"އައު ޤަވާޢިދުގެ ދަށުން ބޭރުފައިސާ ގަނެވިއްކުމުގެ ވިޔަފާރިއަށް ޚާއްސަ ކުންފުންޏެއް"

ބޭރުފައިސާ ގަނެވިއްކުމުގެ ވިޔަފާރި އެކަަމަށް ޚާއްސަ ކުންފުންޏަކުން ކުރާގޮތަށް ހަމަޖެއްސުމުން އެ ވިޔަފާރިތަކުގެ ކަންކަން ބަލަހައްޓަން ފަސޭހަވެގެންދާކަމަށް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ވިދާޅުވެއްޖެއެވެ.

އެމްއެމްއޭއިން މިހެން ވިދާޅުވެފައިވަނީ، މިފަހުން ޢަމަލުކުރަން ފެށި މަނީ ޗޭންޖަސް ޤަވާއިދާއި ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުންނެވެ.

އެމްއެމްއޭއިން އަލަށް އަމަލުކުރަން ފެށި ބޭރުފައިސާ ގަނެވިއްކުމުގެ ވިޔަފާރިއާ ބެހޭ ޤަވާއިދަކީ 1987 އިން ފެށީގެން އަމަލުކުރަމުންއައި ޤަވާއިދުގެ ބަދަަލުގައި ޢަމަލުކުރަން ފެށި އައު ޤަވާއިދެކެވެ. މި ޤަވާއިދުގެ އެންމެ ބޮޑު ބޭނުމަކީ ބޭރުފައިސާ ގަނެވިއްކުމުގެ ވިޔަފާރި ބެލެހެއްޓުން މިހާރަށްވުރެ ހަރުދަނާކޮށް އެ ވިޔަފާރި ހިންގުމުގައި ޒަމާނީ އުސޫލުތަކެއް ކަނޑައެޅުމެވެ.

މިޤަވާއިދާއި ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަ ދައްކަވަމުން އެމްއެމްއޭގެ އެސިސްޓެންޓް އެގްޒެކެޓިވް ޑިރެކްޓަރ އައިޝަތު އަސްނާ ހަމްދީ ވިދާޅުވީ، ބޭރުފައިސާގެ ގަނެވިއްކުމުގެ ވިޔާފާރީގެ ޙުއްދަ މިހާތަނަށް 200 އެތައް ފަރާތަކަށް ދެވިފައިވާ ކަމަށެވެ. ނަމަވެސް ޤަވާއިދަށް އިސްލާހު ގެނެސްފައިވަނީ މިފަދަ ވިޔަފާރިތަކަށް ޚާއްސަ ތަންތަން ޤާއިމްކުރުމަށް ކަމަށް އަސްނާ ވިދާޅުވިއެވެ.

އަލަށް ޢަމަލުކުރަން ފެށި ޤަވާއިދުގެ ދަށުން މި ވިޔަފާރިކުރެވޭނީ އެކަމަށް ޚާއްސަ ކުންފުންޏެއް މެދުވެރިކޮށެވެ. އެގޮތުން ފަންތިތަކަށް ލައިސެންސް ދޭ ގޮތަށް އައު ޤަވާދުގައި ވަނީ ހަމަޖައްސާފައެވެ. އަދި އެ ޤަވާއިދުގެ ދަށުން ލައިސެންސަށް އެދޭ ފަރާތްތަކުން 50،000 ޑޮލަރުގެ ޑިޕޮސިޓެއް ބަހައްޓަންވާނެ ކަމަށް އެމްއެމްއޭއިން ވިދާޅުވެއެވެ.

އަސްނާ ވިދާޅުވީ މި ވިޔަފާރިއަށް ޚާއްސަ ކުންފުންޏެއް ހެދުމަށް ޤަވާއިދުގައި ލާޒިމް ކުރުމާއެކު އެކަމުގެ ސަބަބުން ބޭރުފައިސާ ގަނެވިއްކުމުގައި ހަރަކާތްތެރިވާ ވިޔަފާރިތަކާއި ގުޅޭ މައްސަލަތައް ބެލުމަށްވެސް ފަސޭހަވެގެންދާ ކަމަށެވެ.

"މި ވިޔަފާރިއަށް ޚާއްސަ ބަޔަކު އެބަތިބެންޖެހޭ މިކަންކުރަން. ސެކިއުރިޓީ ޑިޕޮސިޓެއް އެބަޖެހޭ ބަހައްޓާފައި ހުންނަން. އެމްއެމްއޭއިން އަންގާ ގޮތުގެ މަތިން އޮޑިޓެޑް ފައިނޭންޝަލް ސްޓޭޓްމެންޓްސްތަކެއް އެބަ ހުށަހަޅަންޖެހޭ. މި ބަދަލުތަކާއެކު އެކަހަލަ މައްސަލަތައް ބެލުމަށްވެސް ފަސޭހަވެގެންދާނާ" އަސްނާ ވިދާޅުވިއެވެ.

އެމްއެމްއޭއިން އަމަލު ކުރަން ފަށާފައިވާ އައު ޤަވާދުގެ ދަށުން ފުރަތަމަ ކެޓަގަރީގައި ލައިސެންސް ދޫކުރަނީ ބޭރުފައިސާ ގަތުމާއި ވިއްކުމުގެ ވިޔަފާރިއަށެވެ. އަދި ދެވަނަ ކެޓަގަރީގައި ލައިސެންސް ދެނީ ހަމައެކަނި ބޭރު ފައިސާ ވިއްކުމުގެ ވިޔަފާރިއަށެވެ. މިޤަވާއިދު ދަށުން މިހާރު ޓުއަރިޒަމް ޚިދުމަތް ދޭ ފަރާތްކުން ލައިސަންސް ނަގަން ނުޖެހޭނެކަން އެމްއެމްއޭއިން ވަނީ ފާހަގަކޮށްފައެވެ.

މި ޤަވާއިދަށް އަމަލްކުރަން ފަށާތާ 2 މަސް ދުވަހުގެ ތެރޭގައި މިހާރު ލައިސެންސް ދޫކޮށްފައިވާ ފަރާތްތަކުން އަލުން ލައިސެންސްއަށް އެދެންޖެހޭނެ ކަމަށް އެމްއެމްއޭއިން ވިދާޅުވެއެވެ. މިއާއެކު މި މަހުގެ ނިޔަލަށް ރެޖިސްޓަރ ވުމަށް އެމްއެމްއޭއިން ވަނީ ހުޅުވާލާފައެވެ.