ކޮޕާ ލިބަޓަޑޯރެސްގެ ސެމީ ފައިނަލްގެ ދެވަނަ ލެގުގައި ރަށުން ބޭރުގައި އުރުގުއޭގެ ޕެނަރޯލް އަތުން 3-1 ގެ ނަތީޖާއަކުން ބަލިވި ނަމަވެސް، އެ މުބާރާތުގެ ފައިނަލަށް ބްރެޒިލްގެ ބޮޓަފޯގޯ ދަތުރުކޮށްފިއެވެ.
މިއީ އެ ޓީމުން އެ މުބާރާތުގެ ފައިނަލަށް ދަތުރުކުރު ފުރަތަމަ ފަހަރެވެ. އަދި މިއީ މިދިޔަ ހަ އަހަރުގެ ތެރޭގައި ބްރެޒިލަށް ނިސްބަތްވާ ދެ ކްލަބަކުން ފައިނަލްގައި ކުޅޭ ހަތަރުވަނަ ފަހަރެވެ.
ޕެނަރޯލްއާ ދެކޮޅަށް މިދިޔަ ހަފްތާގައި ކުޅުނު މެޗުން ބޮޓަފޯގޯ މޮޅުވީ 5-0 ގެ ނަތީޖާއަކުންނެވެ. މިއާއެކު ބޮޓަފޯގޯއިން ފައިނަލަށް ދަތުރުކުރީ 6-3 ގެ އެގްރިގޭޓް ނަތީޖާއަކުން ކުރިހޯދައިގެންނެވެ. ބޮޓަފޯގޯއިން ފައިނަލްގައި ނިކުންނާނީ ބްރެޒިލްގެ އެތުލެޓިކޯ މިނެއިރޯއާ ދެކޮޅަށެވެ. އެ ޓީމުން ވަނީ ސެމީގެ ދެ މެޗުން 3-0 ގެ އެގްރިގޭޓުން އާޖެންޓީނާގެ ރިވާ ޕްލޭޓްގެ މައްޗަށް ކުރިހޯދައިފައެވެ.
ބޮޓަފޯގޯއިން ރޭގެ މެޗަށް ނިކުތީ އާއްމުކޮށް އެ ޓީމުގެ ފުރަތަމަ އެގާރައިގައި ހިމެނިގެން ކުޅެމުންއަންނަ ގިނަ ކުޅުންތެރިންތަކެއް ނުލައެވެ. އޭގެތެރޭގައި، ބްރެޒިލްގެ ގައުމީ ޓީމުގެ ފޯވާޑުން ކަމަށްވާ ލުއީޒް ހެންރީކް އާއި އީގޯ ޖީސުސް ހިމެނެއެވެ.
މި މެޗުގެ 31 ވަނަ މިނެޓުގައި ކުރީން ލީޑު ނެގީވެސް ޕެނަރޯލުންނެވެ. މި ލަނޑު އެ ޓީމަށް ޖަހައިދިނީ ހައިމޭ ބައޭޒްއެވެ. މި ގޯލާއެކު 1-0 އިން ޕެނަރޯލް ކުރީގައި އޮވެގެން ފުރަތަމަ ހާފު ނިމެންދަނިކޮށް، އިތުރުވަގުތުގެ ތެރޭގައި ގޯލްކީޕަރު ވޮޝިންޓަން އަގީރޭއަށް ދެއްކި ރަތް ކާޑާއެކު އެ ޓީމުން މި ހާފު ނިންމާލީ އެއް ކުޅުންތެރިއަކު މަދުކޮށެވެ.
މި މެޗުގައި ޕެނަރޯލުން ޖެހި ދެވަނަ ލަނޑު މެޗުގެ 66 ވަނަ މިނެޓުގައި ކާމިޔާބުކޮށްދިނީ ވެސް ހައިމޭ ބައޭޒްއެވެ. އޭގެ ތިން މިނެޓު ފަހުން، ބޮޓަފޯގޯގެ މަޓެއޯ ޕޮންޓޭއަށް ދެވަނަ ރީނދޫ ކާޑާއެކު ރަތެއް ދެއްކުމުން އެ ޓީމުންވެސް މެޗުގެ ބާކީބައި ފުރިހަމަކުރީ 10 ކުޅުންތެރިންނާއެކުއެވެ.
މެޗު ނިމެން ދެ މިނެޓަށްވެފައިވަނިކޮށް، އާޖެންޓީނާ އާއެކު އެންމެ ފަހުގެ ފީފާ ވޯލްޑް ކަޕް ކާމިޔާބުކުރި މިޑްފީލްޑަރު ތިއާގޯ އަލްމާޑާ ވައްދާލި ލަނޑުން ބޮޓަފޯގޯއިން ފަރަގުކުޑަކުރިއެވެ. އެކަމަކު، އޭގެ މިނެޓެއްގެ ތެރޭގައި ފަކުންޑޯ ބަޓިސްޓާ ވަނީ ޕެނަރޯލްގެ ދެ ލަނޑުގެ ލީޑު ދަމަހައްޓައިފައެވެ.
ކޮޕާ ލިބަޓަޑޯރެސްގެ އެންމެ ފަހުން ކުޅެވުނު ފަސް މުބާރާތުގެ ޗެމްޕިއަންކަންވެސް ބްރެޒިލްގެ ކްލަބުތަކުން ހޯދާފައިވާއިރު، މި އަހަރުގެ މުބާރާތުގެ ފައިނަލް މެޗު އޮތީ އަންނަ ޑިސެންބަރު މަހުގެ އެއްވަނަ ދުވަހެވެ.