އިނގިރޭސި ޕްރިމިއާ ލީގުގައި ލެސްޓަރ ސިޓީ އާއި ދެކޮޅަށް މެންޗެސްޓަރ ޔުނައިޓެޑް ރޭ ކުޅުނު މެޗު 3-0 ގެ ނަތީޖާއަކުން މެންޗެސްޓަރ ޔުނައިޓެޑް ކާމިޔާބުކޮށްފި އެވެ.
އޯލްޑް ޓްރެފަޑްގައި ކުޅުނު މި މެޗަކީ ޔުނައިޓެޑްގެ ވަގުތޯ ކޯޗެއްގެ ގޮތުގައި ރޫޑް ވެންނިސްޓެލްރޫއީ މަސައްކަތް ކުރާނެ ފަހު މެޗެވެ. އަދި މިއަދު އެ ޓީމުގެ ދާއިމީ ކޯޗުގެ ގޮތުގައި ހަމަޖައްސާފައިވަނީ ޕޯޗުގަލްގެ ރުބެން އަމޮރިމް ޓީމާއި ހަވާލުވާނެ އެވެ. ނިސްޓެލްރޫއީގެ އިރުޝާދުގެ ދަށުން މެންޗެސްޓަރ ޔުނައިޓެޑް ހަތަރު މެޗު ކުޅެފައިވާއިރު އެއްވެސް މެޗަކުން އެ ޓީމު ބަލިވެފައެއް ނުވެއެވެ.
މި މެޗުން މެންޗެސްޓަރ ޔުނައިޓެޑް މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 11 މެޗުން 15 ޕޮއިންޓާއެކު ތާވަލުގެ 13 ވަނަ އަށް އަރާފަ އެވެ. ލެސްޓަރ ސިޓީ އޮތީ ތާވަލުގެ 15 ވަނައިގަ އެވެ.
ފޯރިގަދަ ކުޅުމެއް ފެނިގެން ގޮސްފައިވާ މި މެޗުގެ 17 ވަނަ މިނިޓުގައި މެންޗެސްޓަރ ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މިއީ ބްރޫނޯ ފެނާންޑޭޒް މެންޗެސްޓަރ ޔުނައިޓެޑަށް ކުޅުނު 250 ވަނަ މެޗެވެ.
މެންޗެސްޓަރ ޔުނައިޓެޑް އިން މި މެޗުގައި ޖެހި ދެވަނަ ލަނޑަކީވެސް މެޗުގެ 38 ވަނަ މިނިޓުގައި ބްރޫނޯ ފެނާންޑޭޒް ގޯލަށް ފޮނުވާލާފައިވާ ބޯޅައެކެވެ. ނަމަވެސް އެ ބޯޅަ ލެސްޓަރ ގެ ވިކްޓަރ ކްރިސްޓިއަންސެންގެ ގައިގައި ޖެހިފައިވާތީ އެ ގޯލަކީ އޭނާ އަތުން ބައިކޮޅަށް ވަދެފައިވާ ގޯލެއްގެ ގޮތުގައި ވަނީ ނިންމާފަ އެވެ.
މި މެޗުގައި މެންޗެސްޓަރ ޔުނައިޓެޑް އިން ޖެހި ތިންވަނަ ލަނޑަކީ މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައިވަނިކޮށް އަލެހަންދްރޯ ގަރްނާޗޯ ކާމިޔާބުކޮށްދީފައިވާ ލަނޑެކެވެ.
މެންޗެސްޓަރ ޔުނައިޓެޑްގެ ކޯޗު ކަމާއި އަމޮރިމް ހަވާލުވާއިރު އޭނާއާއިއެކު ކޯޗުންގެ ގޮތުގައި މަސައްކަތް ކުރާނެ ބައެއް އަދި ރަސްމީކޮށް ހާމަކޮށްފައެއް ނުވެއެވެ. އެހެންކަމުން ނިސްޓެލްރޫއީ އެ ކްލަބުގައި ދެން ހުންނާނެ ތޯ ބައެއް ފަރާތްތަކުންވަނީ ސުވާލު އުފައްދާފަ އެވެ.
ގައުމީ ޓީމުގެ ތަކުގެ މެޗުތަކަށް ޕްރިމިއާ ލީގުގެ ކުޅުން މެދު ކަނޑާލުމަށްފަހު އަލުން ދެން ލީގުގެ ކުޅުން ފަށާނީ ނޮވެމްބަރ މަހުގެ ފަހު ހަފްތާގަ އެވެ.