ކުންފުނިތަކަށް ދޭ ސަބްސިޑީތައް ސީދާ ރައްޔިތުންނަށް ދޭ ނިޒާމަކަށް ބަދަލުކުރަނީ

ދައުލަތުގެ ކުންފުނިތަކަށް މިހާރު ދެމުންދާ ސަބްސިޑީތައް އެންމެ ބޭނުންޖެހިފައިވާ ރައްޔިތުންނަށް ފޯރުކޮށްދެވޭ ނިޒާމަކަށް ބަދަލުކުރުމަށް އަންނަ އަހަރު ދައުލަތުން ލަފާކުރާ ބަޖެޓުގައި ހިމަނައިފިއެވެ.

މިއަންނަ އަހަރަށް ދައުލަތުން ވަނީ 56.6 ބިލިޔަން ރުފިޔާގެ ބަޖެޓެއް ހުށަހަޅާފައެވެ. މިގޮތުން މިބަޖެޓުގެ ތެރެއިން އާމްދަނީ އިތުރުކުރުމަށްވުމަށް ބޮޑަށް، އިތުރުވަމުން އަންނަ ދައުލަތުގެ ޚަރަދުތައް ކުޑަކުރުމަށް ގިނަ ފިޔަވަޅުތަކެއް އެޅުމަށްވަނީ ހިމަނާފައެވެ.

މިގޮތުން ޚަރަދުކުޑަކުރުމުގެ ފިޔަވަޅުތައް ފަރުމާކުރުމުގައި އެންމެ ބޮޑު އަހައްމިއްޔަތުކަމެއް ދީފައިވާނީ ސަރުކާރުގެ އެހީތެރިކަމަށް އެންމެ ބޭނުންޖެހިފައިވާ ރައްޔިތުން ދެނެގަނެ އެފަރާތްތަކަށް އެހީތެރިކަން ފޯރުކޮށްދިނުމަށް ކަމަށް މާލީ ވަޒީރު މޫސާ ޒަމީރު ވިދާޅުވިއެވެ. އަދި މިހާރު ސަރުކާރު ކުންފުނިތަކަށް ދެމުންދާ ސަބްސިޑީތަކުގެ ބަދަލުގައި، އެންމެ ބޭނުންޖެހިފައިވާ ރައްޔިތުންނަށް ސަބްސިޑީތައް ލިބޭނެ ނިޒާމަކަށް ބަދަލުކުރުމަށް ބަޖެޓުގައި ހިމަނާފައިވާނެކަމަށް ވަޒީރު ވިދާޅުވިއެވެ.

" އިޖްތިމާއީ ރައްކާތެރިކަން ކަށަވަރުކުރުމަށް ރައްޔިތުންނަށް ދެވޭ އެހީއާއި ސަބްސިޑީއަކީ އެންމެ ބޭނުންޖެހިފައިވާ މީހާ ދެނެގަނެ، އެންމެ އިންސާފުވެރިކަމާއި އެކު ދެވޭ އެހީތަކަކަށް ހެދުމަކީ މުޅި އިޖުތިމާއީ ރައްކާތެރިކަމުގެ ނިޒާމު ހަރުދަނާކުރުމަށް ސަރުކާރުން އަޅަން ނިންމާފައިވާ މުހިންމު ފިޔަވަޅެއް. އެގޮތުން، އަސާސީ ޚިދުމަތްތައް ފޯރުކޮށްދޭ ސަރުކާރުގެ ކުންފުނިތަކަށް މިހާރު ދެމުންދާ ސަބްސިޑީތަކުގެ ބަދަލުގައި، އެންމެ ބޭނުންޖެހިފައިވާ ދިވެހިރައްޔިތުން ދެނެގަނެ، ސީދާ އެ ރައްޔިތު މީހާގެ ޖީބަށް ސަބްސީޑީ ލިބޭގޮތަށް ނިޒާމު ބަދަލުކުރަން އަންނަ އަހަރުގެ ބަޖެޓުގައި ހިމަނާފައިވާނެ. " ވަޒީރު މޫސާ ޒަމީރު ވިދާޅުވިއެވެ.

މިދިޔަ އަހަރުގެ ބަޖެޓުގައިވެސް ފަރުދުންނަށް ދެވޭ ސަބްސިޑީ ނިޒާމަކަށް ބަދަލުކުރުމަށް ހިމަނާފައިވެއެވެ. ނަމަވެސް ސަރުކާރުން ވިދާޅުވީ، މިކަމުގެ ޢަމަލީ މަސައްކަތެއް އޭރުގެ ސަރުކާރުން ކޮށްފައި ނެތުމުން އެކަން ތަންފީޒު ނުކުރެވޭނެ ކަމަށް ސަރުކާރުންވަނީ ފާހަގަކޮށްފައެވެ. ނަމަވެސް ސަރުކާރުން މިކަމާއި ގުޅޭގޮތުން ކުރަންޖެހޭ މަސައްކަތްތައްކޮށް އެފަދަ ނިޒާމަކަށް އަންނަ އަހަރު ހިޖުރަކުރެވޭ ވަރަށް ތައްޔާރުވެވިފައިވާ ކަމަށް ސަރުކާރުން ވިދާޅުވެއެވެ.

ސަރުކާރުން ސަބްސިޑީ ނިޒާމު އެއްކޮށް ބަދަލުކުރުމަށް ނިންމާފައިވާއިރު، މި ފިޔަވަޅަކީ ބައިނަލްއަޤްވާމީ މާލީ އިދާރާތަކުން ކުރުމަށް ބާރުއަޅަމުން އައިސްފައިވާ ކަމެކެވެ. އެގޮތުން މިހާރު އޮންނަ ސަބްސިޑީ ނިޒާމުގެ ދަށުން އެންމެ ބޭނުންޖެހޭ ފަރާތްތަކަށް އޭގެ ހެޔޮ އަސަރު ނުކުރާ ކަމަށް މާލީ އިދާރާތަކުން ވިދާޅުވެއެވެ.

ވޯލްޑް ބޭންކުން ރާއްޖެއާ ބެހޭގޮތުން ދާދި ފަހުން ނެރުނު "މޯލްޑިވްސް ޑިވެލޮޕްމެންޓް އަޕްޑޭޓް - ސީކިން ސްޓެބިލިޓީ އިން ޓާބިއުލަންޓް ޓައިމްސް" ރިޕޯޓުގައިވާ ގޮތުން، ރާއްޖޭގައި ދެވޭ ސަބްސިޑީގެ ގާތްގަނޑަކަށް ދެބައިކުޅަ އެއްބައި ނުވަތަ 43 އިންސައްތަ ޚަރަދު ކުރަނީ އާބާދީގެ އެންމެ މުއްސަނދި ފަރާތްތަކަށެވެ. އެގޮތުން އާބާދީގެ އެންމެ ތަނަވަސްކަން ލިބިފައިވާ 40 އިންސައްތައަށް މި ސަބްސިޑީތަކުގެ ފައިދާ ލިބޭކަމަށް ވޯލްޑް ބޭންކުން ފާހަގަކުރެއެވެ. މިއީ މިދިޔަ އަހަރުގެ ބަޖެޓުގެ 4.1 އިންސައްތަ ކަމަށް ވޯލްޑް ބޭންކުން ވަނީ ފާހަގަކޮށްފައެވެ.

ވޯލްޑް ބޭންކުން ފާހަގަކުރި ގޮތުގައި، ސަބްސިޑީއަށް ކުރާ ޚަރަދަށް ބަލާއިރު، ރާއްޖޭގެ އެންމެ މުއްސަނދި މީހުންގެ 10 އިންސައްތައަށް ސަބްސީޑީތަކުގެ 13 އިންސައްތަ ލިބެއެވެ. ނަމަވެސް މިއީ އެފަރާތްތަކަށް ލިބޭ އާމްދަނީގެ އެންމެ 2 އިންސައްތަކަމަށް ވޯލްޑް ބޭންކުގެ ރިޕޯޓުގައި ފާހަގަކުރެއެވެ. އަދި އާބާދީގެ އެންމެ ފަޤީރު 10 އިންސައްތަ މީހުންނަށް ލިބެނީ އޭގެ އެންމެ 8 އިންސައްތަކަމަށްވެސް ރިޕޯޓުގައި ފާހަގަކޮށްފައިވެއެވެ.