ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ފަލަސްޠީނުގެ ޣައްޒާއަށް ދީފައިވާ ނިރުބަވެރި ޙަމަލާތަކުގައި ޝަހީދުކޮށްލި މީހުންގެ އަދަދު 55އަށް އުފުލިފައިވާ ކަން, އެ ސަހަރުގެ ޞިއްޙަތާ ބެހޭ ވުޒާރާއިން ހާމަކޮށްފިއެވެ. ޔަހޫދީ ފައުޖުގެ ނިރުބަވެރި ޙަމަލާތައް އަމާޒު ކުރަމުން ދަނީ ޣައްޒާގެ އުތުރުގައިވާ ރަށްތަކާއި, ނުޞަޔިރާތު ރެފިއުޖީ ކޭމްޕުގެ އިތުރުން އަލް-ޒަވާޔިދާއަށެވެ. ޣައްޒާގެ މުސްލިމުންގެ ނަސްލުހޭދު ކޮށްލުމަށް ޔަހޫދީން މިހާރު ހިންގަމުންދާ ލާއިންސާނީ ޖަރީމާތައް ފަށާފައި ވަނީ މީގެ އަހަރެއްހާ ދުވަސް ކުރިންނެވެ.
ނުޞަޔިރާތަށް ޔަހޫދީ ފައުޖުން ދިން ޙަމަލާތައް އަމާޒުކޮށްފައި ވަނީ ގެދޮރު ނެތިފައިވާ ގިނަ އަދަދެއްގެ ބަޔަކު ވަގުތީ ހިޔަލެއްގެ ގޮތުގައި ބޭނުން ކުރަމުން ދިޔަ މަދަރުސާއަކަށެވެ. އެ މަދަރުސާގެ ގޯތިތެރޭގައި ފޭލިގެތަކެއް ޖަހާފައިވާ ސަރަޙައްދަށް އަމާޒުކޮށް ޔަހޫދީ ފައުޖުގެ ނިރުބަވެރި ސިފައިން ދިން ވައިގެ ޙަމަލާތަކުގައި 10 މީހުން ޝަހީދު ކޮށްލިއެވެ. އަދި, ގިނަ އަދަދެއްގެ ބަޔަކު ޒަޚަމު ކޮށްލިއެވެ.
ނުޞަޔިރާތުގައި ޢާންމުން ދިރިއުޅޭ ގެތަކަށް އަމާޒުކޮށް ވެސް ޔަހޫދީ ފައުޖުން ނިރުބަވެރި ޙަމަލާތަކެއް ދިނެވެ. އެ ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި އަބޫ-ޚުޟްރަތު ޢާއިލާގެ ފަސް މެންބަރުންނާއި, ސީދާން ޢާއިލާގެ ނުވަ މެންބަރުންނާއި, މުޙްސިން ޢާއިލާގެ ހަތަރު މެންބަރުން ހިމެނެއެވެ. މުޙްސިން ޢާއިލާގެ ތުއްތު ކުއްޖަކު ވެސް ޝަހީދުންގެ ތެރޭގައި ހިމެނެއެވެ.
ނުޞަޔިރާތުގެ ރައްޔިތުން ބުނީ, ފަލަސްޠީނުގެ ކުޑަކުދިންނާއި އަންހެނުން ޝަހީދު ކުރުމަށް ޔަހޫދީން ކެތްމަދުވެފައިވާ ކަމުގައެވެ. ފަލަސްޠީނުގެ މިނިވަން ކަމަށް ޖިހާދު ކުރާ މުޖާހިދުންގެ ޖަމާޢަތްތަކުގެ މެންބަރުން އެ ސަރަޙައްދުގައި ހަރަކާތްތެރިވަމުން ނުދާ ކަން ވެސް ނުޞަޔިރާތުގައި ދިރިއުޅޭ ރައްޔިތުން ހާމަކުރިއެވެ. އަދި, ނުޞަޔިރާތަށް ޙަމަލާ ދީފައި ވަނީ އެއްވެސް އިންޒާރަކާ ނުލައި ކަމުގައި ވެސް އެ މީހުން ބުންޏެވެ.
”އަޅުގަނޑުމެން މިތާގައި ޝަހީދުވެ ނިމިދާނެ. އެ ކަމަށް އަޅުގަނޑުމެން ތައްޔާރު. މިއަދު ދިން ޙަމަލާތަކުގައި އަޅުގަނޑު މަރެއް ނުވޭ, ނަމަވެސް މާދަމާ ދޭ ޙަމަލާތަކުގައި ޝަހީދުވެދާނެ. ޣައްޒާގައި ރައްކާތެރި އެންމެ ތަންކޮޅެއް ވެސް ނެތް. ހުރިހާ ދިމާލެއްގައި [ޔަހޫދީން] އެ ދަނީ ޤަތުލުޢާންމު ހިންގަމުން،“ ނުޞަޔިރާތުގައި ދިރިއުޅޭ ރައްޔިތަކު ބުންޏެވެ.
ޣައްޒާގެ އުތުރުގައި އޮންނަ ދަޔިރް އަލް-ބަލަޙުގައި ވެސް ޔަހޫދީ ފައުޖުން ދަނީ ލާއިންސާނީ ޖަރީމާތައް ހިންގަމުންނެވެ. ޣައްޒާގެ ޞިއްޙީ ވުޒާރާގެ އޮފިޝަލުން ބުނީ, އެ ރަށުގައި ހުރި ކަމާލް ޢަދްވާނީ ހަސްފަތާލަށް ޔަހޫދީ ފައުޖުން ނިރުބަވެރި ޙަމަލާތަކެއް ދީފައިވާ ކަމުގައެވެ. އަދި, އެ ތަނަށް ރޭޑުޖަހައި, ޞިއްޙީ ފަރުވާއަށް ބޭނުުން ކުރާ ތަކެތީގައި ހުޅުޖަހައި, ބޮޑެތި ގެއްލުންތަކެއް ދީފައިވާ ކަމުގައެވެ.
ޞިއްޙީ ފަރުވާ ފޯރުކޮށްދޭ ބައިނަލްއަޤުވާމީ ޖަމުޢިއްޔާ, ޑޮކްޓަރސް ވިތުއައުޓް ބޯޑަރސް (އެމްއެސްއެފު)ން ބުނީ, ކަމާލް ޢަދްވާނީ ހަސްފަތާލަށް ރޭޑުޖެހުމަށް ފަހު ޔަހޫދީ ފައުޖުން ހައްޔަރު ކޮށްފައިވާ މީހުންގެ ތެރޭގައި އެ ޖަމާޢަތުގެ ޑޮކްޓަރެއް ކަމުގައިވާ މުޙައްމަދު ޢުބަޔިދު ހިމެނޭ ކަމުގައެވެ. ޣައްޒާގައި ތިބި ބަލިމީހުންނާއި, ޔަހޫދީންގެ ޢުދުވާނީ ޙަމަލާތަކުގައި ޒަޚަމު ކޮށްލާފައިވާ މީހުންނަށް ޞިއްޙީ ޚިދުމަތްތައް ފޯރުކޮށްދޭން މަސައްކަތް ކުރާ ޑޮކްޓަރުންނާއި ޞިއްޙީ ޚިދުމަތްތެރިންނަށް ޔަހޫދީން ކުރިމަތި ކުރަމުންދާ ނުރައްކާތަކުން އެ މީހުން ސަލާމަތް ކޮށްދިނުމަށް ވެސް އެމްއެސްއެފުން ވަނީ ގޮވައިލާފައެވެ.
ޣައްޒާގެ އިތުރުން ހުޅަނގު އައްސޭރީގައި ވެސް ޔަހޫދީ ފައުޖުން ދަނީ ލާއިންސާނީ ޖަރީމާތައް ހިންގަމުންނެވެ. ހުޅަނގު އައްސޭރިއަށް ޔަހޫދީ ފައުޖުން އެންމެ ފަހުން ދީފައިވާ ޙަމަލާތައް އަމާޒު ކޮށްފައި ވަނީ ނޫރު ޝަމްސު ރެފިއުޖީ ކޭމްޕަށެވެ. އަސްކަރީ ޑްރޯނެއް ބޭނުންކޮށްގެން އެ ކޭމްޕަށް ދިން ވައިގެ ޙަމަލާތަކުގައި ތިން މީހުން ޝަހީދު ކޮށްލިއެވެ. އަދި, ގިނަ އަދަދެއްގެ ބަޔަކު ޒަޚަމު ކޮށްލިއެވެ. ޝަހީދު ކޮށްލާފައިވާ މީހުންގެ ތެރެއިން އެކަކަކީ 18 އަހަރުގެ ޒުވާނެކެވެ. ޠޫލްކަރްމުގެ ރެފިއުޖީ ކޭމްޕަކަށް ވެސް ޔަހޫދީ ފައުޖުން ވަނީ ރޭޑުޖަހާފައެވެ. އަދި, ތިން މީހުން ޝަހީދު ކޮށްލާފައެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 43,259އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 101,827 މީހުން ޒަޚަމު ކޮށްލާފައެވެ.