ޔޫއެފާ ނޭޝަންސް ލީގުގައި މި މަހު އިނގިރޭސިވިލާތް ކުޅޭ ދެ މެޗަށް ނެގި ސްކޮޑުގައި މެންޗެސްޓަރ ސިޓީގެ މިޑްފީލްޑަރ ޖެކް ގްރީލިޝް ހިމަނާފައިވާތީ އެކަމަށް މެންޗެސްޓަރ ސިޓީގެ ކޯޗު ޕެޕް ގަޑިއޯލާ ފާޑު ކިޔައިފި އެވެ.
ގްރީސް އާއި އަޔަރލޭންޑާއި ދެކޮޅަށް މި މަހު އިނގިރޭސިން ނިކުނައިރު މިދިޔަ އޮކްޓޯބަރ މަހުގެ 20 ވަނަ ދުވަހު ވޮލްވްސް އާއި ދެކޮޅަށް މެންޗެސްޓަރ ސިޓީ ކުޅުނު މެޗަށްފަހު އަދި މިހާތަނަށް އެ ކްލަބަށް ގްރީލިޝް ކުޅެފައެއް ނުވެއެވެ. އަދި މިއަދު ބްރައިޓަން އާއި ދެކޮޅަށް ކުޅޭ މެޗަށް ނެގި ސްކޮޑުގައިވެސް ގްރީލިޝް ހިމަނާފައެއް ނުވެއެވެ.
ގްރީލިޝް ގައުމީ ޓީމުގެ ސްކޮޑަށް ނަގާފައިވާތީ އެކަމާއި ގުޅޭ ގޮތުން އިނގިރޭސިވިލާތުގެ ވަގުތީ ކޯޗު ލީ ކާސްލީ ބުނެފައިވަނީ ގްރީލިޝް ޓީމާއިއެކު ފަރިތަކުރަމުންދާތާ ދުވަސްތަކެއް ވެފައިވާ ކަމަށާއި އެހެންކަމުން އޭނާ ގައުމީ ޓީމުގެ ޒިންމާ އާއި ހަވާލުވާން އައުމުން އިތުރަށް އޭނާގެ ހާލަތު ބަލާނެ ކަމަށެވެ.
ނަމަވެސް ގަޑިއޯލާ އެކަމަށް ފާޑު ކިޔާ ބުނެފައިވަނީ ގައުމީ ޓީމުތަކަށް ކުޅުންތެރިން އޭނާ އަބަދުވެސް ދޫކުރަން ބޭނުން ކަމަށާއި ނަމަވެސް ދެ ހަފުތާ ނުވަތަ ތިން ހަފްތާއަށް ކުޅުމާއި ދުރުގައި ތިބި ކުޅުންތެރިން ގައުމީ ޓީމަށް ދޫކުރަން ޖެހޭ ކަމެއް ނޭނގޭ ކަމަށެވެ.
ގަޑިއޯލާ އިތުރަށް ބުނެފައިވަނީ ގްރީލިޝް ފާއިތުވެދިޔަ 17 ދުވަހު ޓީމުގެ ފަރިތަކުރުންތަކުގައި ބައިވެރިވެފައި ނުވާ ކަމަށެވެ. އަދި އޭނާ ޓީމުގެ ފަރިތަކުރުންތަކުގައި ބައިވެރިވެފައިވަނީ އިއްޔެ އެކަނި ކަމަށާއި އެވެސް އެންމެ ވިހި މިނިޓަށް ކަމަށެވެ.
ގްރީލިޝް އަށް ލިބިފައިވާ އަނިޔާގެ ސަބަބުން އޭނާގެ އަސްލު ކުޅުން ނުދެއްކޭ ކަމަށާއި ނަމަވެސް ގައުމީ ޓީމަށް އެމީހުން ބޭނުންވާ ކުޅުންތެރިއަކު ނެގޭނެ ކަމަށާއި އިނގިރޭސި އެފްއޭ އާއި ސިޓީގެ މެޑިކަލް ޓީމާއިމެދު އެއްވެސް ވާހަކަތަކެއް ދެކެވިފައިވާކަން ނޭނގޭ ކަމަށްވެސް ގަޑިއޯލާ ވަނީ ބުނެފަ އެވެ.