މޯލްޑިވްސް ސާފިން އެސޯސިއޭޝަން (އެމްއެސްއޭ) އިން އިންތިޒާމުކޮށްގެން ކުރިއަށްގެންދާ ދިވެހި ސާފް ލީގުގެ ފަހު މުބާރާތް ކަމަށްވާ ރަންނަމާރި ޗެލެންޖް 1446 ގެ ޗެމްޕިއަންކަން ހޫދު އަޙްމަދު ހޯދައިފިއެވެ.
މާލޭ ރާޅުގަނޑު ސަރަހައްދުގައި ކުރިއަށްދިޔަ މި މުބާރާތުގެ ފައިނަލް ހީޓުތައް މިއަދު ވަނީ ކުރިއަށް ގެންގޮސްފައެވެ. މި މުބާރާތުގެ ފިރިހެން އޯޕަން ބައިގެ ޗެމްޕިއަންކަން ހޫދު ހޯދީ ފައިނަލުގައި ކަޔާން އަބްދުالله އަރީފް ބަލިކުރުމަށްފަހުއެވެ. މި ހީޓުގައި ހޫދު 11.25 ގެ ސްކޯއެއް ހޯދިއިރު، ކަޔާނަށް ލިބުނީ 10.05 ގެ ސްކޯއެކެވެ. މި ބައިގެ ފައިނަލަށް ޒުވާން ރާޅާއެޅުންތެރިޔާ ކަޔާން ދަތުރުކޮށްފައިވަނީ ސެމީ ފައިނަލް ފުރަތަމަ ހީޓުގައި އޭނާގެ ބައްޕަ އަބްދުالله އަރީފް ބަލިކުރުމަށްފަހުއެވެ.
މީގެ އިތުރުން މި މުބާރާތުގެ އަންހެން ޑިވިޝަންގެ ޗެމްޕިއަންކަން ޖެހިޖެހިގެން ހަތަރުވަނަ ފަހަރަށް މަރިޔަމް ރާހިލް ނަސީމް (އާޔާ) ވަނީ ހޯދާފައެވެ. އޭނާ މި އަހަރު ޗެމްޕިއަންކަން ހޯދީ ފައިނަލުގައި ޝާޒިޔާ ސައީދު (ޝާޒު) ބަލިކުރުމަށްފަހުއެވެ. އެގޮތުން މި ހީޓުގައި އާޔާ 10.25 ގެ ސްކޯއެއް ހޯދިއިރު، ޝާޒުއަށް ލިބުނީ 6.50 ގެ ސްކޯއެކެވެ.
ރަންނަމާރި ޗެލެންޖުގެ 18 އަހަރުން ދަށުގެ ޖޫނިއަރ ބައިގެ ޗެމްޕިއަންކަން ހޯދާފައިވަނީ ޔަސީން އަޙްމަދު ނާޝިދެވެ. އޭނާ ޗެމްޕިއަންކަން ހޯދީ ފައިނަލުގައި ކަޔާން އަބްދުﷲ އަރީފް ބަލިކުރުމަށްފަހުއެވެ. އެގޮތުން މި ހީޓުގައި ޔަސީން 11 ޕޮއިންޓް ހޯދިއިރު، ކަޔާނަށް ލިބުނީ 9.70 ގެ ސްކޯއެކެވެ. މި މުބާރާތުގެ ޖޫނިއަރ ބައިގެ ޗެމްޕިއަންކަން ޔަސީން ހޯދިއިރު، އޭނާ ވަނީ މި ފަހުން ނިމުނު ގައުމީ ޖޫނިއަރ ސާފިން ޗެމްޕިއަންޝިޕް 2024 ގެ 14 އަހަރުން ދަށުގެ ޗެމްޕިއަންކަން ހޯދާފައެވެ.
މީގެ އިތުރުން ރަންނަމާރި ޗެލެންޖުގައި ކުރިއަށްދިޔަ މަރުހަބާ ކަޕްގެ ޗެމްޕިއަންކަން ހޯދީ މާލެ ޓީމުންނެވެ. އެ ޓީމުން ޗެމްޕިއަންކަން ހޯދާފައިވަނީ ފައިނަލުގައި ރ. ރަސްމާދޫ ބަލިކުރުމަށްފަހުއެވެ. މި ހީޓުގައި މާލެ ޓީމުން ޖުމްލަ 27.26 ގެ ސްކޯއެއް ހޯދިއިރު, ރަސްމާދޫ ޓީމަށް ސްކޯކުރެވުނީ 25.89 އެވެ.
ފައިނަލް ހީޓުތަކަށްފަހު އޮތް އިނާމު ދިނުމުގެ ރަސްމިއްޔާތު ޝަރަފްވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.