މިދިޔަ މަހު ފުލުހުންނަށް ހުށަހެޅި މައްސަލަތަކުގެ އަދަދު ދަށަށް

މި ނިމުނު އޮކްޓޫބަރުމަހު ފުލުހުންގެ އިދާރާއަށް ހުށަހަޅާފައިވާ މައްސަލަތަކުގެ އަދަދު ދަށްވެފައިވާ ކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުންގެ ތަފާސްހިސާބުތަކުން ދައްކާގޮތުން އޮކްޓޫބަރުމަހު ފުލުހުންނަށް ޖުމްލަ 887 މައްސަލަ ހުށަހަޅާފައިވާއިރު، ސެޕްޓެމްބަރުމަހު މި އަދަދު ހުރީ 953 ގައެވެ.

ފުލުހުންނަށް ހުށަހެޅޭ މައްސަލަތަކުގެ ތަފާސްހިސާބުތަކުން އެންމެ ބޮޑަށް ފާހަގަކޮށްލެވެނީ އޮކްޓޫބަރުމަހު ވައްކަމުގެ މައްސަލަތައް ވަރަށް ބޮޑަށް ދަށަށް ގޮސްފައިވާކަމެވެ. އެގޮތުން މިއަހަރުގެ މިހާތަނަށްވެސް ވައްކަމުގެ މައްސަލަތައް އެންމެ މަދުން ހުށަހަޅާފައިވަނީ މިދިޔަ މަހުއެވެ.

ފާއިތުވި 3 މަހު ހުށަހަޅާފައިވާ ވައްކަމުގެ މައްސަލަތަކުގެ ހިސާބުތައް

- އޮގަސްޓު : 326 މައްސަލަ
- ސެޕްޓެމްބަރ : 297 މައްސަލަ
- އޮކްޓޫބަރު : 253 މައްސަލަ

ފުލުހުންގެ ތަފާސްހިސާބުތައް ދައްކާގޮތުން މިދިޔަމަހު 2ވަނަ އަށް އެންމެ ގިނައިން ހުށަހަޅާފައިވަނީ ޓްރެފިކް އެކްސިޓެންޓުތަކުގެ މައްސަލަތަކެވެ.

އޮކްޓޫބަރު މަހު އެންމެ ގިނައިން ހުށަހެޅުނު މައްސަލަތައް:

■ ވައްކަމުގެ 253 މައްސަލަ
■ ޓްރެފިކް އެކްސިޑެންޓުގެ 241 މައްސަލަ
■ މަސްތުވާތަކެތީގެ 118 މައްސަލަ
■ މުދާ ގެއްލިގެން 68 މައްސަލަ

ކުށް މަދުކުރުމަށް އަތޮޅުތަކުގެ ޕޮލިސް ސްޓޭޝަންތަކުން ކައުންސިލްތަކާއި ގުޅިގެން ދަނީ ތަފާތު މަސައްކަތްތައް ކުރަމުންނެވެ. ޚާއްސަކޮށް ވައްކަމުގެ މައްސަލަތައް މަދު ކުރުމަށްޓަކައި، ގޭގެއަށް ޑޯޓުޑޯ ޕްރޮގުރާމުތައް ހިންގައި، އާންމުންގެ ހޭލުންތެރިކަން އިތުރު ކުރުމަށް ގިނަ ހަރަކާތްތަކެއް ފުލުހުން ދަނީ ކުރިއަށް ގެންދަމުންނެވެ.

އަދި މާލޭ ސަރަހައްދުގައި އެކްސިޑެންޓުތައް އިތުރުވާތީ، ކޮންމެ ފަސް މިނެޓަކުން ފުލުހަކާ ބައްދަލުވާ ގޮތަށް މާލެ ސަރަޙައްދު ބެލެހެއްޓުމުގައި ޚާއްސަ ސިޔާސަތުތަކެއް ކަނޑައަޅާ ތަންފިޒުކުރަން ވަނީ ފަށާފައެވެ.

ރައްކާތެރިކަން ކަށަވަރުކުރުމަށް ކުރާ މަސައްކަތުގައި ފުލުހުންގެ ބައިވެރިވުން އިތުރުކޮށް، ރައްޔިތުންނަށް ރައްކާތެރިކަމުގެ އިޙުސާސުކޮށްދިނުމަކީ ފުލުހުންގެ ޚިދުމަތުން ނެރެން ބޭނުންވާ އެންމެ މުހިންމު ނަތީޖާކަމަށް ކޮމިޝަނަރ އޮފް ޕޮލިސް އަލީ ޝުޖާއު ވަނީ ވިދާޅުވެފައެވެ. އެގޮތުން މިހާރު ފަށާފައިވާ މަސައްކަތްތަކުގެ ހެޔޮ ނަތީޖާ ފެނި، އަމާންކަމާ ރައްކާތެރިކަން ކަށަވަރު މުޖުތަމަޢުއެއް ބިނާކުރާނެކަމުގެ ޔަޤީންކަން ސީޕީ ވަނީ ދެއްވާފައެވެ.