އަގުހެޔޮ އުމްރާ ޕެކޭޖުތައް ތަޢާރަފުކުރަން ވަޒީރު ޑރ.ޝަހީމް އެދިވަޑައިގެންފި

ރާއްޖޭން ވީހާވެސް ގިނަ ބަޔަކަށް އުމްރާއަށް ދެވޭނެ މަގު ފަހިކޮށްދިނުމުގެ ގޮތުން އަގުހެޔޮ އުމްރާ ޕެކޭޖްތަކެއް ތަޢާރަފް ކުރަން އުމްރާ ގްރޫޕްތަކުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު އެދިވަޑައިގެންފިއެވެ.

ވަޒީރު މިގޮތަށް އެދިވަޑައިގެންނެވީ ރާއްޖޭގައި ފުރަތަމަ ފަހަރަށް ބާއްވާ "ޙައްޖު، ޢުމްރާ ކޮންފަރެންސް" ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ ސަޢުދީ ޢަރަބިއްޔާގައި ޙައްޖާއި ޢުމްރާގެ ޚިދުމަތަށް ގެންނަ ނިޒާމީ ބަދަލުތަކާއެކު ރާއްޖޭންވެސް މިޚިދުމަތް ފޯރުކޮށްދިނުމުގައި ނިޒާމީ ބަދަލުތަކެއް ގެންނަން ޖެހޭކަމަށެެވެ. އަދި ނިޒާމަށް ގެންނަން ޖެހޭ ބަދަލުތައް ގެންނާނީ މިފަދަ ކޮންފަރެންސްތަކުގެ އަލީގައި ޖަމާޢަތްތަކުގެ މަޝްވަރާގެ މަތިންކަމަށެވެ.

ވަޒީރު ވިދާޅުވީ ރާއްޖޭގައި ޢުމްރާގެ ޚިދުމަތް ދޭ ގިނަ ކުންފުނިތަކެއް ހުރިނަމަވެސް ޢުމްރާއަށް މީހުން ގެންދަނީ ވަކި ދުވަސްވަރެއްގައިކަމަށެވެ. އޭގެ ބަދަލުގައި އަހަރުގެ ކޮންމެ އިރެއްގައިވެސް ޢުމްރާއަށް މީހުން ގެންދެވޭނެ ގޮތް ހެދުމަކީ މުހިންމުކަމެއްކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ މައްކާ އާއި މަދީނާގައި ވެސް ޕެކޭޖްތަކުގެ އަގު ބޮޑުވަނީ ހަރަމްފުޅާ ކައިރިން ހޮޓަލްތައް ނަގާތީކަމަށެވެ. އަދި ހަރަމްފުޅާ ދުރުން ހޮޓަލްތައް ނެގުމުން އުމްރާ ޕެކޭޖުތައް އަގުހެޔޮވާނެކަން ވަޒީރު ފާހަގަކުރެއްވިއެވެ.

ރާއްޖޭން އާއްމުކޮށް މިހާރު އުމްރާއަށް ގެންދާ ޕެކޭޖްތަކުގައި، ކޮންމެ މީހަކަށް ނުދެވިދާނެކަން ފާހަގަކުރައްވައި ވަޒީރު ވިދާޅުވީ 20،000 ރުފިޔާއަށް ނުވަތަ ނުވަތަ 15،000ރުފިޔާގެ ޕެކޭޖުތަކެއް ތަޢާރަފް ކޮށްފިނަމަ ދެވޭނެ މީހުން އުޅޭނެ ކަމަށެވެ. އެހެންކަމުން އަގުހެޔޮ ޢުމްރާ ޕެކޭޖްތަކެއް ތަޢާރަފް ކުރުމަށް ވަޒީރު އެދިވަޑައިގެންނެވިއެވެ. ވަޒީރު ވަނީ މިކަންކަމާމެދު މަޝްވަރާކުރުމަށް އެދިވަޑައިގެންފައެވެ.

"މިހާރު މިއޮންނަނީ ރޯދަ ޢުމްރާ، ޖެނުއަރީ، ފެބްރުއަރީ ޢުމްރާ ގޮތަށް. ނިޒާމީ ބަދަލެއް ގެންނަން އެބަޖެހޭ. އެއީ އަބަދުވެސް ޢުމްރާއަށް ދެވޭނެ ގޮތެއް އޮތުން. ކޮންމެ އިރެއްގައި ވެސް ޢުމްރާއަށް ދެވޭނެ ގޮތެއް އޮތުން، ކޮންމެ ދުވަހެއްގައި ވެސް އެ މީހަކަށް ފަސޭހަ ދުވަހެއްގައި ދެވޭނެ މަގު ކޮށާފައި ބޭއްވުން، އަދި ޒުވާނުންނާއި ދަރިވަރުންނާއި ބެލެނިވެރިންނަށް އެކިއެކި ފަރާތްތަކަށް އަގުހެޔޮ ޕެކޭޖުތައް ތަޢާރަފް ކުރުން" އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވިއެވެ.

މި ރަސްމިއްޔާތުގައި ވަޒީރު ވަނީ ޢުމްރާއަށް ގެންދާ ކުންފުނިތަކުގެ ތެރެއިން އެންމެ ރަނގަޅު 5 ކުންފުންޏަށް އަންނަ އަހަރުން ފެށިގެން ސްޓަރ ދޭން ފަށްޓަވާނެކަން ފާހަގަ ކުރައްވާފައެވެ. އެގޮތުން އަންނަ އަހަރު ބާއްވާ މިކޮންފަރެންސްގައި ސްޓަރ ދޭނެކަމަށް ވިދާޅުވިއެވެ.

މިކޮންފަރެންސަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ދިވެހިރާއްޖޭން މީހުން ޙައްޖާއި ޢުމްރާއަށް ގެންދިއުމުގެ ނިޒާމު އިތުރަށް ހަރުދަނާކުރުމަށްޓައި މަޝްވަރާކުރުމުގެ މަޤުޞަދުގައި ބާއްވާ ކޮންފަރެންސެކެވެ.

މީގެ އިތުރުން މިކޮންފަރެންސަކީ ޙައްޖ،ު ޢުމްރާގެ ޚިދުމަތްދޭ ކުންފުނިތަކާއި ކަމާގުޅޭ އެހެން ކުންފުނިތަކާއި ކޮންފަރެންސްގެ ތެރެއިން ގުޅުވާލައި، ޙައްޖާއި ޢުމްރާގެ އަޅުކަމާއި ގުޅުންހުރި ޚިދުމަތްތައް ފުޅާކޮށް، ޢުމްރާ ކުންފުނިތަކާއި ވުޒާރާއާއި އޮންނަ ގުޅުން ރަނގަޅުކޮށް، ދީނުގައި ކަނޑައަޅުއްވާފައިވާ ގޮތަށް ޙައްޖާއި ޢުމްރާގެ އަޅުކަން އަދާކުރުމަށް ބޭނުންވާ ދީނީ މަޢުލޫމާތުތައްދީ މިހާރަށްވުރެ ބޮޑަށް ހޭލުންތެރިކުރުވުމުގެ މަޤުސަދުގައި ބާއްވާ ކޮންފަރެންސެކެވެ.

މި ކޮންފަރެންސް ރާވާފައިވަނީ ޙައްޖާއި ޢުމްރާއާއި ގުޅޭ ޕެނަލް ޑިސްކަޝަންތަކާއި ކީނޯޓު ސްޕީކަރުންގެ ވާހަކަދެއްކެވުން ހިމެނޭ ގޮތަށެވެ. އެގޮތުން ޕެނަލް ޑިސްކަޝަންތަކުގައި ޙައްޖާއި ޢުމްރާއާއި ގުޅުންހުރި އެކި މުއައްސަސާތަކުގެ ބޭފުޅުންނާއި، ދީނީ ޢިލްމުވެރިން ބައިވެރިވާ ގޮތަށް ވަނީ ހަމަޖެހިފައެވެ.

މިރަސްމިއްޔާތުގައި ވަނީ ރާއްޖޭގައި ދިގު މުއްދަތަކަށް ޙައްޖާއި ޢުމްރާއަށް މީހުން ގެންދިޔަ 3 މީހެއްގެ އަގުވަޒަންކޮށް ހަނދާނީ ފިލާ ދީފައެވެ.