މިހާރު ކުރިއަށްދާ ޕެރިސް މާސްޓާސްގައި އިއްޔެ ކުޅުނު ކުއާޓާ ފައިނަލް މެޗުގައި ގްރީސްގެ ސްޓެފަނޯސް ސިޓްސިޕާސް ސީދާ ދެ ސެޓުން ބަލިކޮށް، ޖަރުމަނުގެ އެލެގްޒެންޑާ ޒްވަރޭވް މުބާރާތުގެ ސެމީ ފައިނަލަށް ދަތުރުކޮށްފިއެވެ.
މިއާއެކު، ޒަވްރޭވް ވަނީ އޭޓީޕީ މާސްޓާސް 1000 ގެ ނުވަ މުބާރާތެއްގެ ސެމީ އަށް ދަތުރުކުރި އަށްވަނަ ކުޅުންތެރިޔާގެ ޝަރަފު ހޯދާފައެވެ. ކުރީން، މި ރިކޯޑް އޮތް ކުޅުންތެރިންގެ ތެރޭގައި، ނޮވަކް ޖޮކޮވިޗާއި ރަފައެލް ނަޑާލްގެ އިތުރުން ރޮޖާ ފެޑެރާ އާއި އެންޑީ މަރީ ހިމެނެއެވެ.
އެކޯރ އެރީނާގައި ކުޅުނު މެޗުގައި މިވަގުތު ދުނިޔޭގެ ރޭންކިންގެ ތިންވަނައިގައި އުޅޭ ޒްވަރޭވް ވަނީ 1 ގަޑިއިރާއި 44 މިނެޓުގެ ތެރޭގައި 7-5، 6-4 އިން ސިޓްސިޕާސްގެ މައްޗަށް ކުރިހޯދާފައެވެ.
މިއީ މި ދެ ކުޅުންތެރިންގެ މެދުގައި މިހާތަނަށް ކުޅުނު 16 ވަނަ މެޗެވެ. މީގެތެރެއިން، 11 ވަނަ އަށް ސީޑްކޮށްފައިވާ ސިޓްސިޕާސް ވަނީ 10 މެޗު ކާމިޔާބުކޮށްފައެވެ. ޒްވަރޭވް އަށް ކުރިލިބުނީ އެންމެ ހަ މެޗުންނެވެ.
މުބާރާތުގެ ސެމީގައި ޒްވަރޭވް ބައްދަލުކުރަންޖެހެނީ 2022 ވަނަ އަހަރުގެ ޗެމްޕިއަން، ޑެންމާކްގެ ހޮލްގާ ރޫންއާ އެވެ. ރޫން ވަނީ ކުއާޓާގެ އަނެއް މެޗުގައި އޮސްޓްރޭލިއާގެ އަލެކްސް ޑެ މިނޯ ގެ މައްޗަށް 6-4، 4-6، އަދި 7-5 އިން ކުރިހޯދާފައެވެ.
ޒްވަރޭވް ވަނީ މީގެކުރީން، 2020 ވަނަ އަހަރުގެ މުބާރާތުގެ ފައިނަލްގައި ކުޅެފައެވެ. އެފަހަރު ޑަނީލް މެޑްވެޑޭވް އަތުން ވަނީ ބަލިވެފައެވެ.
ސެމީގެ އަނެއް މެޗުގައި ފްރާންސްގެ އޫގޯ ހަމްބާޓް ނިކުންނާނީ ރަޝިއާގެ ކަރެން ކަޗަނޯވްއާ ދެކޮޅަށެވެ.