ސިޔާސީ ޕާޓީތަކުގެ އިސްސަފުގައި ޙަރަކާތްތެރިވާ ފަރާތްތައް ޤާނޫނާ ޚިލާފުވެއްޖެނަމަ ސީދާ އެފަރާތްތަކާމެދު ފިޔަވަޅު އެޅޭގޮތަށް ސިޔާސީ ޕާޓީގެ ޤާނޫނަށް އިޞްލާޙް ހުށައެޅުއްވުމަށް ތައްޔާރުވެވަޑައިގަންނަވަމުން ގެންދަވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ސިޔާސީ ޕާޓީގެ ޤާނޫނުގައި މިހާރު ބަޔާންކުރައްވާފައިވާ ގޮތުން ސިޔާސީ ޕާޓީތަކުގެ އިސް ސަފުގައި ޙަރަކާތްތެރިވާ ވަކިވަކި ފަރާތްތަކާމެދު ފިޔަވަޅު އެޅުމުގެ ބާރު އިލެކްޝަންސް ކޮމިޝަނަށް ލިބިވަޑައިގެންފައެއް ނުވެއެވެ. ސިޔާސީ ޕާޓީގެ ޤާނޫނަށް އިޞްލާޙް ގެންނެވުމަށް، އެޕާޓީތަކުގެ ބެލެނިވެރި ފަރާތް، އިލެކްޝަންސް ކޮމިޝަނުން މަސައްކަތް ކުރައްވަމުން ގެންދަވަނީ އެކޮމިޝަންގެ ޒިންމާ އަދާކުރެއްވުމަށް ދިމާވާ ޤާނޫނީ ހުރަސްތައް ނައްތަވާލެއްވުމަށް ކަމަށް އިލެކްޝަންސް ކޮމިޝަނުން ވިދާޅުވެއެވެ.
ސިޔާސީ ޕާޓީގެ ޤާނޫނު މިހާރު ބައްޓަން ކުރެވިފައިވާ ގޮތުން ސިޔާސީ ޕާޓީތަކުން ޤާނޫނާ ޚިލާފުވުމުން ޕާޓީތަކާމެދު ފިޔަވަޅުއެޅުމުގެ ބާރު އިލެކްޝަންސް ކޮމިޝަނަށް ލިބިވަޑައިގެންފައިވެއެވެ. އެހެންނަމަވެސް ސިޔާސީ ޕާޓީތަކުގެ އިސްސަފުގައި ޙަރަކާތްތެރިވާ ވަކިވަކި ފަރާތްތައް ޤާނޫނާ ޚިލާފުވުމުން އެފަރާތްތަކާ މެދު ވަކިން ފިޔަވަޅު އެޅުއްވުމުގެ ބާރު އިލެކްޝަންސް ކޮމިޝަނަށް ލިބިވަޑައިގެންފައެއް ނުވެއެވެ.
ޕީ.އެސް.އެމް އަށް ދެއްވި ޚާއްޞަ އިންޓަރވިއުއެއްގައި ވާހަކަދައްކަވަމުން އިލެކްޝަންސް ކޮމިޝަންގެ ސެކެއްޓަރީ ޖެނެރަލް އަޙްމަދު ޢަލީ ވިދާޅުވީ ސިޔާސީ ޕާޓީގެ ޙަރަކާތްތައް މޮނިޓަރ ކުރައްވައި، އެ ޙަރަކާތްތަކާ ގުޅިގެން އަޅުއްވަންޖެހޭ ފިޔަވަޅުތައް އެޅުއްވުމުގައި ދިމާވާ ޤާނޫނީ ގޮންޖެހުންތައް ނައްތާލެއްވުމަށް ޤާނޫނީ އޮނިގަނޑަށް ގެންނަވަންޖެހޭ އިޞްލާޙްތައް ގެންނެވުމަށް ކަމާބެހޭ ފަރާތްތަކާ މަޝްވަރާކުރެއްވުމަށްފަހު އިޞްލާޙް ހުށައެޅުއްވުމަށް ތައްޔާރުވެވަޑައިގެންފައިވާކަމަށެވެ.
ސިޔާސީ ޕާޓީތަކުން ޤާނޫނާ ޤަވާޢިދާ ޚިލާފަށް ޢަމަލުކުރުމާ ގުޅިގެން އިލެކްޝަންސް ކޮމިޝަނުން އެކިފަހަރުމަތިން ވަނީ ސިޔާސީ ބައެއް ޕާޓީތަކާމެދު ފިޔަވަޅު އަޅުއްވާފައެވެ. އެގޮތުން ސިޔާސީ ބައެއް ޕާޓީތައް އެކިފަހަރުމަތިން ޖޫރިމަނާ ކުރައްވާފައިވާކަން ފާހަގަކޮށްލެވެއެވެ. ފަހަކަށް އައިސް ސިޔާސީ ޕާޓީތަކުގެ އިސް ސަފުގައި ޙަރަކާތްތެރިވާ ބައެއް ފަރާތްތަކުން ދިވެހި ދައުލަތް ބަދުނާމުވާގޮތަށް، ދަޢުލަތުގެ މިނިވަން މުއައްސަސާތަކާއި، ކޯޓްތަކުގެ ޙުރުމަތް ކެނޑޭގޮތަށް ޤާނޫނާ ޚިލާފަށް ތަފާތު އެކި ކަންކަން ކުރައްވާފައިވެއެވެ.
މިހާރު ޤާނޫނު ބައްޓަން ކުރެވިފައިވާގޮތުން އެފަރާތްތަކާމެދު ސީދާ ފިޔަވަޅު އެޅުއްވުމުގެ އިޚްތިޔާރު އިލެކްޝަންސް ކޮމިޝަނަށް ލިބިދީފައެއް ނުވެއެވެ.