ކުރިއަށް އޮތް އިންޓަރނޭޝަނަލް ބްރޭކްގައި އިންގްލެންޑުން ކުޅުމަށް ހަމަޖެހިފައިވާ މެޗުތަކަށް އާސެނަލްގެ ދެ ކުޅުންތެރިން ކަމަށްވާ، ބުކާޔޯ ސަކާ އާއި ޑެކްލަން ރައިސް ފިޓްވާނެ ކަމުގެ ޔަގީންކަމެއް ނެތް ކަމަށް އެ ޓީމުގެ ކޯޗު، މިކޭލް އާޓެޓާ ބުނެފިއެވެ.
އާސެނަލްގެ ކޯޗު، އާޓޭޓާ މިހެން ބުނީ، ޗެލްސީއާ ދެކޮޅަށް 1-1 އިން އާސެނަލް އެއްވަރުވި މެޗަށްފަހު ބޭއްވި ނޫސްވެރިންގެ ބައްދަލުވުމުގައެވެ.
ޗެލްސީގެ ދަނޑުގައި ރޭ ކުޅުނު މެޗުގައި ސަކާގެ އިތުރުން ރައިސް ވެސް ވަނީ އަނިޔާގެ ސަބަބުން ބަދަލުކޮށްފައެވެ. ރޭގެ މެޗަށް ނިކުތްއިރު ވެސް އަނިޔާގެ މައްސަލަތަކެއް ކުރިމަތިވެފައިވާ ރައިސް އަށް އާސެނަލް އެންމެ ފަހުން ޔުއެފާ ޗެމްޕިއަންސް ލީގުގައި އިންޓަ މިލާނާ ދެކޮޅަށް ކުޅުނު މެޗު ވަނީ ގެއްލިފައެވެ.
އާޓޭޓާ ބުނީ، މި ފެންނަނީ ދެކެން ބޭނުންވާފަދަ މަންޒަރެއް ނޫން ކަމަށާއި، އެހާ މުހިންމު ދެ ކުޅުންތެރިއަކަށް ކުޅުން އިތުރަށް ކުރިއަށްނުގެންދެވިގެން ބަދަލުކުރަންޖެހުމަކީ އެއްގޮތަކަށްވެސް ރަނގަޅު ހަބަރެއް ނޫން ކަމަށެވެ.
އެ ދެ ކުޅުންތެރިން ހޯމަ ދުވަހު އިނގިރޭސި ގައުމީ ޓީމާ ގުޅިދާނެތޯ ސުވާލުކުރުމުން، އާޓޭޓާ ބުނީ، "އެ ދެ ކުޅުންތެރިން ފިޓުވާނެކަމަށް ޔަގީންކަމެއް ނެތް. އެއީ އެ ދެ ކުޅުންތެރިން ފިޓްކޮށް ހުރިނަމަ، މެޗު ފުރިހަމަނުކޮށް ނުފައިބާނެ." ކަމަށެވެ.
މިދިޔަ ދެ ސީޒަނުގައި ޕްރިމިއާ ލީގުގެ ތަށްޓަށް ވާދަކޮށް، ނާކާމިޔާބުވެ ދެވަނަ މަގާމު ލިބުނު އާސެނަލް މިވަގުތު އޮތީ ލީގުގެ ހަތަރުވަނައިގައެވެ. ކުރިއަށް އޮތް އިންޓަރނޭޝަނަލް ބްރޭކަށްފަހު އަލުން ލީގުގެ ކުޅުން ފަށާއިރު އެ ޓީމުން އަމިއްލަ ދަނޑުގައި ނިކުންނާނީ ނޮޓިންގހަމް ފޮރެސްޓާ ދެކޮޅަށް ކުޅޭ މެޗުންނެވެ.
އިންގްލެންޑަށް ކުރިއަށް އޮތީ ނޭޝަންސް ލީގުގައި އަންނަ ހުކުރު ދުވަހު ރަށުން ބޭރުގައި ގްރީސް އާއި ދެކޮޅަށް ކުޅޭ މެޗާއި، އޭގެ ތިން ދުވަސް ފަހުން ވެމްބްލީ ސްޓޭޑިއަމްގައި ރިޕަބްލިކް އޮފް އަޔަލެންޑާ ދެކޮޅަށް ކުޅެން ޖެހޭ މެޗެވެ.
މިހާތަނަށް ކުޅުނު މެޗުތަކަށްފަހު ލީގު ބީ ދޭއްގައި އެ ޓީމު އޮތީ ނުވަ ޕޮއިންޓާއެކު ދެވަނައިގައެވެ. މި ގްރޫޕުގެ އެއްވަނައިގައި ގްރީސް އުޅެނީ ހަތަރު މެޗުން ސައްތައިން ސައްތައިގެ ރެކޯޑަކާއެކު އެވެ.