އަރަބި އިސްލާމީ ސަމިޓުގައި ބައިވެރިވެވަޑައިގަތުމަށް ޚާރިޖީ ވަޒީރު ސައުދީއަށް

އަރަބި އިސްލާމީ ސަމިޓުގައި ބައިވެރިވެވަޑައިގަތުމަށް ޚާރިޖީ ވަޒީރު ޑރ. އަބްދުﷲ ޚަލީލް ސައުދީ އަރަބިއްޔާއަށް ފުރާވަޑައިގަންނަވައިފިއެވެ.

ޚާރިޖީ ވަޒީރު ސައުދި އަރަބީއްޔާއަށް ކުރައްވާ މިދަތުރުފުޅުގައި އެ ޤައުމުގެ ވެރިރަށް ރިޔާދުގައި ބާއްވާ "އެކްސްޓްރާއޯޑިނަރީ ޖޮއިންޓް އަރަބް އިސްލާމިކް ސަމިޓް" އާއި ސަމިޓްގެ ހަވާސާގައި ބާއްވާ އިތުރު ބައްދަލުވުން ތަކުގައިވެސް ބައިވެވެވަޑައިގަންނަވާނެއެވެ.

މި ދަތުރުފުޅާއި ގުޅޭގޮތުން ޚަރިޖީ ވަޒީރު ޑރ. އަބްދުﷲ ޚަލީލް އެކްސްގައި ކުރެއްވި ޕޯސްޓެއްގައި ވިދާޅުވީ، މި ސަމިޓުގެ ތެރެއިން އިސްލާމީ އުއްމަތަށް މިވަގުތު ދިމާވެފައިވާ ބޮޑެތި މައްސަލަތަކާ ގުޅޭގޮތުން މަޝްވަރާކުރައްވާނެ ކަމަށެވެ. މީގެ ތެރޭގައި ފަލަސްޠީނުގެ ރައްޔިތުން ތަޙައްމަލް ކުރަމުންދާ ކަންކަމަށް ޚާއްސަ އިސްކަމެއް ދެއްވާނެކަމަށް ވިދާޅުވިއެވެ.

ޚާރިޖީ ވަޒީރު ސައުދީއަށް ފުރާވަޑައިގަންނަވާފައިވާއިރު، ޔަހޫދީން ފަލަސްޠީނާއި ރައްޔިތުންނާ ދެކޮޅަށް ހިންގަމުންދާ ޤަތުލްޢާމް ދިވެހި ރާއްޖެއިން ދަނީ ދުނިޔޭގެ ހުރިހާ ޕްލެޓްފޯމެއްގައި ހަރުކަށި އިބާރާތުން ކުއްވެރިކުރަމުންނެވެ. އެގޮތުން ޔަހޫދީ ދައުލަތް ޖަވާބުދާރީ ކުރުވުމަށް ހުރިހާ މަންސަތަކެއް ދިވެހި ރާއްޖެއިން ގޮވާލާއެވެ.