މި މަހު ފެށުމަށް ތައްޔާރުވާ 90 ޕްލަސް ގޯލްޑް ކަޕް ފުޓުބޯޅަ މުބާރާތުން ރާއްޖޭގެ އެންމެ މޮޅަށް ފުޓްބޯޅަ ކުޅެނީ ކޮން ރަށެއްކަން އެނގިގެންދާނެ ކަމަށް ތަޖުރިބާކާރު ކޯޗު އަދި މުބާރާތުގެ އެއް ފައުންޑަރ އަލީ ނިސްތާރު މުޙައްމަދު ބުނެފިއެވެ.
ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަމުން ނިސްތާރު ބުނީ އަތޮޅުތެރޭގައި ޓީމުތަކާއެކު މަސައްކަތް ކުރިއިރު އަބަދުވެސް އަންނަ ޝަކުވާއަކީ މާލޭ ޓީމުތަކަށް ފޯކަސްކުރާ ވާހަކަ ކަމަށެވެ. މިއީ މުޅި ރާއްޖޭގައި ފުޓްބޯޅަ ކުޅޭ ކުޅުންތެރިންނަށް ފުރުސަތު ދިނުމުގެ ގޮތުން ބާއްވާ މުބާރާތެއް ކަމަށް ނިސްތާރު ބުންޏެވެ.
"އަޅުގަނޑުމެންނަށް ކުރެވުނު ތަޖުރިބާގެ އަލީގަ، މިތާ މާޅޮހަށްވެސް އެއް އަހަރު ފުޓްބޯޅަ ކުޅެފައި ދިޔަ، އަދި ޖެހިގެން އައި އަހަރު ފޯމެޓު ބަދަލުވެ އެކަހަލަ ބައިވަރު ޗެލެންޖުތަކެއް ހުރި." އއ.މާޅޮސް ގޮވައިގެން ކޯޗެއްގެ ގޮތުގައި ދިވެހި ޕްރިމިއަރ ލީގުގައި ކުރި ތަޖުރިބާ ހިއްސާކުރަމުން ނިސްތާރު ބުންޏެވެ.
ނިސްތާރު ބުނީ މިއީ ދުނިޔޭގެ ތައްޓަށް ކުޅެވޭ ފުޓްބޯޅަ މުބާރާތުގެ ބައްޓަމަށް ބާއްވާ އެއް މަސްދުވަހުގެ ފުޓްބޯޅަ ފެސްޓިވަލެއް ކަމަށެވެ. ނިސްތާރު ބުނީ އެ ކުޅުންތެރިއަކު އަމިއްލަ ރަށަށް ކުޅޭއިރު އެންމެ މޮޅީ ކޮން ރަށެއްތޯ މިއީ މިހާރުވެސް ކުރެވޭ ބޮޑު ބަހުސެއް ކަމަށެވެ. އެހެންނަމަވެސް މުޅި ރާއްޖެއިން 22 ޓީމު ވާދަކުރާ މުބާރާތުން އެ ޖަވާބު ލިބިގެންދާނެ ކަމަށް އުންމީދުކުރާ ކަމަށްވެސް ނިސްތާރު ފާހަގަކުރިއެވެ.
މިއަހަރު މުޅިން އަލަށް ބާއްވާ ގޯލްޑްކަޕް ފުޓްބޯޅަ މުބާރާތުގައި ކޮންމެ ޓީމަކަށްވެސް ރަށުންބޭރު ދެ ކުޅުންތެރިންނަށް ކުޅެވޭނެކަމަށް އިންތިޒާމުކުރާ ފަރާތުން ބުނެއެވެ.