ޖިހާދުގެ މައްސަލަ ހައިކޯޓަށް ބަލައިނުގަތުމުން މުރާޖަޢާކުރުމަށް ޕީޖީން ހުށަހަޅައިފި

ކ. ފުށިދިއްގަރުފަޅު މައްސަލާގައި ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުވާގެ މައްސަލަ ދެވަނަ ފަހަރަށް ހައި ކޯޓުން ބޭރުކޮށްލަން ނިންމުމުން ޕްރޮސެކިއުޓަރ ޖެނެރަލްގެ އޮފީހުން އެ މައްސަލަ މުރާޖައާކޮށްދިނުމަށް އެދި ހައިކޯޓުގެ ފަނޑިޔާރުންގެ މަޖިލީހަށް މައްސަލަ ހުށަހަޅައިފިއެވެ.

ޢަބްދުﷲ ޖިހާދުގެ މައްޗަށް ކުރިމިނަލް ކޯޓަށް ހުށަހެޅި ރައްޔިތުންނަށް ނުވަތަ ދައުލަތަށް ފައިދާއެއްވާން އޮތް ކަމެއްގައި އެނޫންގޮތަކަށް ޢަމަލުކުރުމުގެ މައްސަލަ ބެލޭނެ ތަނެއް ނެތްކަމަށް އެކޯޓުން ކަނޑައެޅުއްވުމާއި ގުޅިގެން، އެ މައްސަލަ އިސްތިއުނާފުކުރުމަށް ޕީޖީ އޮފީހުން ހައިކޯޓަށް މައްސަލަ އެންމެ ފުރަތަމަ ހުށަހެޅީ 11 އޮގަސްޓު 2024 ގައެވެ.

މައްސަލަ ހައިކޯޓަށް ހުށަހެޅުމުން، އެ ކޯޓުން ވަނީ އިޖުރާއީ ނިންމުމުގައި ކޯޓަށް ހާޒިރުވުމުގެ އަމުރު ޖިހާދަށް ރައްދު ނުކުރެވޭކަމަށް ބަޔާންކޮށް، އޭނާ ކޯޓަށް ހާޒިރުކުރެވޭނެ އިންތިޒާމު ހަމަޖެއްސުމަށްފަހު އަލުން ހުށަހެޅުމަށް 15 ދުވަހުގެ މުއްދަތެއް ދެއްވައި، މައްސަލަ އަނބުރާ އަނބުރާ ޕީޖީ އޮފީހަށް ފޮނުވާލާފައެވެ.

މިކަމާއި ގުޅިގެން ޕީޖީ އޮފީހުން ވިދާޅުވީ އެ މުއްދަތުގައި ދިވެހި ފުލުހުންގެ ޚިދުމަތް މެދުވެރިކޮށް ޢަބްދުﷲ ޖިހާދު ހުރިތަނެއް ސާފުކުރިއިރު، އޭނާ ރާއްޖެއިން ބޭރަށް ގޮސްފައިވާކަމަށް މަޢުލޫމާތު ލިބުނު ކަމަށެވެ. އަދި އެ ސަބަބަށްޓަކައި، ކޯޓުން ދެއްވި މުއްދަތުގައި މައްސަލަ އަލުން ހުށަހެޅުމަށް ހުރަހެއް ކުރިމަތިވެފައިވާކަމަށް ބަޔާންކޮށް، މުއްދަތު އިތުރުކޮށްދެއްވުމަށް 3 އޮކްޓޫބަރު 2024 ގައި ދިވެހިރާއްޖޭގެ ހައިކޯޓުގައި އެދުނުކަމަށްވެސް އެ އޮފީހުން ވިދާޅުވިއެވެ.

ޢަބްދުﷲ ޖިހާދު އެނބުރި ރާއްޖެ އައިސްފައިވާކަމަށް 14 އޮކްޓޫބަރު 2024 ގައި ފުލުހުންގެ އެ އޮފީހަށް މަޢުލޫމާތު ދެއްވިކަން ފާހަގަކުރައްވާ ޕީޖީ އޮފީހުން ވިދާޅުވީ 15 އޮކްޓޫބަރު 2024 ގައި މައްސަލަ އަލުން ހައިކޯޓަށް ހުށަހެޅިކަމަށެވެ. ނަމަވެސް މައްސަލަ އިސްތިއުނާފުކުރަން ކޯޓުން ދިން މުއްދަތު ފާއިތުވުމުން، އެ ކޯޓުގެ ރަޖިސްޓަރގެ ނިންމުމުން މައްސަލަ ބަލައިނުގަތުމަށް 27 އޮކްޓޫބަރު 2024 ގައި ވަނީ ނިންމަވާފައެވެ.

ހައިކޯޓުގެ ރަޖިސްޓްރާގެ ނިންމެވުމާމެދު ޕީޖީ އޮފީހުން ހިތްހަމަނުޖެހޭތީއާއި، ރަޖިސްޓްރަރގެ ނިންމެވުން ކޯޓުތަކުގެ ޤާނޫނުގެ 42 ވަނަ މާއްދާއާއި، ހައިކޯޓުގެ ގަވާއިދުގެ 29 ވަނަ މާއްދާއާ ފުށޫއަރާކަމަށް ފެންނާތީ، އެ ނިންމެވުން މުރާޖަޢާކޮށްދެއްވުން އެދި އަލުން މިއަދު ދިވެހިރާއްޖޭގެ ހައިކޯޓުގެ ފަނޑިޔާރުންގެ މަޖިލީހަށް ޕީޖީ އޮފީހުން ވަނީ ހުށަހަޅާފައެވެ.

ޖިހާދުގެ މައްޗަށް ދައުލަތުން ދައުވާ އުފުލާފައިވަނީ އެމަނިކުފާނު ފިނޭންސް މިނިސްޓަރަކަށް ހުންނެވި ދުވަސްވަރު ފުށިދިއްގަރުފަޅު ސްޕެޝަލް ޓުއަރިސްޓް ޒޯނެއްގެ ގޮތުގައި ތަރައްގީ ކުރުމަށް ސޮއިކުރެއްވި މައްސަލައިގައެވެ. އެއެއްބަސްވުމުގައި ސަރުކާރުގެ ހިއްސާގެ ގޮތުގައި 25 އިންސައްތަ އޮތްއިރު ސްޕެޝަލް ޓޫރިޒަމް ޒޯނެއްގައި ގޮތުގައި ތަރައްގީ ކުރާ ތަންތަނުގައި މަދުވެގެން ސަރުކާރުގެ 50 އިންސައްތަ ހިއްސާ އޮންނަން ޖެހޭނެ ކަމަށް ނެޝަނަލް ޕްލޭނިން ކައުންސިލުން ލަފާދީފައި އޮތްކަމަށް ދައުލަތުން ވިދާޅުވެއެވެ.