ޖަރުމަން ލީގުގައި ރޭ އަމިއްލަ ދަނޑުގައި ސްޓުޓްގާޓާ ލަނޑެއް ނުޖެހި އެއްވަރުވެ، އެންމެ ފަހުގެ ޗެމްޕިއަން ބަޔާ ލެވަކޫސަނަށް ލީގު ރޭހުގައި އުނދަގޫތަކާ ކުރިމަތިލާން ޖެހިއްޖެއެވެ.
މިއީ ލީގުގައި އެ ޓީމު އެންމެ ފަހުން ކުޅުނު ފަސް މެޗުގެ ތެރެއިން އެއްވަރުވި ހަތަރުވަނަ ފަހަރެވެ. މޮޅުވީ އެންމެ މެޗަކުންނެވެ.
ރޭގެ ނަތީޖާއާއެކު ލެވަކޫސަނަށް މިހާތަނަށް ކުޅުނު ނުވަ މެޗުން ލިބިފައިވަނީ 16 ޕޮއިންޓެވެ. އެންމެ ކުރީގައި އުޅޭ ބަޔާން މިއުނިކާ އެ ޓީމާ ދެމެދު ހަތަރު ޕޮއިންޓްގެ ފަރަގެއް އޮތްއިރު، ކުރިއަށް އޮތް މެޗު ކާމިޔާބުކޮށްގެން ބަޔާނަށް ދެ ޓީމުގެ ފަރަގު ހަތް ޕޮއިންޓަށް ފުޅާކުރުމުގެ ފުރުޞަތު އެބައޮތެވެ. ސްޓުޓްގާޓް އޮތީ ނުވަ މެޗުން ލިބުނު 13 ޕޮއިންޓާއެކު ހަތްވަނައިގައެވެ.
ބޭއެރީނާގައި ރޭ ކުޅުނު މެޗު ފެށިގެން ލެވަކޫސަނުން ޑޮމިނޭޓްކޮށްފައިވާއިރު، ލަނޑުޖަހާނެ ރަނގަޅު ފުރުޞަތުތަކެއް ވަނީ ތަނަވަސްކޮށްފައެވެ. އޭގެތެރެއިން، އެ ޓީމުން ވަނީ ދެ ހަމަލާއެއް ގޯލްގެ ހުރަސްދަނޑިއަށް އަމާޒުވެފައިވެއެވެ.
މި މެޗުގައި ލެވަކޫސަންގެ ކުޅުންތެރިން ފޮނުވާލި ހަމަލާތައް ހުއްޓުވުމުގައި ސްޓުޓްގާޓްގެ ގޯލްކީޕަރު، އަލެކްސެންޑާ ނޫބެލް ވަނީ މޮޅު ކުޅުމެއް ދައްކާފައެވެ. އޭގެތެރޭގައި، ފުރަތަމަ ހާފުގައި ލެވަކޫސަންގެ ޖެރެމީ ފްރިމްޕޮންގް އާއި އަލެހަންދްރޯ ގްރިމާލްޑޯ ފޮނުވާލި ހަމަލާތައް ވެސް ހިމެނެއެވެ.
ފަހު ހާފުގައި ލެވަކޫސަންގެ ނައިޖީރިއާ ފޯވާޑް، ވިކްޓަ ބޮނިފޭސް އާއި އެ ޓީމުގެ ޖަރުމަން މިޑްފީލްޑަރު، ފްލޮރިއަން ވާޓްޒް ފޮނުވާލި ހަމަލާތައް ވެސް ނޫބެލް ވަނީ ހުއްޓުވައިފައެވެ.
ލެވަކޫސަނަށް ދެން އެންމެ އަވަހަށް އޮތީ މި މަހުގެ ހަވަނަ ދުވަހު ޔުއެފާ ޗެމްޕިއަންސް ލީގުގައި އިންގްލެންޑްގައި ލިވަޕޫލާ ދެކޮޅަށް ކުޅެން ޖެހޭ މެޗެވެ. އެއަށްފަހު، ލީގުގައި މި މަހުގެ ނުވަވަނަ ދުވަހު ރަށުން ބޭރުގައި ނިކުންނާނީ ބޯކުމްއާ ދެކޮޅަށެވެ.