ސައުދީ އަރަބިއްޔާގައި ނިމިގެންދިޔަ ޑަބްލިއުޓީއޭ ފައިނަލްގެ ޗެމްޕިއަންކަން އެމެރިކާގެ ކޮކޯ ގައުފް ކާމިޔާބުކޮށްފި އެވެ.
މި މުބާރާތް ގައުފު ކާމިޔާބުކުރުމާއެކު އޭނާ ވެފައިވަނީ 2004 ވަނަ އަހަރު ރަޝިޔާގެ މާރިޔާ ޝަރަޕޯވާ އަށްފަހު މި މުބާރާތް ކާމިޔާބުކުރި އެންމެ ޒުވާން ކުޅުންތެރިޔާއަށެވެ. އަދި މީގެ 10 އަހަރު ކުރިން އެމެރިކާގެ ސެރީނާ ވިލިއަމްސް މި އަށްފަހު މި މުބާރާތް ކާމިޔާބުކުރި އެމެރިކާގެ ފުރަތަމަ ކުޅުންތެރިއަކީވެސް ގައުފު އެވެ.
ޗައިނާއަށް އޮލިމްޕިކްސް ގައި ރަން މެޑަލް ހޯދައިދީފައިވާ ޒެން ކިންވެން އާއި ދެކޮޅަށް ކުޅުނު ފައިނަލް މެޗު ގައުފު ކާމިޔާބުކޮށްފައިވަނީ ވާދަވެރި ކުޅުމަކަށްފަހު ތިނެއް ހައެއް, ހައެއް ހަތަރެއް އަދި ހަތެއް ހައެއްގެ ނަތީޖާއަކުންނެވެ. ޖުމްލަ ތިން ގަޑިއިރު ހޭދަވެގެން ގޮސްފައިވާ މި މެޗުގެ ފުރަތަމަ ސެޓު ޒެން ކާމިޔާބުކުރި ނަމަވެސް ފަހު ދެ ސެޓު ގައުފު ވަނީ ކާމިޔާބުކޮށްފަ އެވެ.
ސައުދި އަރަބިއްޔާގައި ބޭއްވި ފުރަތަމަ އަންހެން ޓެނިސް މުބާރާތަށް ފަހު ޗެމްޕިއަންކަން ހޯދި ގައުފު ބުނެފައިވަނީ މިއީ ވަރަށް ވަރުގަދަ ފައިނަލް މެޗެއް ކަމަށާއި އިދިކޮޅަށް ނިކުތް ކިންވެން ގެ ފަރާތުން މޮޅު ކުޅުމެއް ފެނިގެން ގޮސްފައިވާ ކަމަށެވެ.
މި މުބާރާތް ކާމިޔާބު ކުރުމާއެކު މިއީ އުމުރުން 20 އަހަރުގެ ގައުފު އަށް ކާމިޔާބު ކުރެވުނު ފުރަތަމަ ޑަބްލިއުޓީއޭ ފައިނަލްސް މުބާރާތެވެ.
މި މުބާރާތް ކާމިޔާބު ކުރުމާއިއެކު ގައުފު އަށް ފައިސާގެ އިނާމުގެ ގޮތުގައި 4.8 މިލިއަން އެމެރިކާ ޑޮލަރު ލިބިގެންދާނެ އެވެ.