މާފުށި ޖަލަށް 26 އަހަރު ފުރުން ފާހަގަކޮށްފި

މޯލްޑިވްސް ކަރެކްޝަނަލް ސަރވިސް، އެމްސީއެސްއިން މާފުށީ ޖަލުގެ 26 ވަނަ އަހަރީ ދުވަސް ފާހަގަކޮށްފިއެވެ.

މާފުށީ ޖަލަށް 26 އަހަރު ފުރުން ފާހަގަކުރުމަށް ރޭ އެ ޖަލުގައި ދިދަ ނެގުމުގެ ރަސްމިއްޔާތެއް ބޭއްވިއެވެ.

މި ރަސްމިއްޔާތު ޝަރަފުވެރިކޮށްދެއްވީ ޑެޕިއުޓީ ކޮމިޝަނަރ އޮފް ޕްރިޒަންސް އިބްރާހިމް މުޙައްމަދު ދީދީއެވެ. ޑެޕިއުޓީ ކޮމިޝަނަރގެ އިތުރުން މާފުށީ ޖަލުގެ ޑައިރެކްޓަރ، ޑެޕިއުޓީ ސްޕްރިންޓެންޑެންޓް އޮފް ޕްރިޒަންސް ޢަބްދުކް ޣަނީއާއި އެ ޖަލުގެ ކޮމިޝަންޑް އޮފިސަރުންނާއި މާފުށީ ޖަލުގެ ގިނަ ޢަދަދެއްގެ ސީނިއަރ އޮފިސަރުން މި ރަސްމިއްޔާތުގައި ބައިވެރިވިއެވެ.

މި ރަސްމިއްޔާތުގައި ދިދަ ނެގުމަށްފަހު ދެން ކުރިއަށްދިޔައީ ޕްރިޒަން އޮފިސަރުންގެ ޢަޒުމް ކިޔުމެވެ. އަދި ރަސްމިއްޔާތު ނިންމާލާފައިވަނީ ދުވަހުގެ ޚާއްސަ ކޭކު ފެޅުމުންނެވެ.

މާފުށީ ޖަލު އުފެދުނީ 1998 ވަނަ އަހަރުގެ ނޮވެންބަރުމަހުގެ 1 ވަނަ ދުވަހުއެވެ.

މާފުށީ ޖަލަކީ ރާއްޖޭގައި ހުރި އެންމެ ބޮޑު އަދި އެންމެ ގިނަ ޤައިދީން ބަންދުކުރެވޭ ޖަލެވެ. އަދި ރާއްޖޭގައި އަންހެން ޤައިދީން ބަންދުކުރާ ހަމައެކަނި ޖަލަކީވެސް މާފުށީ ޖަލެެވެ.