އޭއައި ބޭނުންކޮށްގެން ބީއެމްއެލްގެ ޚިދުމަތްތަކަށް ޒަމާނީ ކުރިއެރުންތަކެއް

ބީއެމްއެލްގެ ޚިދުމަތްތަކަށް އަންނަ އަަހަރުތެރޭ ޒަމާނީ ބަދަލުތަކެއް ގެނައުމަށް މަސައްކަތް ކުރަމުންދާ ކަމަށް ބޭންކް އޮފް މޯލްޑިވްސްގެ ފުރަތަމަ ދިވެހި ސީއީއޯ މުހައްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވެފައިވަނީ މުޅި ރާއްޖެއަށް ބީއެމްއެލް އޭޓީއެމް ޚިދުމަތް ފުޅާކުރުމާއި ގުޅޭގޮތުން ރައީސުލްޖުމްހޫރިއްޔާ އޮފީހުގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މިރަސްމިއްޔާތުގައި ވާހަކަ ދައްކަވަމުން ޝަރީފް ވަނީ ބޭންކުގެ ޚިދުމަތްތައް ފުޅާކުރުމުގެ މަސައްކަތް ކުރައްވާނެ ގޮތުގެ ތަފްސީލް ހާމަކުރައްވާފައެވެ. ދާދި ފަހުން މަގާމާ ހަވާލުވެވެވަޑައިގެންނެވި ސީއީއޯ ވަނީ އަންނަ އަހަރުގެ ނިޔަލަށް އޭޓީއެމް ޚިދުމަތް މުޅި ރާއްޖެއަށް ފުޅާވާނެ ކަމަށް ވިދާޅުވެފައެވެ. އެގޮތުން މިހާރު ހުރި އޭޓީއެމްތަކުގެ އިތުރަށް 103 އޭޓީއެމް އަންނަ އަހަރު ބަހައްޓާނެ ކަމަށް އޭނާ ވިދާޅުވިއެވެ. މިއާއެކު 2025 ގެ ނިޔަލަށް މުޅި ރާއްޖޭގައި ހުރި ބީއެމްއެލްގެ އޭޓީއެމްތަކުގެ އަދަދު 250 އަށްވުރެ ގިނަ ވާނެ ކަމަށް ވިދާޅުވިއެވެ.

ޝަރީފް ވިދާޅުވީ، ބޭންކަށް 42 އަހަރު ފުރޭއިރު ބައިނަލްއަޤްވާމީ ފެންވަރުގައި މާލީ ހައްލުތައް ފޯރުކޮށްދިނުމުގައި ފާހަގަކޮށްލެވޭ ކުރިއެރުންތަކެއް ހޯދާފައިވާ ކަމަށެވެ. އެގޮތުން ބައިނަލްއަޤްވާމީ ޕޭމެންޓް ނިޒާމުތަކާއި ގުޅުން ބަދަހިކޮށް ކަސްޓަމަރުންނަށް ދުނިޔޭގެ ކޮންމެ ހިސާބެއްގައި ތިބެގެންވެސް ފައިސާގެ މުއާމަލާތް ކުރެވޭނެ މަގު ތަނަވަސްކޮށްދެވިފައިވާ ކަމަށެވެ.

މީގެ އިތުރުން މަޤްބޫލު ޑިޖިޓަލް ވޮލެޓްތައް މެދުވެރިކޮށް ބީއެމްއެލް ކާޑުން ފައިސާ ދެއްކޭއިރު، މިހާރު 7000 އަށްވުރެ ގިނަ ވިޔަފާރި ބޭންކާއެކު މަސައްކަތް ކުރަމުންދާ ކަމަށް ޝަރީފް ވިދާޅުވިއެވެ.

މިއާއެކު އަންނަ އަހަރު ބޭންކުގެ ޑިޖިޓަލް ޚިދުމަތްތައް ފުރިހަމަ ކުރުމަށް ގިނަ މަސައްކަތްތަކެއް ކުރެވޭނެކަން ޝަރީފް ހާމަކުރެއްވިއެވެ. އެގޮތުން ފައިނޭންޝަލް ބޭންކިންއަށް އަންނަ ޒަމާނީ ބަދަލުތަކާ އެއްގޮތަށް މޯބައިލް ބޭންކިން އެޕް އަދި ބީއެމްއެލް ޕޭމެންޓް ގޭޓްވޭއަށް ޒަމާނީ ބަދަލުތަކެއް އާންނާނެ ކަމަށް އޭނާ ވިދާޅުވިއެވެ.

"މީގެ ތެރޭގައި މޯބައިލް ބޭންކިން އެޕް، ބީއެމްއެލް ޕޭމެންޓް ގޭޓްވޭ ޚިދުމަތަށް ފައިނޭންޝަލް ޓެކްނޮލޮޖީއަށް އަންނަ ބަދަލުތަކާއި އެއްގޮތްވާގޮތުގެ މަތިން، އިތުރު ޑިޖިޓަލް ޚިދުމަތްތައް ތަޢާރަފް ކުރުން ހިމެނޭ. އަދި އޭއައި އާއި ރޮބޮޓިކް ޕްރޮސެސް އޮޓޮމޭޝަން ބޭނުންކޮށްގެން މަސައްކަތް ހަލުވިކުރުމާއެކު ކަސްޓަމަރުންނަށް ދެވޭ ޚިދުމަތުގެ ފެންވަރު ރަނގަޅު ކުރުމުގެ މަސައްކަތް ހިމެނޭ. އެންމެ އުފާ ކުރަނީ މި ހުރިހާ ކުރިއެރުމަކަށް އިސްލާމިކް ބޭންކިން ޚިދުމަށް ލިބޭތީ" ޝަރީފް ވިދާޅުވިއެވެ.

ބޭންކް އޮފް މޯލްޑިވްސް އިން ދެމުންދާ ޚިދުމަތްތައް ހަރުދަނާކޮށް ޑިޖިޓަލައިޒް ކުރުމުގެ މަސައްކަތް ބޭންކުން ކުރަމުންދާއިރު، މިދިޔަ އަހަރު ބޭންކުން ވަނީ ބޭންކުގެ ކަސްޓަމަރުންނަށް އެހީވުމަށް އޭއައި އެސިސްޓެންޓް، "އާޔާ"ވެސް ތަޢާރަފްކޮށްފައެވެ. ދިވެހި ބަހުންނާއި އިނގިރޭސި ބަހުން މުއާމަލާތް ކުރެވޭގޮތަށް ފަރުމާކޮށްފައިވާ އޭއައި އެސިސްޓެންޓް، ކަސްޓަމަރުން ކުރާ ސުވާލުތަކަށް ވަގުތުން ޖަވާބުދީ ކަސްޓަމަރު ބޭނުންވާނަމަ ކަސްޓަމަރ ސަރވިސް އޭޖަންޓަކަށްވެސް ޗެޓް ޓްރާންސްފަރ ކޮށްލެވެއެވެ.

ބީއެމްއެލްއިން ވިދާޅުވީ އެކުންފުނިން އަބަދުވެސް ކަސްޓަމަރުންނަށް ދެމުންދާ ޚިދުމަތްތައް އިތުރަށް ފުރިހަމަ ކުރުމަށް މަސައްކަތް ކުރަމުންދާ ކަމަށެވެ.