ޓެކްސީ ލައިންގެ ޚިދުމަތްދޭން ދެހަފްތާ ތެރޭގަ ސަރުކާރު ކުންފުންޏަކާ ހަވާލުކުރަނީ

ޓެކްސީ ޚިދުމަތަކީ އަސާސީ ޚިދުމަތެއްގެ ގޮތުގައި ހުރިހާ ގަޑިއެއްގައިވެސް ފޯރުކޮށްދިނުމުގެ މަޤުޞަދުގައި ސަރުކާރުން އިއުލާންކުރި ޓެކްސީ ލައިންގެ ޚިދުމަތްދިނުމަށް ކުރިއަށްއޮތް ދެ ހަފްތާއެއްހާ ދުވަހުގެ ތެރޭގައި ސަރުކާރު ކުންފުންޏަކާ ހަވާލުކުރާނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

މާލެފަހި ޕްރޮގްރާމްގެ ތެރެއިން ސަރުކާރުން ޓެކްސީ ލައިނެއް ތަޢާރަފްކުރުމަށް ނިންމެވުމާއި ގުޅިގެން ޓެކްސީ ދުއްވާ ފަރަތްތަކުގެ ހުރި ކަންބޮޑުވުންތަކާ ގުޅިގެން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންވަނީ މަޖިލީހުގެ އިޤްތިޞާދީ ކޮމިޓީއަށް ވަޑައިގެން ޖަވާބުދާރީވެވަޑައިގަންނަވާފައެވެ. ވަޒީރު ވިދާޅުވީ، ޓެކްސީގެ ޚިދުމަތަކީ ވަރަށް އަސާސީ މުހިއްމު ޚިދުމަތަކަށްވާއިރު، މިވަގުތު ޓެކްސީތައް ޒިންމާދާރުކުރުވޭނެ އެއްވެސް ގޮތެއް ނެތްކަމަށެވެ. ނަތީޖާއެއްގެ ގޮތުން ރައްޔިތުންނަށް ހުރިހާ ވަގުތެއްގައި ހުރިހާ ތަނަކަށް ދެވޭނެ ފަދަ ފަސޭހަ ގޮތަކަށް ޚިދުމަތް ބައްޓަންވެފައި ނެތްކަމަށް ވަޒީރު ވިދާޅުވިއެވެ.

"އަޅުގަނޑުމެންނަށް ފެންނަން އޮތް ހަގީގަތެއް މިއީ، މާލެ ތެރޭގެ އެއްތަނުން އަނެއް ތަނަށް ދިޔުމަށް ޓެކްސީއެއް ނުލިބޭ. އެހެނެއްނޫން، ހުޅުމާލެއަށް ދެވަނަ ފިޔަވައްސަށް ދާން ވަރަށް ފަސޭހައިން ޓެކްސީ ލިބޭ" ވަޒީރު ވިދާޅުވިއެވެ.

ވަޒީރު ވިދާޅުވީ މިހާރު ޓެކްސީގެ ޚިދުމަތްދެނީ ޑްރައިވަރުން ބޭނުންވާ ގަޑިތަކުގައި ބޭނުންވީމަކަމަށެވެ. އެހެންނަމަވެސް އަސާސީ ޚިދުމަތެއް އެވިސްނުމުގައި ނުދެވޭނެކަން ފާހަގަކުރައްވާ ވަޒީރު ވިދާޅުވީ، ކޮމްޕިއުޓަރ ނިޒާމެއްގެ ދަށުން ޑްރައިވަރުންގެ ބާރު ނުހިނގާގޮތަށް ސިސްޓަމުން އެންގީމަ އެތަނަކަށް ދަންޖެހޭގޮތަށް މިނިޒާމު ބަދަލުކުރުމަށް ނިންމަވާފައިވާކަމަށެވެ. ސަރުކާރުން މިހާރު ނިންމަވާފައިވަނީ ޓެކްސީ ލައިން އުފެއްދުމަށް ބޭނުންވާ ޓެކްސީގެ 20 އިންސައްތައާއި 25 އިންސައްތައަކީ ތިމާވެއްޓާ ރައްޓެހި އުޅަނދުތަކަށް ހެދުމަށްކަމަށްވެސް ވަޒީރު ވިދާޅުވިއެވެ.

އެގޮތުން ވެހިކަލްތައް މާލެ ގެނައުމަށްފަހު ސަރުކާރު ޙިއްސާވާ ކުންފުންޏަކާ ޙަވާލުކުރުމަށް މިހާރު ނިންމާފައިވާކަމަށް ވަޒީރު ވިދާޅުވިއެވެ. އަދި ޓެކްސީ ލައިންގެ މަސައްކަތްކުރާ 50 އިންސައްތަ ޑްރައުވަރުންނަކީ ދާއިމީ މުވައްޒަފުންކަމަށާއި އަނެއް 50 އިންސައްތަ ޑްރައިވަރުންނަކީ އިތުރު ވަޒީފާއެއްގައި އުޅެމުން ޓެކްސީ މަސައްކަތް ކުރަން އެދޭ ފަރާތްތަކަށް ހުޅުވާލާ ފުރުސަތެއްކަމަށް ވަޒީރުވަނީ ފާހަގަކުރައްވާފައެވެ.

"މިއާއެކު ޓެކްސީ ޑްރައިވަރުންނާއި ފަސިންޖަރުންގެ ރައްކާތެރިކަން ކަށަވަރުކުރުމަށްވެސް ފިޔަވަޅުތަކެއް އެޅިގެންދާނެ" ވަޒީރު ވިދާޅުވިއެވެ.

މިމަސައްކަތް ކުރުމަށް ބޭނުންވާ ބިން ކުރިއަށް އޮތް 10 ވަރަކަށް ދުވަސްތެރޭގައި ވުޒާރާއާއި ޙަވާލުކުރެވޭނެކަމަށް ވަޒީރުވަނީ ވިދާޅުވެފައެވެ. މިޚިދުމަތް ދިނުމަށް ސަރުކާރުން ނިންމާފައިވަނީ ކެޕިޓަލް އިންވެސްޓްމަންޓް ދައުލަތުންދީގެން ސަރުކާރު ކުންފުންޏަކާ ޙަވާލުކޮށްގެން ސަބްސީޑީއަކާއި ނުލައި ކުރެވޭ މޮޑެލްއަކަށެވެ.