ޕަބްލިކް ސަރވިސް މީޑީއާ، ޕީއެސްއެމްގެ މެނޭޖަރ އޮޕަރޭޝަންސް ނިއުސް އެންޑް ކަރަންޓް އެފެއަރޒް އަޙްމަދު މުސްތަފާގެ ވަޒީފާ އިއާދަކޮށްދީފިއެވެ.
މެނޭޖަރ އޮޕަރޭޝަންސްގެ ވަޒީފާ، މުސްތަފާއަށް އިއާދަކޮށްދިނީ އޭނާ ވަޒީފާއިން ވަކިކުރި މައްސަލަ ޑިރެކްޓަރުންގެ ބޯޑަށް ހުށަހެޅުމުން ބަލަންޖެހޭ ކަންކަން ބެލުމަށްފަހު އެ ބޯޑުންނެވެ.
އަޙްމަދު މުސްޠަފާއަށް ޕީއެއެސްއެމުން ފިޔަވަޅު އަޅާފައިވަނީ މޯލްޑިވްސް މީޑިއާ ކައުންސިލްގެ 11 ވަނަ ނޫސްވެރިކަމުގެ އެވޯޑް ހަފްލާގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު އަދި ނޫސްވެރިކަމުގެ އާއްމު މިންގަނޑުތަކާ ޚިލާފު ވީޑިއޯއެއް، ދައްކާފައިވާ މައްސަލައިގައެވެ.
އެވޯޑް ހަފްލާގައި ހިންގާދިޔަ ކަންތައްތަކާއި ގުޅިގެން މީޑިއާކައުންސިލްގެ ރައީސްގެ ހައިސިއްޔަތުން އަޙްމަދު މުސްޠަފާ މިއަދު ނެރުއްވި ބަޔާނެއްގައި ވިދާޅުވީ އެ ކައުންސިލުން ބޭއްވި އެވޯޑް ހަފްލާގެ އެއްވެސް ކަމެއްގައި ކައުންސިލްގެ ރައީސްގެ ހައިސިއްޔަތުން އޭނާގެ ސީދާ ބައިވެރިވުމެއް ނެތްކަމަށެވެ.
ނޫސްވެރިކަމުގެ އެވޯޑްގެ ނަޒާހަތްތެރިކަމާމެދުގައި ސުވާލު އުފައްދަވައި ކައުންސިލްގެ މެމްބަރ ޢަލީ ނިޝާން ކައުންސިލްގެ ރައީސަށް ކޮށްފައިވާ ސީރިއަސް ތުހުމަތުތަަށް ދޮގުކުރައްވަމުން މުސްޠަފާ ވިދާޅުވީ އެވޯޑު ދިނުމަށް ބޭއްވި ހަފްލާގައި ޕީއެސްއެމްގެ އެޑިޓޯރިއަލް ކޮންޓެންޓާ ޚިލާފު އަދި ނޫސްވެރިކަމުގެ އާއްމު މިންގަނޑުތަކާ ޚިލާފު ވީޑިއޯއެއް، އެ ޙަފްލާގައި ދައްކާފައިވާއިރު، އަދަދު ނޫހުން ތައްޔާރުކުރި އެ ކޮންޓެންޓަކީ އަޚްލާޤީ މިންގަނޑާ ޚިލާފު އެއްޗެއްކަމަށް ދޭހަވާ މޭރުމަކުން އެ ކޮންޓެންޓު އުފެއްދި ދުވަސްވަރު މީޑިއާ ކައުންސިލުން ބަޔާނެއްވެސް ނެރުނުކަމަށެވެ.
28 ސެޕްޓެމްބަރު 2023ގައި މީޑިއާ ކައުންސިލުން ނެރެފައިވާ ބަޔާނުގައި ވަނީ، އަދަދު ނޫހުގެ އެ ކޮންޓެންޓަކީ ދިވެހި މީޑިއާގެ އަޚްލާގީ މިންގަނޑާ ޚިލާފު އެއްޗެއްކަމަށެވެ.
އެހެންކަމުން ނޫސްވެރިކަމުގެ އެވޯޑު ހަފްލާގައި ހަމަ އެކޮންޓެންޓު ކައުންސިލްގެ ރައީސަށްވެސް އަދި ރަސްމިއްޔާތު ލައިވްކުރި ޕީއެސްއެމްއަށް ވެސް ނޭނގި ގަސްތުގައި ދެއްކުމުގައި އެވޯޑުގެ ކަންކަން އިންތިޒާމުކުރި ކައުންސިލް މެމްބަރުންގެ ޒިންމާ އެބައޮތްކަމަށް އެމްއެމްސީގެ ރައީސްގެ އަޙްމަދު މުސްޠަފާ ނެރުއްވި ބަޔާނުގައި ވިދާޅުވިއެވެ.