ޤައުމިއްޔަތު ބިނާކުރުމަށް ރައީސް ފައްޓަވާފައިވަނީ ބިނާކުރަނިވި މުހިއްމު މަސައްކަތްޕުޅެއް: ވަޒީރު އާދަމް ނަޞީރު
-
މި މަސައްކަތް އެންމެ އެދެވޭގޮތުގައި ކުރެވިފައެއް ނެތް
-
މި ސަރުކާރުން ވަނީ މި މަސައްކަތް ފައްޓަވާފައި
ޤައުމިއްޔަތު ބިނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ފައްޓަވާފައިވާ މަސައްކަތަކީ އިންސާނީ ސިކުނޑި ދިވެހިރާއްޖެއާއި އެއްކޮޅަށް ބިނާކުރެއްވުމަށް ފައްޓަވާފައިވާ މަސައްކަތެއްކަމަށް ދިވެހި ބަހާއި ސަޤާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ، ޖުމްހޫރީ ދުވަހުގެ މުނާސަބަތުގައި ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައެވެ.
ދިވެހި ބަހާއި ސަޤާފަތާއި ތަރިކައާއި ބެހޭ ވަޒީރު އާދަމް ނަސީރު އިބްރާހިމް ވިދާޅުވީ، ދިވެހި ތާރީޚު މިއަދާއި ހަމައަށް ފޯރުކޮށްދިނުމަށް ގިނަ މަސައްކަތްތަކެއް ކުރެވިފައި ހުރިނަމަވެސް އެކަން ޤައުމީ ފެންވަރުގައި ކުރަންވީ މިންވަރަށް ކުރެވިފައި ނެތްކަން ވަޒީރު ފާހަގަކުރެއްވިއެވެ. ޤައުމެއްގެ އަސްލުތަކާއި ޤައުމެއްގެ ތާރީޚާއި ޤައުމެއް ދެމިއޮންނަ ގޮތަށް ޒަމާނީ އިލްމީ ގޮތްތަށް އެކަން ކުރެވިފައިނެތްކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ، ސަރުކާރުން އެ މަސައްކަތް ފައްޓަވައިގެން ކުރިއަށްގެންދަވަން ފަށާފައިވާކަމަށާއި މިއީ ޤައުމަކަށް ކޮންމެހެން ބޭނުންޖެހިފައިވާ މަސައްކަތެއްކަމަށް ވަޒީރު ވިދާޅުވިއެވެ.
"ޚާއްސަކޮށް ރައީސް ޑރ.މުޙައްމަދު މުއިއްޒު މިހާރު ފައްޓަވާފައިވާ މަސައްކަތްޕުޅުތައް ފައްޓަވާފައި އެހުރީ ކޮންމެ ދާއިރާއަކުން ބެލިއަސް. އަސްކަރީ ދާއިރާއިންވެސް މީހުން ބިނާކުރައްވަނީ، ފުލުހުންގެ ދާއިރާއިންވެސް މީހުން ބިނާކުރައްވަނީ އިންސާނީ ސިކުނޑި ދިވެހިރާއްޖެއާއި އެއްކޮޅަށް ބިނާކުރެއްވުމަށްޓަކައި" ވަޒީރު ވިދާޅުވިއެވެ.
ވަޒީރު ވިދާޅުވީ، ބިނާކުރަނިވި ފާޑުކިޔުމާއި ފަނާކުރަނިވި އާޑަކިޔުން އެއީ މުޅިން 2 ކަމެއްކަމަށެވެ. ޤައުމަކަށް އަދި ރައްޔިތުންނަށް ފައިދާ ބޮޑީ ބިނާކުރަނިވި ފާޑުކިޔުމުގައިކަމަށް ވަޒީރު ވިދާޅުވިއެވެ.