ތިލައުތުރު ފުޓްސަލް މުބާރާތް 2024 ގައި އިއްޔެ ކުޅުނު މެޗުތަކުން ދިއްދޫ، އިހަވަންދޫ، ވަށަފަރު އަދި އުތީމު މޮޅުވެއްޖެއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާއިރު، މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
ކެލާ ފުޓްސަލް ދަނޑުގައި އިއްޔެ ހަވީރު ކުޅުނު ގްރޫޕް އޭގެ މެޗުން ދިއްދޫ މޮޅުވީ ފިއްލަދޫ އަތުން ފަސޭހަކަމާއެކު 5-1 ގެ ނަތީޖާއަކުންނެވެ. މި މެޗުގައި ދިއްދޫގެ ލަނޑުތައް ކާމިޔާބުކޮށްދިނީ އަހުޒަމް ރަޝީދާއި، އާދަމް ނަސިމާއި، އަލީ ފަރުހާނާއި، މުޙައްމަދު ޝަނާއު ރަޝީދު އަދި މުޙައްމަދު ނައުޝާދެވެ. މެޗުގައި ފިއްލަދޫން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އަބްދުﷲ އިޚުވާނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ދިއްދޫގެ ޝަނާއުއެވެ.
މި މުބާރާތުގައި އިއްޔެ ހަވީރު ކުޅުނު ގްރޫޕް ބީގެ މެޗުން އިހަވަންދޫ މޮޅުވީ އުލިގަން އަތުން ފަސޭހަކަމާއެކު 6-1 ގެ ނަތީޖާއަކުންނެވެ. މި މެޗުގައި އިހަވަންދޫން ކާމިޔާބުކުރި ލަނޑުތައް ޖަހައިދިނީ ދެ ލަނޑު ޖެހި ޝިފާޒް އިބްރާހީމާއި، މުޙައްމަދު ފަޒީލާއި، މުޙައްމަދު މަދީހު އާއި، އިބްރާހީމް ހާމިދު އަދި އަޙްމަދު ސާޖިދެވެ. މެޗުގައި އުލިގަމުން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ ޔަމީން އަބްދުލް ބާރީއެވެ. މި މެޗުގެ މޮޅު ކުޅުންތެރިއަކީ އިހަވަންދޫގެ ޝިފާޒެވެ.
މީގެ އިތުރުން މި މުބާރާތުގައި ރޭ ކުޅުނު ގްރޫޕް އޭގެ މެޗުން ވަށަފަރު މޮޅުވީ މުރައިދޫ އަތުން 3-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި ވަށަފަރުގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އަބްދުﷲ ސިނާން އަދި އަޙްމަދު ސިނާނެވެ. މެޗުގައި މުރައިދޫން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އުފާލް އަބްދުﷲ އެވެ. މި މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ވަށަފަރުގެ ސާޖިދު ރަޝީދެވެ.
މި މުބާރާތުގައި ރޭ ކުޅުނު ފަހު މެޗުގައި ބައްދަލުކޮށްފައިވަނީ ގްރޫޕް ބީގެ ދެ ޓީމު ކަމަށްވާ ތުރާކުނާއި އުތީމެވެ. މި މެޗު1-0 ގެ ނަތީޖާއަކުން ކާމިޔާބުކޮށްފައިވަނީ އުތީމުންނެވެ. މި މެޗުގައި ފެނިގެންދިޔަ ހަމައެކަނި ލަނޑު އުތީމަށް ކާމިޔާބުކޮށްދިނީ ކެޕްޓަން މުޙައްމަދު މަޒީނެވެ. މެޗުގެ މޮޅު ކުޅުންތެރިއަކަށްވެސް ހޮވިފައިވަނީ އޭނާއެވެ.