ރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ޑރ. ޒާހިރަށް އެރުވުމަށް ރައީސް ނިންމަވައިފި

ދިވެހިރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު، ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަދި ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ކަމުގެ މަގާމުގައި ހުންނެވި ޑރ. މުޙައްމަދު ޒާހިރު ޙުސައިނަށް އެރުވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވައިފިއެވެ.

ޑރ. މުޙައްމަދު ޒާހިރު ޙުސައިނަށް މި ޝަރަފު އެރުވުމަށް ރައީސުލްޖުމްހޫރިއްޔާ ނިންމެވީ، ދިވެހިރާއްޖޭގެ ތަޢުލީމީ ތަރައްޤީއަށާއި، ރާއްޖޭގައި ތަޢުލީމު ފުޅާކުރެއްވުމަށާއި، ތަޢުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރެއްވުމަށް އިޚްލާޞްތެރިކަމާއެކުގައި، ގިނަގުނަ ޚިދުމަތްތަކެއް ކޮށްދެއްވާފައިވާތީ، އެކަމުގެ އަގު ވަޒަންކުރެއްވުމުގެ ގޮތުންނެވެ.

އެޑިއުކޭޝަން މިނިސްޓަރެއްގެ މަޤާމުގައި ހުންނަވައިގެން ޑރ. މުޙައްމަދު ޒާހިރު ޙުސައިން ވަނީ ރާއްޖޭގެ ތައުލީމީ ނިޒާމަށް ބޮޑެތި ކުރިއެރުންތަކެއް ގެނެސް ދެއްވައިފައެވެ. އެގޮތުން ރަށްރަށުގައި އަސާސީ ތައުލީމްގެ ޕްރޮގްރާމް ހިންގުމާއި ކޮމިއުނިޓީ ސްކޫލްތައް ތައާރަފުކުރުމުގައުވެސް އެންމެ އިސްކޮށް ހުންނެވި ބޭފުޅަކީ ޑރ. ޒާހިރެވެ. އަދި އަތޮޅު ތައުލީމީ މަރުކަޒުތައް އުފައްދެއްވުމުގެ މަސައްކަތުގައިވެސް އިސް ދަޢުރެއް އަދާކުރެއްވިއެވެ.

ޒަމާނީ ތައުލީމު ދިވެހިންގެ މެދުގައި ފެތުރުމުގައި އިސްދައުރެއް އަދާކުރެއްވި ޑރ. މުޙައްމަދު ޒާހިރު ޙުސައިނަކީ މީގެ ކުރިންވެސް ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ކަމާއި ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ކަމުގެ މަޤާމުވެސް ފުރުއްވާފައިވާ ބޭފުޅެކެވެ. އަދި އެކިއެކި ވުޒާރާތަކުގެ ވަޒީރުކަމާއި، އެޑިއުކޭޝަން މިނިސްޓްރީގެ މުޝީރުކަމާއި، މަތީ ތަޢުލީމާބެހޭ މަޖިލީހުގެ މެންބަރުކަމާއި، ރައީސުލްޖުމްހޫރިއްޔާގެ އޮފީހުގެ ވަޒީރުކަމުގެ އިތުރުން ދައުލަތުގެ އެކިއެކި އިސް މަޤާމުތައް އެމަނިކުފާނު ފުރުއްވާފައިވެއެވެ.

ޑރ. މުޙައްމަދު ޒާހިރު ޙުސައިނަށް ދިވެހިރާއްޖޭގެ ތަޢުލީމަށް ޚިދުމަތްކުރުމުގެ އެންމެ މަތިވެރި ޝަރަފު ޝަރަފު އެރުވުން އޮންނާނީ، ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ބާއްވާ ރަސްމީ ޖަލްސާގައެވެ.

މި ޖަލްސާގައި، މަތީ ދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ ޚާއްޞަ އިނާމު ދެއްވުންވެސް އޮންނާނެއެވެ. މި އަހަރު އިނާމު ލިބިވަޑައިގަންނަވަނީ 40 ބޭފުޅުންނަށެވެ. އިނާމަށް ބޭފުޅުން ހޮއްވެވުމުގެ މަސައްކަތް ކުރިއަށް ގެންދެވީ، ޚާއްޞަ އިނާމާބެހޭ ކޮމިޓީންނެވެ. މީގެއިތުރުން
ދައުލަތަށް ޚިދުމަތްކުރުމުގެ އިނާމުވެސް އެ ޖަލްސާގައި، 53 ބޭފުޅަކަށް ދެއްވާނެއެވެ. ދައުލަތަށް ޚިދުމަތްކުރުމުގެ އިނާމަށް ބޭފުޅުން ހޮއްވަވަނީ، ޤައުމީ އިނާމާބެހޭ ކޮމިޓީންނެވެ.