ދަނޑުވެރިކަމުގެ ސަރަޙައްދުގައި ހައްދާނެތަކެއްޗާއި އިމްޕޯޓު މަދުކުރެވޭނެ ނިސްބަތް ދެނެގަނެވިއްޖެ: ޑރ. ރަމީލާ

ދަނޑުވެރިކަމުގެ އިޤްތިޞާދީ ސަރަޙައްދުގައި ހައްދާނެ ތަކެތި ކަނޑައަޅާފައިވާކަމަށާއި، އެތަކެތި ހައްދައިގެން އިމްޕޯޓު މަދުކުރެވޭނެ ނިސްބަތްވެސް މިހާރު ދެނެގަނެވިފައިވާކަމަށް ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުންނެވެ.

ރާއްޖޭގައި ދަނޑުވެރިކަން ފުޅާކޮށް، ދަނޑުވެރިކަމުގެ ބާވަތްތަކުގެ އިމްޕޯޓު މަދުކުރުމަކީ ސަރުކާރުގެ މުހިންމު އެއް ޢަމާޒެވެ. އެކަމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެގްރިކަލްޗަރ އިކޮނޮމިކް ޒޯން ނުވަތަ ދަނޑުވެރިކަމުގެ އިޤްތިޞާދީ ސަރަޙައްދެއް ކަނޑައަޅާފައެވެ. އެތަނުގައި ދަނޑުވެރިކަމުގެ ގިނަ ބާވަތްތައް ހައްދައި، ކާނާގެ ޔަޤީންކަން ކަށަވަރުކުރުމަށް އެމަނިކުފާނު ވަނީ ނިންމަވާފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަނޑުވެރިކަމުގެ ސިޔާސަތަށް އަލިއަޅުއްވާލައްވާ ދަނޑުވެރިކަމާ ބެހޭ ވަޒީރު ޑރ. ޢާއިޝަތު ރަމީލާ ވިދާޅުވީ، މޫސުމީ ބަދަލުތަކާ ކުރިމަތިލަމުން ދާއިރު ޤައުމުގެ ރައްޔިތުންނަށް ފުދޭވަރަށް ކާނާ ޔަގީން ކުރުމަކީ މުހިންމު ކަމެއްކަމަށެވެ. ދަނޑުވެރިކަމުގެ ބާވަތްތަކުގައިވެސް އިމްޕޯޓަށް ރާއްޖެ ބަރޯސާވެފައި އޮތްކަން ފާހަގަކުރައްވާ ވަޒީރު ވިދާޅުވީ، ކާރިސާތަކަށް ދުރާލާ ތައްޔާރުވެ، ރާއްޖޭގައި ކާބޯތަކެތީގެ ބާވަތްތައް ހެއްދުންވެސް މުހިންމު ކަމަށެވެ.

އެ ޢަމާޒަށް ވާސިލުވުމަށް، ދަނޑުވެރިކަމުގެ އިޤްތިޞާދީ ސަރަހައްދުގައި، ރާއްޖެއަށް ބޭނުންވާނެ ގިނަ ބާވްތްތަކެއް ހެއްދުމަށް ނިންމަވާފައިވާކަމަށް ވަޒީރު ވިދާޅުވިއެވެ. އެކަމަނާ ވިދާޅުވީ، އަންނަ އަހަރުގެ ތެރޭގައި އެ މަސައްކަތް ފެށުމަށް މިހާރު ރާއްޖެއިން ބޭރުގެ ކުންފުންޏެއްވެސް ކަނޑައަޅާފައިވާކަމަށެވެ. އަދި އެ ސަރަހައްދުގައި ހައްދާނެ ބާވްތަކުގެ ލިސްޓެއްވެސް ތައްޔާރުކޮށް ނިމިފައިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ދަނޑުވެރިކަމުގެ ސަރަޙައްދުގައި ހައްދާ ތަކެތީގެ ތެރޭގައި ފިޔާ، އަލުވި ލޮނުމެދު އަދި ތަރުކާރީއާއި މޭވާގެ ގިނަ ބާވަތްތަކެއް ހިމެނޭނެކަމަށެވެ. ވަޒީރު ވިދާޅުވީ މީގެތެރެއިން ބައެއް ބާވަތްތަކަކީ ރާއްޖޭގައި އެތަކެތި ހެއްދުމަށްފަހު އިމްޕޯޓުކުރުން އެއްކޮށް ހުއްޓާލާނެ ބާވަތްތަކެއްކަމަށެވެ. އެގޮތުން އިމްޕޯޓު މަދުކުރެވޭނެ ނިސްބަތްވެސް މިހާރު ދެނެގަނެވިފައިވާކަމަށް ވަޒީރު ވިދާޅުވިއެވެ.

"އެތަނުގައި ހައްދާ ތަކެތީގެ ތެރޭގައި އާންމުކޮށް ކެއިން ބުއިމުގައި ބޭނުން ކުރާ ފިޔާ، ލޮނުމެދު، އަލުވި، މީގެ އިތުރުން ތަރުކާރީއާއި މޭވާ ހައްދާނެ. އަންދާޒާކުރާ ގޮތުގައި 100 އިންސައްތަ ބޭރުން އިމްޕޯޓް ނުކުރެވޭ ވަރަށް އެތަނުގައި ތަކެތި ހައްދާނެ. އަދި އަނެއްބައި ކޮންމެސް މިންވަރަކަށް އެތެރެކުރުން މަދުކުރެވޭނެ. އަމާޒަކީ އިމްޕޯޓް ވީހާވެސް މަދުކުރުން. އަދި ފުޓް ސެކިރިއުޓީ ގާއިމްކޮށް އަތްފޯރާފަށުގައި ލިބެން ހުރުން." ދަނޑުވެރިކަމާ ބެހޭ ވަޒީރު ވިދާޅުވިއެވެ.

ދިވެހިރާއްޖޭގެ ކާބޯތަކެތީގެ ރައްކާތެރިކަން ކަށަވަރު ކުރުމުގެ ގޮތުން ދަނޑުވެރިކަމުގެ އިޤްތިޞާދީ ސަރަޙައްދެއް ޤާއިމްކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީޒޯން ކުންފުނިން ޗައިނާގެ ހާބަރ އިންޖިނިއަރިންގް ކޮމްޕެނީ ލިމިޓެޑާއެކު އެއްބަސްވުމެއްގައި ވަނީ ސޮއިކޮށްފައެވެ. މި އެއްބަސްވުމުގައި ސޮއިކޮށްފައިވަނީ މިއަހަރުގެ މާރޗް މަހުގެ 28 ވަނަ ދުވަހުއެވެ. އެ ސަރަހައްދުގައި ދަނޑުވެރިކަން ކުރެވެން ފެށުމާއެކު ރާއްޖޭގެ ކާބޯތަކެތީގެ ރައްކާތެރިކަން ވަރަށް ބޮޑަށް ކަށަވަރުވާނެކަމަށް ސަރުކާރުން ވިދާޅުވެއެވެ.

ރާއްޖޭގައި ދަނޑުވެރިކަމުގައި ހައްދާ ތަކެތި ޓެސްޓުކުރުމަށް ޤައުމީ ލެބޯޓްރީއެއް އެޅުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ.