6 މަސްދުވަހުގެ ތެރޭގައި މަގުމަތީގައި އުޅޭ ހުރިހާ ބުޅާތަކެއް ކެޓް ޝެލްޓަރއަށް ގެންދެވޭނެ: މޭޔަރު އާޒިމް

ކެޓް ޝެލްޓަރ ހުޅުވުމާއެކު 6 މަސްދުވަހުގެ ތެރޭގައި މާލެ ސަރަހައްދުގައި އެއްވެސް މީހެއްގެ ބެލުމެއް ނެތި އުޅޭ ބުޅާތައް އެތަނަށް ގެންދެވޭނެކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

މާލެ ސަރަހައްދުގެ މަގުތަކުގައި އުޅޭ ބުޅާތައް ގެންދިއުމަށް ޤާއިމްކުރާ ކެޓް ޝެލްޓަރ ހެދުމުގެ މަސައްކަތް ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ހަވާލުކޮށްފައިވަނީ މާލެ ސިޓީ ކައުންސިލާއެވެ. އަދި ކެޓް ޝެލްޓަރ ހުޅުވުމަށް ސަރުކާރުން ނިންމާފައިވަނީ އަންނަ މަހުގެ 2 ވަނަ ދުވަހުއެވެ.

ކެޓް ޝެލްޓަރ ހެދުމަށް ކަނޑައެޅި 5000 އަކަ ފޫޓް ބިން ހަމަޖައްސާފައިވަނީ ހުޅުމާލޭ ދެވަނަ ފިޔަވަހީގެ ކުރީގެ ފަރުކޮޅުފުށި އޮތް ސަރަހައްދުގައެވެ.

ކެޓް ޝެލްޓަރގެ މަސައްކަތްތަކާއި ގުޅޭގޮތުން މައުލޫމާތު ދެއްވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ ކެޓް ޝެލްޓަރގެ ހުޅުވުމަށްފަހު ބުޅާތައް ކެޓް ޝެލްޓަރއަށް ގެނައުމަކީ ވަރަށް ޓެކްނިކަލް މަސައްކަތެއްކަމަށެވެ. އަދި މާލެ ތެރޭގައި އުޅޭ ބުޅާތައް ހިފުމަށްފަހު ކައުންސިލުން އެތަނަށް ގެންނާނީ އެއްވެސް ބުޅަލަކަށް އަނިޔާނުވާގޮތަށް ކަމަށްވެސް އާޒިމް ވިދާޅުވިއެވެ.

އާޒިމް ވަނީ ބުޅާތައް ގެނައުމަށް ކައުންސިލުން ނިންމާފައިވާ ގޮތުގެ މައުލޫމާތު ހިއްސާކުރައްވާފައެވެ.

"ބުޅާތައް ގެނައުމަށް ޚާއްސަ ކޮށިތަކެއް އަޅުގަނޑުމެން ތައްޔާރުކުރަމުން އެބަދަން. އަޅުގަނޑުމެން ބުޅާ ހިފައިގެން ވެހިކަލަކަށް ލައިގެން ކެޓް ޝެލްޓަރއަށް ގެނެސް، ވަކިތަންތާނގައި ބެހެއްޓޭނެ. މިތަނުގައި ވަކިން ބޮޑު ތިން ކޮށި ހަދާފައިވާނެ. އެކި ކޮށިތަކަށް އެކި ކަހަލަ ކަންތައްތައް ދިމާވެފައިވާ ބުޅާތައް ލާނެ. ބަލިމަޑުކަން ހުންނަ ބުޅާތަކަށްވެސް ޚާއްސަ ކޮއްޓެއް އޭގައި ހިމެނޭނެ" އާޒިމް ވިދާޅުވިއެވެ.

އާޒިމް ވިދާޅުވީ ކެޓް ޝެލްޓަރއަށް ބުޅާތައް ގެންދިއުމަށްފަހު ޑޮކްޓަރުންނާއި ނަރުހުން ބޭނުންކޮށްގެން ބުޅާތައް ނުވިހާ ގޮތް ހަދާނެ ކަމަށެވެ. އަދި އަމާޒަކީ 6 މަސް ދުވަސް ތެރޭގައި މާލޭގައި އުޅޭ ބުޅާތައް ކެޓް ޝެލްޓަރއަށް ގެނައުންކަމަށްވާއިރު އެންމެ ފުރަތަމަ އެތަނަށް ގެންނާނީ ސަލްމާން މިސްކިތުގެ ކައިރީގައި އުޅޭ ބުޅާތައްކަމަށް އާޒިމް ވިދާޅުވިއެވެ.

އާޒިމް ވަނީ ކެޓް ޝެލްޓަރ ހުޅުވުމާއެކު އެތަނުގައި ހިލޭ ސާބަހަށް މަސައްކަތް ކުރުމަށް ޝައުޤުވެރިވާ މީހުންނަށް އެ ފުރުސަތު އޮތްކަން ފާހަގަކުރައްވާފައެވެ.

ކެޓް ޝެލްޓަރއިން ލިބޭނެ ޚިދުމަތްތަކުގެ ތެރޭގައި އާންމު ޗެކްއަޕްތަކާއި، ފަރުވާތަކާއި، އަދި އޮޕަރޭޝަންތަކުގައި ވެޓެރިނޭރިއަނަށް އެހީތެރިވުމާއި ވެޓެރިނޭރިއަން އަންގާ ގޮތުގެ މަތިން ބުޅަލަށް ބޭސް ދިނުން، ކާންދިނުމާއި، ބޭސްއެޅުން ހިމެނެއެވެ. އަދި އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުމާއި އެ ނޫން ވެސް ބަލި ދެނެގަތުމަށް ކުރާ ޓެސްޓުތައް ހެދުމުގެ އިތުރުން، އެނެސްތީސިއާ ބެލެހެއްޓުމާއި އޮޕަރޭޝަނަށްފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުން ހިމެނެއެވެ.

ސިޓީ ކައުންސިލުން ވިދާޅުވީ ކެޓް ޝެލްޓަރގައި ބުޅަލާއެކު ޢާންމުންނަށް ވަގުތު ހޭދަކޮށްލެވޭ ގޮތަށް ކެޓް ކެފޭއަކާއި ވެޓް ކްލިނިކެއްގެ އިތުރުން ކެޓް ޝޮޕެއްވެސް ހުޅުވާނެ ކަމަށެވެ.