ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަމީޒާ އައްޔަންކުރަން ފާސްކޮށްފި

ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ފާތިމަތު އަމީޒާ އައްޔަންކުރަން ރައްޔިތުންގެ މަޖިލީހުން ފާސްކޮށްފިއެވެ.

ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ފާތިމަތު އަމީޒާ އައްޔަންކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ 23 ވަނަ ދުވަހުއެވެ. އޭނާއާއެކު އަސްމާ ޝަފީޢުގެ ނަންވެސް ރައީސް ފޮނުއްވިއެވެ.

ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް މީހަކު އަައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ ދެ ނަންފުޅާމެދު އިޤުތިޞާދީ ކޮމިޓީން ނިންމި ގޮތުގެ ރިޕޯޓު މަޖިލީހަށް ވަނީ ހުށައަޅާފައެވެ. އަދި ދެ ބޭފުޅުންވެސް މަޤާމަށް އައްޔަންކުރަން ކޮމިޓީއަށް ފެންނަކަމަށް ކޮމިޓީގެ ރިޕޯޓުގައިވެއެވެ. އެހެންކަމުން ރައީސް ފޮނުއްވެވި އެ ދެ ބޭފުޅުންގެ ތެރެއިން ކޮންމެވެސް އެއް ބޭފުޅަކު މަޤާމަށް އައްޔަންކުރުމަށް ފެންނަކަމަށް ފާސްކުރުމަށް ވަނީ ވޯޓަށް އަހާފައެވެ.

މިގޮތުން ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ފާތިމަތު އަމީޒާ މަޖިލީހުން ފާސްވީ ވޯޓުގައި ބައިވެރިވެވަޑައިގެންނެވި 64 މެންބަރުންގެ އިއްތިފާޤުންނެވެ. އަދި މިގޮތަށް ފާސްވުމާ ގުޅިގެން މަޤާމަށް އައްޔަންކުރަން ދެވަނަ ރައީސް ފޮނުއްވި ނަމަށް ވޯޓަށް އަހާފައިނުވެއެވެ.

ފާތިމަތު އަމީޒާ މިހާރު ހުންނެވީ މޯލްޑިވްސް އިންލޭންޑް ރެވެނިއު އޮތޯރިޓީ، މީރާގެ އެސިސްޓެންޓް ކޮމިޝަނަރ ޖެނެރަލް އެންފޯސްމެންޓްގެ މަޤާމުގައެވެ.

ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް އަމީޒާ އައްޔަންކުރަން ނަން ފޮނުއްވީ އެމަޤާމުގައި ކުރިން ހުންނެވި އަސްމާ ޝަފީޢުގެ މަޤާމުގެ މުއްދަތު މިދިޔަ މަހުގެ 31 ވަނަ ދުވަހުގެ ނިޔަލަށް ހަމަވެފައިވާތީއެވެ.