ޗައިނާގެ ލޮލުގެ ޑޮކްޓަރުންގެ ޓީމުން 3 ދުވަސްތެރޭގައި 60 އެއްހާ ސާޖަރީ
-
މިއީ 2016 ވަނަ އަހަރުން ފެށިގެން ކުރިއަށްގެންދާ އައި ކޭމްޕްއެއް
-
މިއަހަރު "އައި ކޭމްޕް" ފެށީ މިމަހުގެ 5 ވަނަ ދުވަހު
ރާއްޖޭގައި ހަރަކާތްތެރިވަމުންދާ ޗައިނާގެ ލޮލުގެ ޑޮކްޓަރުންގެ ޓީމުން ވޭތުވެދިޔަ 3 ދުވަހުގެ ތެރޭގައި 60 އެއްހާ ސާޖަރީ ހަދައިފިއެވެ.
މިއީ ޗައިނާ ސަރުކާރުގެ އިސްނެގުމުގެ މަތިން ޗައިނާގެ ލޮލުގެ ޑޮކްޓަރުން ރާއްޖެއަށް ކުރާ ޒިޔާރަތެކެވެ.
ޗައިނާގެ ޓީމުން ލޮލުގެ ފަރުވާދިނުމުގެ ކޭމްޕް ކުރިއަށް ގެންދަނީ ހުޅުމާލެ ހޮސްޕިޓަލުގައެވެ. އެ ހޮސްޕިޓަލުގައި މި ކޭމްޕް ކުރިއަށް ގެންދާ ގޮތް ބަލާލުމަށާއި ފަރުވާ ހޯދާ މީހުންނާ ބައްދަލުކުރެއްވުމަށް ސިއްޙަތާ ބެހޭ ވަޒީރު ޢަބްދުﷲ ނާޒިމް ވަނީ ހޮސްޕިޓަލަށް ޒިޔާރަތްކުރައްވާފައެވެ. އަދި މި ޒިޔާރާތުގައި ޗައިނާގެ އެމްބެސްޑަރ ސަފީރު ވާން ލިޖިންގެ އިތުރުން ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމްވެސް ބައިވެރިވެވަޑައިގެންނެވިއެވެ.
އައި ކޭމްޕްއާ ގުޅޭގޮތުން ވާހަކަދައްކަވަމުން ޗައިނާއިން ރާއްޖެއަށް ކަނޑައަޅާފައި ހުންނަވާ އެމްބެސެޑަރ ވާން ލިޖިން ވިދާޅުވީ ވޭތުވެދިޔަ ތިން ދުވަހުގެ ތެރޭ ޗައިނާގެ ޓީމުން 60 އެއްހާ ސާޖަރީ ހަދައި، ދިވެހިންނަށް ފަރުވާ ދީފައިވާކަމަށެވެ. އަދި ރާއްޖެއާއި ޗައިނާ ގުޅުމުގެ ސަބަބުން ދިވެހި ރައްޔިތުންނަށް ފައިދާތަކެއްވާތީ އުފާކުރައްވާކަމަށްވެސް އޭނާ ވިދާޅުވިއެވެ.
އައި ކޭމްޕުގައި ލޮލުގެ އެކި ބަލިތަކަށް ފަރުވާ ދިނުމުގެ އިތުރުން ލެންސު ނުސާފު ވެފައިވާ މީހުންނަށް ހާއްސަ ސާޖަރީތަކެއް ހެދުމުގެ ހިދުމަތްވެސް އަންނަނީ ދެމުންނެވެ.
Very pleased to share the joy of the patients whose vision has greatly improved after surgery by the 🇨🇳 medical team. Over past 3 days, they have done nearly 60 surgeries for local patients, who are really grateful to 🇨🇳 doctors . So happy to see that 🇲🇻 people benefit a lot from… https://t.co/RqW9IIX1yK
— Ambassador Wang Lixin (@China_Amb_Mdv) November 8, 2024
2016 އިން ފެށިގެން ސިލްސިލާ ގޮތެއްގައި ކުރިއަށްގެންދާ މި އައި ކޭމްޕުގެ މިފަހަރުގެ ހަރަކާތް ފެށީ މި މަހުގެ 5 ވަނަ ދުވަހުއެވެ. ވޭތުވެދިޔަ އަހަރުތަކުގައި މި ކޭމްޕުތައް މެދުވެރިކޮށް 5،000 އަށްވުރެ ގިނަ މީހުންނަށް ފަރުވާދީ 600 އަށްވުރެ ގިނަ މީހުންގެ ލޮލުގެ ސާޖަރީ ހަދާފައެވެ.
ޗައިނާގެ ޑޮކްޓަރުންގެ ޚާއްސަ ޓީމެއް ރާއްޖޭގައި ހަރަކާތްތެރިވަމުން އަންނައިރު 2020 ވަނަ އަހަރު ވަނީ ހުޅުމާލެ ހޮސްޕިޓަލްގައި ޗައިނާ ސަރުކާރުގެ އެހީގައި ކްލިނިކްއެއް ގާއިމްކޮށްފައެވެ.