މޭޔަރުކަމުގައި ތަސައްވުރުކުރެއްވި ކެޓް ޝެލްޓަރ، ރައީސްގެ ވެރިކަމުގައި ހަގީގަތަކަށް!

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލޭގެ މޭޔަރަކަށް ހުންނެވި ދުވަސްވަރު ތަސައްވުރުކުރެއްވި ކެޓް ޝެލްޓަރ އެމަނިކުފާނުގެ ވެރިކަމުގެ ޒަޢާމަތުގައި ހަގީގަތަކަށް ހެއްދެވުމަށްފަހު ހުޅުވަން ތައްޔާރުވެއްޖެއެވެ.

ހުޅުމާލެ ދެވަނަ ފިޔަވަހީގައި 5000 އަކަ ފޫޓުގެ ބިމެއްގައި ސަރުކާރުން ގާއިމްކުރައްވާފައިވާ ކެޓް ޝެލްޓަރ މާދަމާ ހުޅުވަން ވަނީ ތައްޔާރުވެފައެވެ.

މާލެ ސިޓީގައި ބުޅާ ގިނަވެ، ނުބެލެހެއްޓި، ޢާއްމު ދިރިއުޅުމަށް އުނދަގޫވާވަރަށް އެކަން ދިޔައިރުވެސް މާލެ ސިޓީ ކައުންސިލްގެ މެޖޯރިޓީ، އެމްޑީޕީއަށް އޮތް 3 ދައުރުގަައި އެކަމާ އެއްވެސް ވަރަކަށް އަޅައެއް ނުލައެވެ.

2021 ވަނަ އަހަރު މާލެ ސިޓީގެ މޭޔަރުކަމަށް ވަޑައިގަތުމަށް ރައީސުލްޖުމްހޫރިއްޔާ ޑރ. މުޢިއްޒު ކުރެއްވި ކެމްޕޭނުގައި، ރައްޔިތުންގެ ކަންބޮޑުވުމެއްގެ ގޮތުގައި، އަދި ޙައްލު ނުކުރެވި ދިގުލާފައިވާ މި މައްސަލަ ޙައްލުކުރަން މަސައްކަތް ފައްޓަވާނެކަމަށް ވިދާޅުވިއެވެ.

މޭޔަރުކަމާ ޙަވާލުވެ ވަޑައިގަތުމާއެކު، ރައީސް މުޢިއްޒު ވަނީ، މާލެ ސިޓީގައި ގިނަވަމުންދާ ބުޅާތައް ވަކީން ރަނގަޅަށް ބެލެހެއްޓޭނެ ކެޓްޝެލްޓަރއެއް ޤާއިމްކުރާނެ ބިމެއް ހަމަޖައްސަވައިދެއްވުމަށް 2021 ވަނަ އަހަރު ސަރުކާރުގައި އެދިވަޑައިގެންފައެވެ. ނަމަވެސް އޭރު އޮތް އެމްޑީޕީގެ ކޯލިޝަން ސަރުކާރުން އެއްވެސް އެއްބާރުލުމެއް އެކަމަކަށް ނުދިނެވެ. އަދި މާލެ ސިޓީގެ އެއްވެސް ސަރަޙައްދަކުން ކެޓްޝެލްޓަރއަށް ޚާއްޞަ ބިމެއް ހަމަޖައްސައެއް ނުދިނެވެ.

ސަރުކާރުގެ އެއްބާރުލުން ނުލިބި މިކަން ދިގުލައި ދާން ފެށުމުން، މޭޔަރުކަމުގައި ރައީސް މުޢިއްޒު ހުންނަވައި، މިކަން ޙައްލުކުރެވޭނެ މަގެއް ފެނޭތޯ، ބޮޑުތަކުރުފާނުމަގު، މަސްވެރީންގެ ޕާކު އޮތް ސަރަޙައްދުން އެކަމަށް ޖާގައެއް ޚާއްޞަ ކުރެއްވޭތޯވެސް 2023 ވަނަ އަހަރު މަސައްކަތް ކުރެއްވިއެވެ.

2023 ނޮވެމްބަރ 17 ގައި، ރާއްޖޭގެ ރައީސުލްޖުމްހޫރިއްޔާކަމާ ޙަވާލުވެވަޑައިގެން، ދިރޭތަކެއްޗަށް އޯގާތެރިވެ ބެލެހެއްޓުމަށް ޚާއްޞަ އިސްކަމެއް ދެއްވުމަށްޓަކައި ދަނޑުވެރިކަމާބެހޭ ވުޒާރާގެ ނަމާއި މެންޑޭޓްގެ ތެރޭގައި އެނިމަލް ވެލްފެއަރ ހިމެނުއްވިއެވެ. އަދި މާލެ ސިޓީގައި އެންމެ އިސްކަން ދެއްވައިގެން ޙައްލު ހޯއްދަވާ އެއް ކަމެއްގެ ގޮތުގައި، ކެޓް ޝެލްޓަރ ބިނާކުރުން ހިމަނުއްވައި، ހުޅުމާލެ 2 ވަނަ ފިޔަވަހީން އެކަމަށް ޚާއްޞަ ބިމެއް ސަރުކާރުން ހަމަޖެއްސެވިއެވެ.

ކެޓް ޝެލްޓަރއަށް ބޭނުންވާ ބިން ހަމަޖެއްސުމަށްފަހު އެނިމަލްވެލްފެއަރ މިނިސްޓްރީއާ، މާލެ ސިޓީ ކައުންސިލް ގުޅިގެން ކެޓްޝެލްޓަރ ބިނާކުރެވޭނެ މާލީ އެހީއާ ވަސީލަތްތައް ސަރުކާރުން ހަމަޖައްސަވައިދެއްވިއެވެ. މާލެ ސިޓީގައި ބިނާކުރެވޭ ކެޓްޝެލްޓަރގެ ސަބަބުން، އެތައް އަހަރުތަކެއް ވަންދެން ރައްޔިތުންނަށް ކަންބޮޑުވުމަކަށް ވެފައިވާ ބުޅާ ގިނަވުމުގެ މައްސަލަ ޙައްލު ކުރެވޭނެއެވެ.

ރަށުތެރެއާ މަގުތައް ހަޑިވެ ނަޖިސްވުން ކުޑަވާނެއެވެ. އަދި ބުޅާ ބެލެހެއްޓުންވެސް އޯގާތެރިކަމާ އަޅައިލުމާއެކު އިންތިޒާމު ކުރެވޭނެއެވެ. ކެޓްޝެލްޓަރގައި އޯގާތެރިކަމާއެކު ބުޅާ ބަލަހައްޓައި، ކާންބޯންދީ، ބޭސްފަރުވާ ކުރެވޭނެ އިންތިޒާމާ، އެކަމަށް ޚާއްޞަ ތަމްރީނު ލިބިފައިވާ މީހުންނާ، ޑޮކްޓަރުންވެސް ތިބޭނެއެވެ. އެއްވެސް ސަރުކާރަކުން އަޅައިނުލި، ރައްޔިތުން ނުހަނު ކަންބޮޑުވިކަމަކަށް، ރައީސް ޑރ. މުޢިއްޒު މިވަނީ ދާއިމީ ޙައްލެއް ހޯއްދަވައިދެއްވާފައެވެ.