"ދަރުމަވަންތަ ސްކޫލާއެކު ހޯލެއް ނޭޅުނީ މިދިޔަ ސަރުކާރުން ރަނގަޅަށް ޕްލޭންނުކުރުމުން"

މިދިޔަ ސަރުކާރުން ދަރުމަވަންތަ ސްކޫލުގެ އައު އިމާރާތް ތަރައްޤީކުރިއިރު އެތަނުގައި ހޯލެއް ނޭޅުނީ މަޝްރޫޢު ރަނގަޅަށް ޕްލޭންކޮށްފައި ނެތުމުންކަމަށް ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މެންބަރު ކުރެއްވި ސުވާލުތަކަށް ޖަވާބުދެއްވަމުންނެވެ.

މެންބަރުންގެ ސުވާލުތަކަށް ޖަވާބުދެއްވަމުން ތަޢުލީމީ ވަޒީރު ޑރ. އިސްމާޢިލް ޝަފީޢު ވިދާޅުވީ ދަރުމަވަންތަ ސްކޫލް އަލުން ތަރައްޤީކުރުމުގެ މަސައްކަތް 2020ވަނަ އަހަރުގެ ޑިސެންބަރުމަހުގެ ތެރޭގައި ފަށާފައިވާ ކަމަށެވެ. އަދި ސަރުކާރު ބަދަލުވުމާ ހަަމައަށް 3 އަަހަރު ދުވަސް ފާއިތުވެ ދިޔައިރުވެސް، އެތަނުގައި ހޯލެއް އެޅުމުގެ މަސައްކަތް ފަށާފައިނުވާކަން ވަޒީރު ފާހަގަކުރެއްވިއެވެ.

ނިމިދިޔަ ސަރުކާރުން ޕްލޭންކޮށްފައި ވަނީ ދަރުމަވަންތަ ސްކޫލް ތަރައްޤީކުރި ބިމާ ޖެހިގެން ހުރި މާލޭ ޖަލު ހުސްކުރުމަށްފަހު އެތަނުގައި ހޯލެއް އެޅުމަށް ކަމަށެވެ.

ދަރުމަވަންތަ ސްކޫލް މިހާރު ތަރައްޤީކޮށްފައިވާ ބިމަކީ ޖާގަ ބޮޑު ބިމެއް ކަމަށާއި ނިމިދިޔަ ސަރުކާރުން ރަނގަޅަށް ޕްލޭން ކުރިނަމަ، ސްކޫލްގެ އިތުރުން އެތަނުގައި ދަރިވަރުން ކުޅޭނެ ތަނަކާއި ހޯލެއްވެސް އެޅުނީސްކަމަށް ވަޒީރު ވިދާޅުވިއެވެ.

"އަޅުގަނޑުމެން ސަރުކާރާ ހަވާލުވެ، ދަރިވަރުންނަށް އުނދަގޫވާތީ ޖަލު ވާނީ ހުސްކޮށްފައި. އަޅުގަނޑުމެން މިހާރު މިދަނީ ހޯލު އެޅުމަށް ކުރަންޖެހޭ މަސައްކަތްތައް ކުރަމުން. މި މަސައްކަތް އަންނަ އަހަރުގެ ތެރޭގައި ފެށޭނެ" ވަޒީރު ވިދާޅުވިއެވެ.

ދަރުމަވަންތަ ސްކޫލަކީ މަޖީދިއްޔާ ސްކޫލުގައި ދަރިވަރުން ގިނަކަމުން އެއް މެނޭޖްމަންޓެއްގެ ދަށުން ހިންގުމަށް ދިމާވި ދަތިތައް ޙައްލުކުރުމަށް އެސްކޫލް ދެބައިކުރުމަށްފަހު މަޖީދިއްޔާ ސްކޫލުގެ ބިމުން ބައެއްގައި އޭރު ބިނާކުރި ސްކޫލެކެވެ.

ނަމަވެސް މާގިނަ އަހަރުތަކެއް ނުވަނީސް އެ އިމާރާތް ބާވެ ބޭނުންނުކުރެވޭވަރުވުމުގެ ސަބަބުން 2016 ވަނަ އަހަރު ވަނީ އެސްކޫލް ބަންދުކުރުމަށްފަހު ވެލާނާގެއާއި އިންވެގެން އޮންނަ ބިމުގައި ވަގުތީ ޢިމާރާތެއް ހަދައި ކިޔަވައިދޭން ފެށިއެވެ. އެއަށްފަހު ދަރުމަވަންތަ ސްކޫލްގެ އައު ޢިމާރާތެއް އަޅައި ކިޔަވައިދޭން ފެށީ މިދިޔަ އަހަރުގެ އޮގަސްޓްމަހުގެ 6 ވަނަ ދުވަހު ފެށި ދިރާސާ އައު އަހަރާއެކީގައެވެ.

ދަރުމަވަންތަ ސްކޫލްގެ އައު ޢިމާރާތުގައި 41 ކްލާސްރޫމް ހުރެއެވެ.