަތުގެ ވެރިޔާ ޢާއްބާސް އިބްރާހީމް ފާހަގަކުރެއްވިއެވެ.