އާމްދަނީ އިތުރުކުރުމަށް ޙައްޖު ކޯޕަރޭޝަނުން މާފުށީގަ ސިޓީ ހޮޓަލެއް ތަރައްޤީކުރަނީ

އާމްދަނީ އިތުރުކޮށް މޯލްޑިވްސް ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށް ކުރަމުންދާ މަސައްކަތްތަކުގެ ތެރޭގައި ހިމަނައިގެން ކ. މާފުށީގައި ސިޓީ ހޮޓަލެއް އެޅުމަށް ނިންމާފައިވާކަމަށް އެ ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

ޝަކީލް މިހެން ވިދާޅުވީ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ ބައްދަލުވުމުގައި ޙައްޖު ކޯޕަރޭޝަންގެ ކުރިމަގާ ގުޅޭގޮތުން ފުވައްމުލަކު މެދު ދާއިރާގެ މެންބަރު އަލީ ފަޒާދު ސުވާލުކުރެއްވިއެވެ.

އެ ސުވާލަށް ޖަވާބުދެއްވަމުން ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވީ އަދުގެ ސަރުކާރުގެ އަމާޒަކީ ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދައި، ޙައްޖަށް މީހުން ގެންދިއުމަށް ނަގާ އަގު ކުޑަކުރުން ކަމަށެވެ. އެގޮތުން އާމްދަނީ އިތުރުކުރުމަށް ރިއަލް އެސްޓޭޓް ވިޔަފާރީގެ ދާއިރާއަށް ވަނުމަށް ނިންމާފައިވާކަމަށް ޝަކީލް ވިދާޅުވިއެވެ.

އެގޮތުން ހުޅުމާލޭގައި ލަގްޒަރީ ފެންވަރުގެ އެޕާޓްމަންޓުތަކެއް ތަރައްޤީކޮށް، އެތަން ވިއްކުމަކީ އަމާޒެއްކަމަށާއި މިހާރު އެ އެޕާޓްމަންޓުތައް ކުރެހުމުގެ މަސައްކަތްކުރަމުންދާކަމަށާއި، ކުރިއަށްއޮތް ދެތިން މަސް ދުވަހުގެ ތެރޭގައި އެ މަސައްކަތް ބަޔަކަށް އެވޯޑުކުރެވޭނެކަމަށްވެސް އެކޯޕަރޭޝަނުގެ އެމްޑީ ޝަކީލް ވިދާޅުވިއެވެ.

މީގެ އިތުރުން ޙައްޖު ކޯޕަރޭޝަނަކީ ބޭރު ފައިސާއިން މުޢާމަލާތުކުރަންޖެހޭ ކުންފުންޏަކަށްވާއިރު، ބޭރު ފައިސާއިން އާމްދަނީ ލިބޭނެ ގޮތްތައް ހޯދުމަށްވެސް މަސައްކަތްކުރަމުންދާކަމަށް ޝަކީލް ވިދާޅުވިއެވެ. އެހެންކަމުން މާފުށީގައި ސިޓީ ހޮޓަލެއް ތަރައްޤީކުރުމަށް ނިންމާފައިވާ ކަމަށާއި އެކަމަށް ބޭނުންވާ ބިން މިހާރު ހަމަޖެހިފައިވާކަމަށް މުޙައްމަދު ޝަކީލް ވިދާޅުވިއެވެ.

"ހަލާލް ޓުވަރިޒަމް ތަޢާރަފްކޮށް މާފުށީގައި ސިޓީ ހޮޓަލެއް ހިންގުމަށް މާފުށީ ކައުންސިލްގެ ކުންފުންޏާއި ކޯޕަރޭޝަނާ ގުޅިގެން ސަބްސިޑަރީ ކުންފުންޏެއް އުފެއްދުމުގެ މަސައްކަތް ދަނީ ކުރަމުން. އިންވެސްޓްކުރާނެ ފަރާތްތަކެއްވެސް އެޕްރޯޗްކޮށްފައިވަނީ." ޝަކީލް ވިދާޅުވިއެވެ.

ޙައްޖު ކޯޕަރޭޝަނުން މިހާރު މީހުން ޙައްޖަށް ގެންދަނީ 69,965 ރުފިޔާއަށެވެ. ޝަކީލް ވިދާޅުވީ ޙައްޖު ކޯޕަރޭޝަނަކީ ފައިދާވާ ކުންފުންޏަކަށްވުމުން ޙައްޖަށް މީހުން ގެންދަން ނަގާ އަގު ކުޑަ ކުރެވޭނެ ކަމަށެވެ.

ރާއްޖެއަށް އަހަރަކު ލިބޭ 1000 ކޯޓާއާ އެއްވަރަށް މީހުން ޙައްޖަށް ގެންދަން ކޮންމެ އަހަރަކު 30 މިލިޔަން ރުފިޔާ ޙައްޖު ކޯޕަރޭޝަނުން ޚަރަދު ކުރަންޖެހެއެވެ. އެ ކޯޕަރޭޝަންގެ އަމާޒަކީ ޙައްޖަށް މީހުން ގެންދަން ނަގާ އަގު، 50،000 ރުފިޔާއަށް ކުޑަ ކުރުމެވެ.