މި ވަގުތު ހާލަތު އޮތްގޮތުން މުޅި ރާއްޖެ ޝާމިލުވާ ގޮތަށް ފުޓްބޯޅަ ފުޅާކޮށްގެން ނޫން ގޮތަކަށް ކުރިއަށްދެވެން ނެތް ކަމަށް 90 ޕްލަސް ގޯލްޑް ކަޕުގެ ފައުންޑަރ، ތަޖުރިބާކާރު ކޯޗު މުޙައްމަދު ޝާޒްލީ ބުނެފިއެވެ.
ރާއްޖޭގެ ފުޓްބޯޅައިގެ ފޯރި އަލުން ވީހާވެސް ބޮޑަށް ގަދަކުރުމުގެ ގޮތުން މުޅިން އަލަށް ބާއްވާ ގޯލްޑް ކަޕް ފެށުމަށް ހަމަޖެހިފައިވަނީ މި މަހުގެ 20 ވަނަ ދުވަހެވެ. މި މުބާރާތުގައި މި ފަހަރު 22 ޓީމު ވާދަކުރާއިރު، ޓީމުތަކުން އަންނަނީ ވަރުގަދައަށް ތައްޔާރީތައް ކުރިއަށްގެންދަމުންނެވެ.
މުބާރާތުގެ ތައްޔާރީތަކާ ގުޅޭގޮތުން ޕީއެސްއެމްއިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުން ޝާޒްލީ ބުނީ މި ފަހަރު މި ހަރަކާތް ބާއްވަނީ މުބާރާތެއް ނަމަވެސް ފެސްޓިވަލެއްގެ ގޮތުގައި ކަމަށެވެ. އަދި އަންނަ އަހަރުން ފެށިގެން މުބާރާތުގައި ބައިވެރިވެވޭނީ ކޮލިފައިން ކުޅެގެން ކަމަށްވެސް ވިދާޅުވިއެވެ.
ޝާޒްލީ ބުނީ މިއީ ބަނގުރޫޓުވެފައިވާ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އެހީތެރިކަން ބޭނުންވާ ވަގުތު ކަމަށާއި، މުބާރާތް ބާއްވަނީވެސް އެފްއޭއެމްއަށް އެހީތެރިވުމުގެ ގޮތުން ކަމަށެވެ.
"ފުޓްބޯޅަ އެސޯސިއޭޝަނަށްވެސް އެހީތެރިވުމުގެ ގޮތުން އަދި ފުޓްބޯޅަ އެސޯސިއޭޝަން ރަނގަޅު ހިސާބަކަށް ދާއިރުގައި ކުޅުންތެރިންވެސް މީގެތެރޭގައި ތިބޭ ކަހަލަ ގޮތަކަށް އަދި ކޯޗުންވެސް، މެނޭޖުމެންޓްތަކުގައި މަސައްކަތްކުރާ މީހުންވެސް. އަޅުގަނޑުމެން ލީގު ފަށާއިރު ލީގަށްވެސް ސަޕޯޓެއް ލިބޭނެ ކަހަލަ ގޮތަކަށް." އެކި އުމުރުފުރާތަކުގެ ގައުމީ ޓީމުގެ ކޯޗުކަންވެސް ކޮށްފައިވާ ޝާޒްލީ ބުންޏެވެ.
ޝާޒްލީ ބުނީ ރާއްޖޭގެ ފުޓްބޯޅައިގައި ޚިދުމަތްކުރުމަށް މުޅި އުމުރު ހޭދަކުރެވިއްޖެ ކަމަށާއި، ޓެކްނިކަލް ގޮތުން ފުޓްބޯޅައިގައި ހަރަކާތްތެރިވާ އެންމެންނަށް, ފުޓްބޯޅައަށް ވެގެންދިޔަ ގޮތް ވަރަށް ރަނގަޅަށް އެނގޭ ކަމަށެވެ. އެހެން ނަމެވެސް މިހާލަތަށް ފުޓްބޯޅަ ގޮސްދާނެކަމަށް ގަބޫލުކުރަންދަތި ކަމަށްވެސް ވަނީ ބުނެފައެވެ. މިއީ މުބާރާތެއްގައި ސިފައިގަ ނަމެވެސް ފުޓްބޯޅަ ކޮޅަށް ނެގުމަށް ބާއްވާ އިވެންޓެއް ކަމަށްވެސް ޝާޒްލީ ބުންޏެވެ.
" އަޅުގަނޑުމެން ބެލީ ކޮންކަމެއްތޯ އަޅުގަނޑުމެންނަށް ކުރެވޭނީ މިހާލަތުން އަރައިގަންނަން. އަޅުގަނޑުމެން އެކަންޏެއް ނޫން އަޅުގަނޑުމެންގެ ރައްޓެހިންނާއި، އަޅުގަނޑުމެންގެ ޓީމު މި ނުކުތީ މުޅި ރާއްޖެއަށް ފުޓްބޯޅަ އާމާޒުކޮށްގެން ނޫނީ ކުރިއެރުމެއް ނެތޭ." ޝާޒްލީ ބުންޏެވެ.
މި މުބާރާތުގައި ބޭނުންކުރާ ޝިއާރަކީ "އަލުން އަނބުރާ ދަނޑަށް" މި ޝިއާރެވެ. މި މުބާރާތުގައި 22 ޓީމެއް ވާދަކުރާއިރު، އެ ޓީމުތަކުގެ ތެރޭގައި ރާއްޖޭގެ ފުޓްބޯޅައިގެ ވަރުގަދަ ބާރުތައް ގޮތުގައި މަޝްހޫރުވެފައިވާ ރަށްތައްވެސް ހިމެނެއެވެ.