އިނގިރޭސި ޕްރިމިއާ ލީގުގައި އެސްޓަން ވިލާ އާއި ދެކޮޅަށް ލިވަޕޫލް ކުޅުނު މެޗު 2-0 ގެ ނަތީޖާއަކުން ލިވަޕޫލް ކާމިޔާބުކޮށް ޕްރިމިއާ ލީގުގެ ތާވަލުގެ އެއްވަނައިގައި ފަސް ޕޮއިންޓްގެ ލީޑެއް ހޯދައިފި އެވެ.
މި މެޗުން މޮޅުވުމާއިއެކު ލިވަޕޫލް އަށް ވަނީ ލީގުގައި މިހާތަނަށް ކުޅުނު 11 މެޗުން 28 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ދެވަނައިގައި އޮތް މެންޗެސްޓަރ ސިޓީ އަށް 11 މެޗުން ލިބިފައިވަނީ 23 ޕޮއިންޓެވެ. ތިންވަނަ އަދި ހަތަރުވަނައިގައި އޮތް ނޮޓީންހަމް އާއި ބްރައިޓަން އަށް ލިބިފައިވަނީ 19 ޕޮއިންޓެވެ.
ލިވަޕޫލްގެ އެންފީލްޑް ގައި ކުޅުނު މި މެޗު ފެށިއިރުވެސް ސިޓީ ކުޅުނު މެޗުން ބަލިވެފައިވާތީ ލިވަޕޫލް އަށް އޮތީ ހިތްހަމެޖެހުމެއް ލިބިފަ އެވެ.
ލިވަޕޫލް އިން ވަނީ މި މެޗުގެ 20 ވަނަ މިނިޓުގައި ލަނޑެއް ޖަހާ ލީޑު ނަގާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ޑާވިން ނޫނޭޒް އެވެ. މިއީ މި ސީޒަނުގެ ޕްރިމިއާ ލީގުގައި އޭނާ ޖެހި ދެވަނަ ލަނޑެވެ.
ލިވަޕޫލް އިން ލަނޑު ޖަހާ ކުރި ހޯދި ނަމަވެސް އެސްޓަން ވިލާ އިން ވަނީ މަދުން ނަމަވެސް ލިވަޕޫލްގެ ގޯލަށް ނުރައްކާތެރި ހަމަލަތަކެއް ފޮނުވާލާފަ އެވެ. އެގޮތުން އެ ޓީމުގެ އަމަދޫ އޮނާނާ އާއި ޑިއެގޯ ކާލޯސް ފުރަތަމަ ހާފުގެ ކުޅުން ނިމުމުގެ ކުރިން ފޮނުވާލި ދެ ހަމަލާ ފާހަގަ ކޮށްލެވެ އެވެ.
މި މެޗުގައި ލިވަޕޫލް އިން ޖެހި ދެވަނަ ލަނޑު މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައިވަނިކޮށް އެ ޓީމަށް ކާމިޔާބު ކޮށްދީފައިވަނީ މުހައްމަދު ސަލާ އެވެ. މި ލަނޑާއެކު ސަލާ ވަނީ އޭނާ އެންމެ ފަހުން ލީގުގައި ކުޅުނު ހަތަރު މެޗުގައިވެސް ލަނޑު ޖަހާފަ އެވެ.
ލިވަޕޫލް ގެ ކޯޗުކަމާއި މި ސީޒަނުގައި އަލަށް ހަވާލުވި ސްލޮޓުގެ އިރުޝާދުގެ ދަށުން ލިވަޕޫލް މިހާތަނަށް ކުޅުނު 17 މެޗުގެ ތެރެއިން 15 މެޗުން މޮޅުވެފައިވާއިރު ލީގުގައި ކުޅުނު 11 މެޗުގެ ތެރެއިން 9 މެޗުން ވަނީ މޮޅުވެފަ އެވެ.