މިހާރު ކުރިއަށްދާ ތިލައުތުރު ފުޓްސަލް މުބާރާތް 2024 ގައި އިއްޔެ ކުޅުނު މެޗުތަކުން ކެލާ އަދި އިހަވަންދޫ މޮޅުވެއްޖެއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާއިރު، މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
ކެލާ ފުޓްސަލް ދަނޑުގައި އިއްޔެ ހަވީރު ކުޅުނު ގްރޫޕް ބީގެ މެޗުން ކެލާ މޮޅުވީ އުލިގަން އަތުން ފަސޭހަކަމާއެކު 6-2 ގެ ނަތީޖާއަކުންނެވެ. މި މެޗުގައި ކެލާގެ އާދަމް މާކިން ހަމީދު ހެޓްރިކެއް ހެދިއިރު، އެ ޓީމުގެ އަނެއް ލަނޑުތައް ޖަހައިދިނީ ދެ ލަނޑު ޖެހި އަޙްމަދު ޝަފަގާއި، އަލީ އިމާދެވެ. މި މެޗުގައި އުލިގަމުގެ ލަނޑުތައް ކާމިޔާބުކޮށްދިނީ އަޙްމަދު ޔާސިރާއި، ޔޫސުފް ޝާހިދެވެ.
މި މުބާރާތުގައި އިއްޔެ ހަވީރު ކުޅުނު ގްރޫޕް އޭގެ މެޗުގައި ބައްދަލުކުރީ ދިއްދޫ އާއި ބާރަށެވެ. މި މެޗު ނިމުނީ 1-1 ގެ ނަތީޖާއަކުން އެއްވަރުވެގެންނެވެ. މި މެޗުގައި ދިއްދޫގެ އަހުޒަމް ރަޝީދު އެ ޓީމަށް ލީޑު ނަގައިދީފައިވަނިކޮށް، ބާރަށަށް ފަހު ވަގުތު ނަތީޖާ އެއްވަރުކޮށްދިނީ އަޙްމަދު ސާއިލެވެ.
މީގެ އިތުރުން މި މުބާރާތުގައި ރޭ ކުޅުނު ގްރޫޕް ބީގެ މެޗުން އިހަވަންދޫ މޮޅުވީ ތުރާކުނު އަތުން 4-1 ގެ ނަތީޖާއަކުންނެވެ. މި މެޗުގައި އިހަވަންދޫގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އިބްރާހީމް ހާމިދާއި، މުޙައްމަދު މަދީހު އަދި މުޙައްމަދު ސާނިއު އެވެ. މެޗުގައި ތުރާކުނު ޓީމުގެ ހަމައެކަނި ލަނޑު ޖަހައިދިނީ އިބްރާހީމް ސިރާޖެވެ.
މި މުބާރާތުގައި ރޭ ކުޅުނު ފަހު މެޗުގައި ބައްދަލުކޮށްފައިވަނީ ގްރޫޕް އޭގެ ދެ ޓީމު ކަމަށްވާ ފިއްލަދޫ އާއި ވަށަފަރެވެ. މި މެޗު ނިމުނީ 3-3 ގެ ނަތީޖާއަކުން އެއްވަރުވެގެންނެވެ. މި މެޗުގައި ވަށަފަރުގެ ލަނޑުތައް ޖަހައިދިނީ ސާޖިދު ރަޝީދާއި، އަޙްމަދު ސިނާން އަދި ގޯލްކީޕަރު މަހާސިން މުޙައްމަދެވެ. އެކަމަކު މެޗުގެ ފަހުކޮޅު ވަށަފަރުގެ ސިނާނަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ. މި މެޗުގައި ފިއްލަދޫން ކާމިޔާބުކުރި ލަނޑުތައް ޖަހައިދިނީ މުޙައްމަދު ހުޝާމާއި، މުޙައްމަދު ޔާމީނެވެ. އަދި އެ ޓީމުގެ އަނެއް ލަނޑަކީ ވަށަފަރުގެ ސާޖިދު އަތުން ބައިކޮޅަށް ވަން ލަނޑެކެވެ.
މިހާރު ގްރޫޕް ތާވަލު އޮތް ގޮތުން ގްރޫޕް އޭގެ އެއްވަނައިގައި އޮތް ބާރަށަށް ހަތް ޕޮއިންޓް ލިބިފައިވާއިރު، ދެވަނައިގައި އޮތް ދިއްދޫ އާއި ތިންވަނައިގައި އޮތް ވަށަފަރަށް ވަނީ ފަސް ޕޮއިންޓް ލިބިފައެވެ. އަދި ހަތަރުވަނައިގައި އޮތް ފިއްލަދުއަށް ހަތަރު ޕޮއިންޓް ލިބިފައިވާއިރު، ފުލުގައި އޮތް މުރައިދުއަށް ޕޮއިންޓެއް ލިބިފައެއް ނުވެއެވެ.
ގްރޫޕް ބީއަށް ބަލާލާއިރު، އެއްވަނަައިގައި އޮތް އިހަވަންދޫން ވަނީ ކުޅުނު ތިން މެޗުވެސް ކާމިޔާބުކޮށް ނުވަ ޕޮއިންޓް ހާސިލުކޮށްފައެވެ. ދެވަނައިގައި އޮތް އުތީމަށް ހަ ޕޮއިންޓް ލިބިފައިވާއިރު، ތިންވަނައިގައި އޮތް ކެލާ އާއި، ހަތަރުވަނައިގައި އޮތް ތުރާކުނަށް ވަނީ ހަތަރު ޕޮއިންޓް ލިބިފައެވެ. އަދި ފުލުގައި އޮތް އުލިގަމަށް ޕޮއިންޓެއް ލިބިފައެއް ނުވެއެވެ.