އިންތިޤާލީ އިންސާފުގެ އޮފީހަށް ހުށަހެޅުނު މައްސަލަތައް ބަލައި، ހައްލު ހޯދައިދޭނަން: ބަންޑާރަނައިބު

އިންސާނީ ހައްގުތަކާއި ކަރާމާތާއި ގުޅުންހުރި މައްސަލަތައް ބެލުމަށް، މިދިޔަ ސަރުކާރުން އުފެއްދެވި އިންތިޤާލީ އިންސާފުގެ އޮމްބަޑްސްޕާސަންގެ އޮފީހަށް ހުށައަޅާފައިވާ މައްސަލަތައް ބަލައި، އެ މައްސަލަތަކަށް ހައްލު ހޯދައިދެއްވާނެކަމަށް ދައުލަތުގެ ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވެއްޖެއެވެ.

އިންތިޤާލީ އިންސާފުގެ އޮމްބަޑްސްޕާސަންގެ އޮފީހެއް މިދިޔަ ސަރުކާރުން އުފައްދާފައިވަނީ 2020 ވަނަ އަހަރުގެ ޑިސެންބަރުމަހުގެ 17 ވަނަ ދުވަހުއެވެ. މި އޮފީހަކީ، 1953 ގެ ޖެނުއަރީ މަހުން ފެށިގެން 2018 ވަނަ އަހަރުގެ ނޮވެމްބަރު މަހުގެ 17 ގެ ނިޔަލަށް ހިނގާފައިވާ އިންސާނީ ހައްގުތަކާއި ކަރާމާތާއި ގުޅުންހުރި މައްސަލަތައް ބެލުމަށް، ޤާނޫނުން ބާރުލިބިގެން އުފައްދާފައިވާ އޮފީހެކެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވީ މިދިޔަ ސަރުކާރުން އުފައްދާފައިވާ އިންތިޤާލީ އިންސާފުގެ އޮފީހުން، އެ އޮފީހަށް ހުށަހެޅިފަހުރި މައްސަލަތައް އެންމެ އެކަށޭނަ ގޮތެއްގައި ބަލާފައިނުވާ ކަމަށާއި، ގިނަ އަދަދެއްގެ މައްސަލަތައް ނިންމާފައިވެސް ނެތްކަމަށް ބަންޑާރަނައިބު ވިދާޅުވިއެވެ.

ސަރުކާރު ބަދަލުވުމާ ހަމައަށް އިންތިޤާލީ އިންސާފުގެ އޮމްބަޑްސްޕާސަންގެ އޮފީހަށް ހުށަހެޅިފައިހުރި މައްސަލަތަކާމެދު ޢަމަލުކުރާނެ ގޮތުގެ ލަފަޔެއް ރައީސް އޮފީހުން ދެއްވާފައިވާ ކަމަށެވެ. އަދި އެ ލަފަޔާ އެއްގޮތަށް މައްސަލަތައް ބަލައި، އެ މައްސަލަތަކަށް އަދުގެ ސަރުކާރުން ހައްލު ހޯއްދަވާދެއްވާނެކަމަށް ބަންޑާރަނައިބު ވިދާޅުވިއެވެ.

"ހުށައެޅުނު މައްސަލަތައް އެއްކޮށް ނިންމުމަށްއަދި އިތުރު ވަގުތު ނަގާނެ. ގިނަ މައްސަލަތައް ހުރީ އެންމެ އެކަށީގެންވާ ގޮތަކަށް ނޫން ބަލަފައެއް. އަދި ބައެއް މައްސަލަތަކަށް ޤާނޫނީ ހައްލުތައްވެސް ހޯދަންޖެހޭ" ބަންޑާރަނައިބު ވިދާޅުވިއެވެ.

2 އަހަރުދުވަހުގެ މުއްދަތަކަށް އެ އޮފީސް އެކުލަވާލާފައި ނަމަވެސް އެ އޮފީހަށް ކަނޑައަޅާފައިވާ މުއްދަތުގެ ތެރޭގައި މަސައްކަތް ނުނިމުމުން އެ އޮފީހުގެ މަސައްކަތް މިދިޔަ އަހަރުގެ ނޮވެމްބަރު 17 އާ ހަމައަށް އިތުރުކުރިއެވެ. އަދި އޭގެފަހުން އެ އޮފީސް ވަނީ އުވާލާފައެވެ.

ކުރީ ސަރުކާރުން އުފެއްދި އިންތިޤާލީ އިންސާފުގެ އޮފީހަށް 489 މައްސަލަ ހުށައެޅިކަމަށާއި ސަރުކާރު ނިމުނުއިރު 460 މައްސަލައެއް ތަހުޤީގުކުރަން ނިންމާ 453 މައްސަލައެއް ބަލާ ނިންމާފައި އޮތްކަމަށެވެ. އަދި އޮފީހުން ބަލައި، މަދަނީ ބަދަލު ލިބެން ޖެހޭ ކަމަށް ނިންމާފައި އޮތް ޖުމްލަ 30 މައްސަލައެއް ހިމެނޭ ރިޕޯޓެއް މިދިޔަ އަހަރު ނޮވެމްބަރ މަހުގެ 17 ވަނަ ދުވަހު ރައީސް އޮފީހަށް ފޮނުވާފައިވާ ކަމަށެވެ.